Prof. Cabdulkhalq oo shaaciyay sheegasho xasaasi ah: Imaaraadka ayaa bixin jiray kirada guriga qoyska Xasan Sheekh

|

Prof. Cabdulkhalq Cabdulla, oo ah aqoonyahan iyo falanqeeye siyaasadeed oo u dhashay Imaaraadka Carabta, ayaa hadal cusub oo xasaasi ah ka jeediyay khilaafka sii xoogeysanaya ee u dhexeeya Madaxweynaha Soomaaliya Xasan Sheekh Maxamuud iyo dowladda Imaaraadka.

Prof. Cabdulkhalq ayaa qoraal uu soo dhigay baraha bulshada ku sheegay in Xasan Sheekh uu yahay hoggaamiye aan xusuusan taageeradii uu Imaaraadku siiyay Soomaaliya iyo dowladdiisa, isagoo xusay in Abu Dhabi ay ka qeyb qaadatay tababarka ciidamada Soomaaliyeed, dhismaha awooddooda ciidan iyo bixinta mushaaraadkooda.

Qodobka ugu hadal-heynta badan ee qoraalkiisa ayaa ahaa sheegashada ah in dowladda Imaaraadka ay sidoo kale bixin jirtay kirada guriga ay deggan tahay qoyska Madaxweyne Xasan Sheekh.

Wuxuu sheegay in Imaaraadku uusan doonayn abaalmarin ama mahadnaq, balse uu xusay taageeradii uu dalkiisu siiyay Soomaaliya iyo madaxdeeda.

Hadalka Prof. Cabdulkhalq ayaa kusoo aadaya xilli uu meel sare gaaray khilaafka diblomaasiyadeed ee Muqdisho iyo Abu Dhabi, kaddib markii Xasan Sheekh uu Imaaraadka ku eedeeyay faragelin lagu wiiqayo madax-bannaanida iyo midnimada Soomaaliya.

Prof. Cabdulkhalq ayaa qoraalkiisa ku taxay dhowr arrimood oo uu sheegay in Imaaraadku u qabtay Soomaaliya, kuwaas oo ay ka mid yihiin:
Tababarka ciidamada dowladda Federaalka Soomaaliya.
Dhismaha iyo tayeynta awoodda ciidamada Soomaaliyeed.
Bixinta mushaaraadka ciidamada qaarkood.
Taageerada dhaqaale ee dowladda Federaalka.
Ka qeyb qaadashada dadaallada lagu xoojinayo amniga iyo xasilloonida dalka.
Bixinta kirada guriga qoyska Madaxweynaha Soomaaliya, sida uu isagu sheegay.

Wuxuu ku dooday in taageeradaasi ay muujineyso xiriirkii dhowaa ee Imaaraadka iyo hoggaanka Soomaaliya, isagoo isweydiiyay sababta uu Xasan Sheekh hadda u qaadayo mowqif adag oo ka dhan ah dowladdii uu sheegay inay taageeri jirtay.

DHEERAAD:  Kooxda RSF oo lagu eedeeyay duqeyn lagu laayay 158 qofood oo ka dhacday Omdurman

Si kastaba ha ahaatee, sheegashada ku saabsan bixinta kirada guriga qoyska Madaxweynaha weli ma jirto caddeyn madax-bannaan oo si rasmi ah u xaqiijisay, mana jirto jawaab faahfaahsan oo arrintaas ka timid madaxtooyada Soomaaliya.

Xiriirka Soomaaliya iyo Imaaraadka ayaa muddo dheer ahaa mid ku dhisnaa iskaashi dhaqaale, amni iyo diblomaasiyadeed, waxaana Imaaraadku ka mid ahaa dalalka taageerada siiyay hay’adaha dowladda Soomaaliya iyo ciidamada dalka.

Hase yeeshee, xiriirka labada dhinac ayaa sannadkan 2026 galay marxalad adag, kaddib markii dowladda Soomaaliya ay ku dhawaaqday inay baabi’isay heshiisyadii ay la lahayd Imaaraadka ee dhinacyada difaaca, amniga iyo dhaqaalaha.

