KISMAAYO (Kaab TV) -Xildhibaanno ka tirsan baarlamaanka Soomaaliya oo matalaya deegaanada maamulka Jubaland ayaa uga digay madaxweyne Xasan Sheekh Maxamuud inuu faragelin hor leh ku sameeyo arrimaha gudaha ee maamulkaasi.
Qoraal ay ku saxiixnaayeen Xildhibaanada labada Aqal ee Baarlamaanka Federaalka ayay Xildhibaanadu walaac xoogan kaga muujiyeen waxa ay u arkaan in la isku dayay in lagu wiiqo nidaamka Federaalka Soomaaliya ee ku dhisan nidaamka dowladnimo ee uu qeexayo Dastuurka Qaranka.
Xildhibaanada ayaa Madaxweynaha ku eedeeyay in uu ku celceliyay waxqabadyo u dhigma xilligiisii hore (2012–2017), xilligaasi oo ay xiisad ka dhex jirtay dowladda Federaalka iyo Jubaland si isku mid ah.
Waxay ka digeen “ duullaan ciidan iyo faragelin siyaasadeed” oo lagu bar-tilmaameedsanayo maamulka Jubaland, iyagoo ka digay in dadaal kasta oo lagu abuurayo maamul goboleed barbar socda ay sii duminayso xasilloonida dowladnimada.
Xildhibaanada ayaa sidoo kale ku eedeeyay in dowladdu ay hurineyso xiisadaha qabiilka si loo wiiqo wada jirka bulshada, isla markaana ciidamada amniga qaranka loo adeegsado arrimo siyaasadeed.
Ciidamada Soomaaliya heer federaal iyo heer dowlad goboleed waa in ay u midoobaan la dagaalanka argagixisada” ayaa lagu yiri warsaxaafadeedka “Waa caqli-gal iyo khatar in la isaga horkeeno danaha siyaasadeed ee mustaqbalka dhow”.
Xildhibaanada ayaa ku booriyay Dowladda Federaalka, Dowladaha Xubnaha ka ah Dowladda Federaalka, Hogaamiyayaasha Siyaasada, iyo Beesha Caalamka in ay qaataan habab nabadeed oo lagu xaliyo khilaafaadka.
“Hoggaan la isku raacsan yahay oo keliya,” ayay ku nuuxnuuxsadeen, “Soomaaliya waxay ku gaari kartaa xasillooni waarta.”
Waxa ay ugu baaqeen dhammaan maamul goboleedyada iyo dowladda dhexe in ay wax walba ka hormariyaan wada hadal iyo in loo midoobo dagaalka ka dhanka ah Al-Shabaab iyo kooxaha kale ee argagixisada ah.
Madaxweyne Xasan Sheekh Maxamuud ayaa dhawaan booqasho ku tagay magaalada Kismaayo si uu u xaliyo khilaafka siyaasadeed ee kala dhaxeeya hogaamiyaha Jubaland Axmed Maxamed Islaam (Madoobe). Si kastaba ha ahaatee, wada-hadallada ayaa ku dhammaaday is-afgarad la’aan, taasoo sii hurinaysa hadal-haynta xiisadda ka soo cusboonaatay Muqdisho iyo Kismaayo.