Waxay ahayd weedh gaaban, balse xambaarsan macne fog. Waxay ka digaysay qofka wax eegaya oo tirinaya waxyaabaha muuqda, balse iska indhatiraya xaqiiqada ugu muhiimsan ee meesha taalla. Waa qofka daraaseeya tirooyinka, magacyada iyo dhacdooyinka, laakiin seega geedka weyn ee hadhka bixinaya.

Kumannaan maqaal iyo qormo ayaan tan iyo maalintaas akhriyay; kuwo badanna aniguba waan qoray. Hase yeeshee, qormadii Kaaha Bari iyo cinwaankeedaas weli kama go’in xusuustayda. Weedhaasi mar kasta ayay maskaxdayda kusoo noqotaa marka laga hadlayo qiimeynta dowlad-dhiska Soomaaliya iyo sida loo fahmayo safarka dheer ee ay soo martay.

Siddeed iyo labaatan sano ka hor, waxay ahayd arrin aad u adag in qof Soomaali ahi rumaysto in dowladnimo lagu unkay meel ka baxsan xarumihii waaweynaa ee siyaasadda, oo xitaa geed hoostiis lagu bilaabay, ay maalin uun yeelan karto hay’ado, sharciyo iyo nidaam siyaasadeed shaqaynaya.

Rajadu way yareyd, shakiguna wuu badnaa.

Soomaaliya waxay ku jirtay burbur siyaasadeed iyo dagaallo daba dheeraaday. Muqdisho waxay ahayd goob colaadeed, dowladdii dhexe way burburtay, kooxo hubaysan ayaa ku loollamayay awoodda, waxaana adkayd in la qiyaaso in meel ka mid ah dalka ay ka dhalan karto hannaan siyaasadeed oo waara.

Haddana, 1-dii Agoosto 1998, waxaa la dhidbay aasaaska nidaam cusub oo markii dambe noqday mid ka mid ah tiirarka dib-u-dhiska dowladnimada Soomaaliya. Dastuurkii lagu unkay Puntland wuxuu noqday bilowgii tijaabo siyaasadeed oo weyn: in dowladnimo laga dhiso gudaha dalka iyadoo la adeegsanayo heshiis bulsho, hay’ado deegaan iyo nidaam federaal ah.

Waagaas, dad badan waxay ku soo koobi jireen su’aal keliya: “Aan aragno siday noqoto.”

Sababtoo ah xitaa qofka rajada qaba ma saadaalin karin in nidaam ka dhashay xaalad adag uu sii jiri karo muddo tobanaan sano ah, iyadoo weli ay socdeen dagaallo iyo khilaafaadyo siyaasadeed.

In meel ka mid ah Soomaaliya ay ka hanaqaaddo hay’ado shaqeeya, iyadoo caasimaddii dalku ay wali la tacaalayso burbur iyo colaado, waxay ahayd wax aan si fudud maskaxda qofka caadiga ahi u qaadan karin.

Maanta, 28 sano kadib, dowladnimadii geedka hoostiis lagu bilaabay waxay maraysaa marxalad kale. Waxay leedahay waayo-aragnimo siyaasadeed, hay’ado amni iyo maamul, doorashooyin, nidaam sharciyeed iyo taariikh dheer oo mudan in si dhab ah loo daraaseeyo.

Taasi macnaheedu ma aha in aanay jirin caqabado. Waxaa weli jira dooddo ku saabsan dimuqraadiyadda, hufnaanta maamulka, awood-qaybsiga, xiriirka dowladda federaalka iyo dowlad-goboleedyada, iyo sida loo dhisi karo nidaam ka jawaabaya rabitaanka shacabka Soomaaliyeed oo dhan.

Laakiin qiimeynta cilmiga ah waxay u baahan tahay in la eego waxa jira, ma aha oo keliya waxa maqan.

