BOSASO (KAAB TV) -Ciidamada badda Puntland ee PMPF iyo kuwa sirdoonka Puntland ee PISA ayaa ku guuleystey in ay gacanta ku dhigaan hub iyo walxaha qarxa oo ka dhacay magaalada Boosaaso sida ay sheegeen saraakiisha.
Howlgalka wadajirka ah ayaa lagu soo qab qabtay dhowr qof oo looga shakisan yahay in ay xiriir la leeyihiin Al-Shabaab iyo kooxaha Daacish ee fadhigoodu yahay buuraleyda gobolka Bari.
Alaabooyinka la qabtay ayaa isugu jira noocyo kala duwan oo ah walxo halis ah oo ay ka mid yihiin budada qarxa miinooyinka bambooyinka gacanta hoobiye iyo qalab kale oo la xiriira. Hubkan ayaa noqonaya kii saddexaad oo saddexdii bilood ee la soo dhaafay lagu qabto magaalada Boosaaso.
18-kii Maajo, ciidanka PMPF ayaa soo bandhigay hub sharci darro ah, gawaari loo adeegsaday gaadiidkooda, iyo afar qof oo looga shakisan yahay in ay ku lug lahaayeen soo gelinta hubkan Boosaaso. Dhowr maalmood ka hor, 13-kii May, ayaa qof kale oo laga shakisan yahay lagu soo qabtay walxaha qarxa, waxaana loo aqoonsaday inuu yahay argagixiso.
Dhacdooyinkan u dambeeyay ayaa ku soo aadaya iyadoo ay jiraan digniino ka soo baxay hay’adaha sirdoonka Mareykanka oo ku saabsan joogitaanka dagaalyahannada argagixisada gaar ahaan Daacish ee ku sugan gobolka Bari ee Puntland.
Sidoo kale waxaa walaac laga muujiyay xiriirka ka dhexeeya Xuutiyiinta iyo Al-shabaab taasoo suuro-gelin karta in Hubka Xuutiyiinta loo wareejiyo Daacish iyo Al-shabaab.
Howlgallada amni ee ay wadaan ciidamada Puntland ayaa muujinaya sida ay uga go’an tahay la dagaalanka argagixisada iyo ilaalinta xasiloonida gobolka.
Si kastaba ha ahaatee qab-qabsiga iyo xariga soo noqnoqday ayaa sidoo kale muujinaya baahida loo qabo feejignaan joogto ah iyo tallaabooyin firfircoon oo wax looga qabanayo khataraha amni ee Puntland ka jira.