LAASCAANOOD (KAAB TV) – Ciidamada Somaliland ayaa duqeyn culus oo ay galabnimadii Arbacada ka geysteen magaalada Laascaanood ku dilay abwaan Jaamac Kadiye oo ka mid ahaa abwaanada ugu taariikhda dheer geyiga Soomaalida.
Ehellada abwaanka ayaa xaqiijiyay in abwaanku uu ku dhintay madfac ay soo tuureen ciidanka Somaliland oo ku habsaday baabuur uu la socday isaga iyo oday kale.
Lama oga tirada dadka dhintay inay ka badan tahay labada ruux ee uu ku jiro abwaan Jaamac Kadiye.
Warka geerida abwaan Jaamac Kadiye ayaa si weyn waxaa uga gilgishay dhammaan ummadda Soomaaliyeed, iyadoo tacsi iyo cambaareyn duqeynta lagu beegsaday abwaanka ay qabsatay baraha bulshada.
Taariikhda Jaamac Kadiye
Allaha u naxariistee Abwaan Jaamac Kadiye waxa uu ku dhashay duleedka magaalada Laascaanood oo Arbacadii uu ku geeriyooday.
Waxa uu hadda ku jiray da’aadda 70-meeyada. Wuxuu ahaa nin lagu yaqaano gabayada waddaniyadda iyo gumeysi diidka ee horseeday xorriyadda Soomaalida.
Wuxuu aad u soo caanbaxay 1970meeyadii markaasoo gabayabadiisa laga baahin jiray Radio Muqisho iyo Radio Hargeysa.
Ka sokow gabayada waddaniyada, waxaa uu xitaa ka hadli jiray suugaanta dhaqanka iyo hiddaha Soomaalida. Wuxuuna ku hadli jiray luuqadaha Soomaaliga, Carabiga iyo Ingiriiska.
Markii uu qarxay dagaalkii Soomaalida iyo Itoobiya, wuxuu Jaamac Kadiye ka tiriyay gabayo badan oo uu Soomaalida ku wacyi gelinayo midnimo isagoo ku dhiirri gelinayay in ay isku duubnaadaan isla markaana muujiyaan wadaniyaddooda.
Allaha u naxariistee abwaan Jaamac Kadiye ayaa u baxay safarro badan oo xagga dibadda ah kuwaasi oo uu kaga qayb galay bandhig dhaqameedyo uu kusoo bandhigay suugaan badan oo ku saabsan dhaqanka Soomaaliyeed.
Tacsida geerida abwaanka
Illaa hadda, waxaa dilka abwaan Jaamac Kadiya ka hadlay Ra’isul Wasaaraha Soomaaliya, Xamza Cabdi Barre oo ka tacsiyeeyay geerida abwaanka.
Xafiiska Ra’isul Wasaaruhu ma cabaareyn duqeynta sababtay geerida abwaan Jaamac Kadiye.