Xasan Sheekh ayaa khudbad uu jeediyay 17-kii November 2026 ku sheegay in Imaaraadku faragelin ku hayo arrimaha gudaha Soomaaliya, isla markaana uu heshiisyo la galay maamullada Somaliland, Puntland iyo Jubaland isaga oo aan oggolaansho ka haysan dowladda Federaalka.

Wuxuu sidoo kale ku eedeeyay Imaaraadka inay taageero siiyaan dhinacyo siyaasadeed iyo kuwo ciidan oo uu sheegay inay dhaawacayaan midnimada iyo madax-bannaanida dalka.

Madaxweynaha ayaa difaacay go’aanka dowladda ee lagu baabi’iyay heshiisyada, isagoo sheegay in ilaalinta qarannimada Soomaaliya ay ka muhiimsan tahay xiriir kasta oo dibadeed.

Dowladda Imaaraadka iyo mas’uuliyiinteeda ayaa dhankooda muujiyay inay ka xun yihiin eedeymaha kaga imaanaya Muqdisho.

Anwar Gargash, oo ah la-taliyaha diblomaasiyadeed ee Madaxweynaha Imaaraadka, ayaa isaguna dhaliilay hadallada Xasan Sheekh, isagoo sheegay in Imaaraadku Soomaaliya iyo shacabkeeda garab taagnaa xilliyadii ugu adkaa.

Gargash ayaa su’aal geliyay in Madaxweynaha Soomaaliya uu danaha qaranka ka hormarinayo xisaabtiisa siyaasadeed, wuxuuna ka digay in khilaafaadka gudaha Soomaaliya loo beddelo muran gobolka saameeya.

Hadallada Gargash iyo Prof. Cabdulkhalq ayaa muujinaya sida ay mas’uuliyiinta iyo aqoonyahannada Imaaraadka uga falcelinayaan mowqifka cusub ee dowladda Soomaaliya.
Su’aasha taagan: Taageeradii hore ma laga dhaxlayaa aamusnaan siyaasadeed?

DHEERAAD:  Boqolaal ciidamo ah oo lagu soo bandhigay galbeedka Hiiraan + Ujeedka

Hadalka Prof. Cabdulkhalq ayaa dhaliyay dood ku saabsan xiriirka ka dhexeeya taageerada dhaqaale ee dalalka shisheeye iyo madax-bannaanida go’aan qaadashada dowladaha ay taageeraan.

Dhinac, Imaaraadka ayaa xusaya taageeradii uu Soomaaliya siiyay, gaar ahaan ciidamada, dhaqaalaha iyo mashaariicda horumarinta.

Dhanka kale, dowladda Soomaaliya waxay ku adkeysaneysaa in taageero kasta oo dibadeed aysan siin karin dal shisheeye awood uu ku farageliyo siyaasadda gudaha, heshiisyada dekedaha ama arrimaha amniga qaranka.

Arrintan ayaa dhalineysa su’aal muhiim ah: Haddii dal uu Soomaaliya taageero dhaqaale iyo amni, ma waxay taasi ka dhigan tahay in dowladda Soomaaliya aysan dhaliili karin siyaasaddiisa marka ay u aragto inay wax u dhimayaan danaha qaranka?

Sidoo kale, waxaa isweydiin mudan in khilaafka labada dhinac uu ku saleysan yahay arrimo dhab ah oo la xiriira madax-bannaanida Soomaaliya, mise uu qeyb ka yahay loollan siyaasadeed iyo dano istaraatiiji ah oo ka dhex jira gobolka.

Xaaladda hadda taagan ayaa halis gelin karta iskaashigii labada dal ee dhinacyada amniga, dhaqaalaha, maalgashiga iyo horumarinta kaabayaasha dhaqaalaha.

Soomaaliya waxay weli u baahan tahay taageero caalami ah oo ku saabsan dagaalka Al-Shabaab, dhismaha ciidamada qaranka iyo horumarinta dhaqaalaha, halka Imaaraadkuna uu dano istaraatiiji ah ku leeyahay Geeska Afrika iyo marin-biyoodka muhiimka ah ee gobolka.

 

May be an image of one or more people and text

La Xiriira

Live Now

Baraheenna Bulshada

Baaritaanada

English News