Haddii maanta qof doonayo inuu fahmo dowlad-dhiska Geeska Afrika, isagoo aan si dhab ah u daraaseyn waaya-aragnimada Puntland iyo Somaliland, wuxuu luminayaa qayb muhiim ah oo ka mid ah sheekada.

Wuxuu noqonayaa ninkii geedaha tiriyay ee quraca ka tagay.

The post Puntland oo 28 jirsatay: Dowladnimadii geedka hoostiisa ka bilaabatay ee hana qaaday appeared first on Kaab TV.

Sannadkii 2011 oo ay Turkey soo galeen Soomaaliya, waxaan ahaa wariye ka hawlgalaayay Muqdisho, waxaana marar badan kasoo warramay hawlihii gargaarka ay Turkida ka wadeen Muqdisho. Waa sannadkii lagu dhawaaqay inay macluul ka jirto Soomaaliya, ka dib markii tobanaan kun oo ruux ay gaajo u dhinteen, halka in ka badan 240,000 ruux oo barakac ah, ay soo galeen Xamar.

Waxaan tagay xeryihii Badbaado 1, Badbaado 2 iyo Rajo oo ahaa xeryihii ay dadka barakaca ku soo xaroodeen halkaas oo hay’adaha Turkida ay raashiin qeybin, daaweyn iyo kaalmo kale u fureen dadka baahan. Markii abaartii ay dhammaatayna waxay Turkidu billaabeen bixinta deeqo waxbarasho oo dhallinyarada dugsiyada sare ka baxday la siiyay, oo maanta dhallin badan ay kasoo aflexeen.

Turkida marnaba looma arki jirin faragelin, ee waxaa loo arkay dad dhex dhexaad ah, oo ka xor ah is-heysadka Soomaalida dhexdeeda ah. Deegaanka kasta waa ka hawlgaleen aqbalaadda dadku aqbalay darteed.

MAANTA wax kasta way is bedeleen. Turkida hadda waxay Soomaali badan u arkaan “gumeysi cusub” iyo dad “dano gaar ah wata”. Waxaana sabab u ah miisaan la’aanta siyaasadooda ku wajahan Soomaalida, iyo isku daygooda boobka kheyraadka dalka.

Weerarkii Koonfur Galbeed lagu qaaday, ee Xasan Sheekh u adeegsaday ciidan ay Turkey tababareen iyo qalab ay iyaga bixiyeen wuxuu qaawiyay magacii Turkida, wuxuuna uga sii daray tuhunkii hore looga qabay hawlaha Turkida ee Soomaaliya.

Arrinta Somaliland waxay iyana abuurtay shaki kale iyo neceb loo qaaday Turkida. Xitaa Puntland iyo Jubaland maanta waxaa Turkida lagu fiirinayaa indho shaki leh.

Waxaan oo dhan xukuumadda Ankara waxaa u keenay diblomaasiyadeeda kheyrul mas’uulnimada ee Soomaaliya oo halkii ay wax guud ku koobnaan lahayd daba eryatay dano shakhsiyaad.

Soomaalida asal ahaan waa dad qab weyn oo neceb dhaqanka jujuubka iyo is gumeysiga ku dhisan. Khilaafaadka qabaa’ilka oo asal ahaan salka ku haya colaadaha miyiga waxay abuureen in qabiiladu loollamaan. Marka Turkey ay koox taageerto looma arko inay dowlad taageertay, ee waxay dad badani u arkaan in qolo gaar ah la safan tahay.

Hadda waxaa la joogaa xilli ay xukuumadda Ankara is-daba qaban karto, oo ay sixi karto dhaqan-diblomaasiyadeedkeeda ay kula macaamisho Soomaalida si ay ugu yaraan u badbaadsato magaceeda waxa yar ee ka haray, intaysan xaajadu faraha ka bixin oo aan la arkin Turkey lagu dhex eryanaayo gudaha Soomaaliya.

W/Q Abdalle Ahmed Mumin

The post Turkey way ka baaqsan kartay fadeexadda diblomaasiyadeed ee kasoo wajahday Soomaaliya appeared first on Kaab TV.

