Muqdisho (KAAB ) Magaalada Muqdisho waxaa la hakiyay cayaaraha maamul goboleedyada iyo gobolka Banaadir ka dib rabshado ka dhacay cayaarihii shalay ee KGS Iyo Galmudug.
Warqad ka soo baxday wasaaradda cayaaraha xukuumadda Soomaaliya ayaa lagu sheegay in si KMG ah loo joojiyay cayaaraha kubadda cagta inta xal laga gaarayo wixii dhacay oo nacayb badan abuuray.
Taageerayaasha cayaaryahanada maamulka Galmudug ayaa weerar toos ah ku qaaday cayaaryahanada koonfur Galbeed ka socday taas oo ay ka dhalatay dhaawacyo soo gaaray cayaaryahanada.
Wasaaradda Dhallinyarada iyo Ciyaaraha maamulka Koonfur Galbeed ayaa dhankeeda ku dhawaaqday in ay isaga baxeen tartanka ka socda garoonka Stadiom Muqdisho, kaddib weerarka lagu qaaday ciyaartoyda mataleysay.
Dhinaca kale taliyaha booliska Jeneraal Sulub Axmed Firin oo isna shir jaraa’id qabtay ayaa si adag uga hadlay dhacdadaas oo u ku tilmaamay in wax laga xumaado.
Eedaha ugu badan ayay dadka u jeedeen laamaha amniga Dowladda Soomaaliya oo qaadi waayay masuuliyada amniga cayaaryahanada ka qayb galaya tartanka maamul goboleedyada iyo gobolka Banaadir.
Waxase falcelin kale ka dhalatay Taliyaha NISA Mahad Salaad oo dhiiragalin ugu tagay cayaartooyada Galmudug , iyadoo dhaawacyada kuwa KGS ay yaalaan isbitaalada magaalada Muqdisho.
Talaabadan ayaa loo arkaa mid kala fogaynaysa dadka Soomaaliyeed oo sanado badan ku kala irdhoobay nacayb xaga beelaha ah waxaana baraha bulshada qabsaday ficladan iyo natiijo xumada ka dhalan karta.