MUQDISHO (KAAB TV) – Faahfaahinno hor leh ayaa kasoo baxaya weerarkii ismiidaaminta ahaa ee maanta lala beegsaday askarta 14 Oktoobar ee ciidanka militariga ee ku sugnaa xerada Kulliyada Jaalle Siyaad ee magaalada Muqdisho.
Tirada dhimashada oo sii korortay ayaa hadda la soo werinayaa inay gaareyso in ka badan 40, halka dhaawacuna uu yahay 73, sida ay sheegayaan ilaha amniga iyo qaar ka mid ah isbitaallada.
Qaar ka mid ah ehelada askarta oo salaada janaasada kula tukaday isbitaalka Madiina ayaa sheegay in afar askari ay goor dambe oo galabta u dhinteen dhaawacyo kasoo gaaray qaraxa.
Kooxda Al-Shabaab ayaa sheegatay mas’uuliyadda weerarka.
War saxaafadeed ay soo saartay Al-Shabaab ayay ku sheegatay inay dileen 73 askari, halka ay dhaaweceen 124.
Hal nin oo ismiidaaiye ah
Al-Shabaab waxay intaa ku dartay in 250 askari ay ku sugnaayeen goobta markii, sida ay sheegeen, nin isku soo xiray waxyaabaha qarxa uu soo dhexgalay askarta 14 Oktoobar oo ku sugnaa xerada aroornimadii hore abaare 8.15am waqtiga Muqdisho.
Goobjoogayaal ayaa u xaqiijiyay Kaab TV in nin dhalinyaro ah oo isku soo xiray waxyaabaha qarxa uu dhexda ka galay ciidanka oo saf ku jira waxyar ka dib xilliga quraacda ka dibna uu isku dhex qarxiyay.
Ciidanka 14 Oktoobar oo u badan beesha Biyamaal ayaa la sheegay in dhowaan laga soo qaaday magaalada Marka ee gobolka Shabeellaha Hoose oo ay ku sugnaayeen. Ilo wareed amni ayaa u sheegay Kaab TV in ciidankan loogu soo qaaday Muqdisho tababar.
Ciidankan 14 Oktoobar ayaa ah guuto la aas aasay ka dib qaraxii weynaa ee 14 Oktoobar 2017 ka dhacay isgoyska Soobe ee magaalada Muqdisho.
Idaacadda ciidamada ayaa baahisay in baaritaan lagu sameynayo sababta keentay in qofka ismiidaamiyay uu galo xerada ciidamada, hase yeeshee warkaasi oo markii hore lagu faafiyay barta Facebook ee idaacadda ayaa laga tirtiray.
Wasaaradda Gaashaandhigga iyo Taliska Ciidamada ayaan illaa hadda war kasoo saarin weerarkan oo dhaliyay tuhun badan oo la xiriira qaabka loo beegsaday askar hal qabiil u badan kuwaasoo dhowaan laga soo qaaday gobolka Shabeellaha Hoose.