Waxaa maalmihii lasoo dhaafay soo baxay warar la xiriira halka uu ku sugan yahay Xasan Sheekh Maxamuud, kaddib markii uu soo gabagabeeyay safarkiisii magaalada Belgrade ee dalka Serbia.
Xasan Sheekh ayaa 31-kii Agoosto gaaray Belgrade, halkaas oo uu uga qeyb galay shir heer sare ah oo looga hadlayay xuska 65-guurada shirkii ugu horreeyay ee Dhaqdhaqaaqa Dalalka Aan Isbahaysiga Ahayn. Xasan Sheekh ayaa sidoo kale kulamo la yeeshay madax iyo mas’uuliyiin ka qeybgalayay shirka.
Intii uu ku sugnaa Belgrade, Xasan Sheekh wuxuu kulan la yeeshay Madaxweynaha Serbia, Aleksandar Vučić, waxaana labada dhinac ay ka wada hadleen xoojinta xiriirka Soomaaliya iyo Serbia iyo iskaashiga dhinacyada amniga, dhaqaalaha iyo maalgashiga.
Kadib markii uu shirka soo dhammaaday, waxaa baraha bulshada iyo ilo aan rasmi ahayn lagu faafiyay warar sheegaya in uu wajahayo Xasan Sheekh xalad caafimaad, isla markaana uu muddo kooban ku jiray isbitaal ku yaalla Belgrade.
Wararkaasi ayaa sidoo kale sheegaya in Xasan Sheekh uu muddo la tacaalayay xaalad caafimaad oo aan faahfaahinteeda si rasmi ah loo shaacin, isla markaana uu safarka Serbia ku dareemay xanuun iyo dawakhaad.
Dhinaca kale, xogta la xaqiijiyay waxay muujineysaa in Xasan Sheekh uu si rasmi ah uga qeyb galay shirkii Belgrade, halkaasna uu kulamo diblomaasiyadeed ku yeeshay. Dowladda Soomaaliya waxay si cad uga warbixisay ka qeybgalka Madaxweynaha ee shirka iyo kulamadii uu la yeeshay madaxda kale.
Waxaa weli la sugayaa war rasmi ah oo ka soo baxa Madaxtooyada Soomaaliya oo faahfaahin ka bixinaya halka uu Madaxweynaha hadda ku sugan yahay iyo jadwalkiisa shaqo ee maalmaha soo socda.
Ilaa iyo inta xog rasmi ah laga helayo, sheegashada ah in Xasan Sheekh uu isbitaal ku jiray ama uu xaalad caafimaad oo gaar ah u wajahayo waa in loo qaataa war aan weli si rasmi ah loo xaqiijin.