Nairob (KAAB TV) – Madaxweyne Xasan Sheekh Maxamuud oo khudbad ka jeediyay shirka Bankiga horumarinta Afrika ee ka dhacay magaalada Nairobi ayaa tilmaamay horumarka ballaaran ee Soomaaliya ay ku tallaabsatay, inkastoo ay soo wajahday caqabado badan oo ay ka mid yihiin arrimaha ammaanka iyo xaaladaha cimilada.
Madaxweyne Maxamuud ayaa carabka ku adkeeyay in Soomaaliya ay ku guuleysatay in ay wax ka bedesho hey’adaha maaliyadda, taasi oo muhiim u aheyd in deymaha laga cafiyo, korna loo qaado dakhliga gudaha. “In kasta oo ay jiraan caqabado, Soomaaliya waxay sameysay horumarro la taaban karo oo dib-u-habeyn loogu sameynayo nidaamkeenna maaliyadeed. Dadaalkaasi kaliya ma horseedeen deyn cafinta balse waxay sidoo kale si weyn u kordhiyeen dakhliga gudaha,” ayuu yiri.
Hadalka Madaxweynaha Soomaaliya ayaa imaanaya xilli Soomaaliya ay ka soo kabaneyso xasillooni darro iyo dhaqaale xumo daba dheeraatay. Waxa uu tilmaamay in dib u habeynta lagu sameeyay maamulka maaliyadda ay keentay kalsoonida hay’adaha maaliyadeed ee caalamiga ah sida Bangiga Adduunka, Sanduuqa Lacagta Adduunka (IMF), iyo AfDB laftiisa.
Khudbadda Madaxweyne Maxamuud ayaa hoosta ka xariiqday adkeysiga iyo go’aannada ay dowladda Soomaaliya iyo shacabkeeda u qabaan in ay ka gudbaan dhibaatooyinka oo ay dhistaan aasaas dhaqaale oo xooggan. Waxa uu ugu baaqay AfDB iyo saaxiibada kale ee caalamiga ah in ay sii wadaan taageerada Soomaaliya si ay ugu socoto kobaca dhaqaale iyo xasilooni waarta.
Shir madaxeedka AfDB, oo ay ka soo ururiyaan hoggaamiyeyaasha iyo daneeyayaasha qaaradda oo dhan, ayaa diiradda saaraya dib-u-qaabaynta muuqaalka maaliyadeed ee Afrika iyo kobcinta iskaashiga dhaqaale ee dalalka xubnaha ka ah. Ka-qaybgalka Madaxweyne Maxamuud waxa ay muujinaysaa sida ay Soomaaliya uga go’an tahay la-hawlgalayaasha gobolka iyo kuwa caalamiga ah si kor loogu qaado rajadeeda horumarineed.