Xubnaha guddiga ayaa ka kooban siddeed rag iyo haweeney. Dhammaantood waa reer Koonfur Galbeed.

Sida ay noo sheegeen mas’uuliyiin ku sugan Baydhabo waxaa la rajeynayaa in hawlaha doorashada KGS ku soo dhammaadaan muddo 10 maalmood oo ka bilaabata maanta.

Koonfur Galbeed waxay tallaabadan u cuskatay 142aad ee Dastuurka Federaalka iyo Dastuurka Dowlad Gobolleedka KGS.

Tani waxay ka dhigan tahay in KGS ay jiho u furtay cakirnaantana ka saartay hannaanka doorashooyinka federaalka ee Soomaaliya ee sannadka 2026, kuwaa oo shaki iyo sugnaansho la’aan badan uu hareeyay.

Dowladda Federaalka Soomaaliya ayaa riixeysay inay doorashooyinka iyada wada qabato, oo la hoos keeno guddigii uu horey u sameystay Madaxweyne Xasan Sheekh Maxamuud oo hadda waqtigiisu ka harsan yahay 53 maalmood ahna musharrax raba inuu xilka sii joogo.

Dowlad Gobolleedyada gaar ahaan Jubaland iyo Puntland ayaa diiday damaca Xasan Sheekh Maxamuud ee ah qabashada doorasho uu guddiga kaligiis sameystay, iyo tallaabooyinka ay ka mid ahaayeen bedellida dastuurka federaalka iyo qaadida hannaan doorasho oo aan heshiis lagu ahayn.

Dowlad gobolleedyada waxay caddeeyeen in damaca Xasan Sheekh uu ku qotomo waqti dheereysi uu rabo inuu ku sharciyeysto tallaabooyinka bedelidda dastuurka iyo sameysashada guddi doorasho oo isaga u gaar ah.

Hannaanka Federaalka Soomaaliya wuxuu ka kooban yahay shan (5) dowlad gobolleed iyo Gobolka Banaadir. Hadda waxaa Puntland iyo Jubaland ku soo biiray Koonfur Galbeed oo madaxweyneheedu toddobaadkii hore si cad u diiday bedellida Dastuurka Federaalka iyo qaadida doorasho aan heshiis lagu ahayn.

Tallaabada maanta ay qaaday Koonfur Galbeed ee ay ku magacawday guddi doorasho heer dowlad gobolleed wuxuu xaqiijinayaa in nooca doorasho ee Soomaaliya ka hirgali kara uu yahay midka dorashoyinka dadban oo heshiis lagu yahay, waana taas jidka ay hadda aaday KGS.

Puntland waxay doorashadeeda qabsatay sannadkii 2023, halka Jubaland ay qabsatay 2024. Labaduba waxay doorashada qabsadeen iyadoo Dowladda Federaalka aysan raali ka ahayn, ama ay si cad u diiddan tahay.

Hadda Dowladda Federaalka, sida ku cad wareegto uu shalay soo saaray Wasiirka Arrimaha Gudaha Cali Yuusuf Xoosh, waxay sidoo kale diidday in KGS ay qabsato doorasheeda, waxaana soo baxaya warar sheegaya in Wasaaradda Arrimaha Gudaha Federaalka ay dooneyso inay doorasho garab-yaac ah ku qabato magaalada Baraawe ee gobolka Shabeellaha Dhexe, halkaasoo toddobaadkii hore ay Dowladda Federaalka geysay ciidankeeda Haramcad iyo Gorgor, ka dib markii magaalada ay isaga bexeen ciidanka KGS.

Galmudug, oo aan illaa hadda hambalyeynin bedelidda Dastuurka Federaalka ee 4 Maarso 2026, iyo Hirshabeelle oo la sheegaayo in cadaadis siyaasadeed iyo mid amni uu kaga imaanaayo Villa Soomaaliya, ayaan weli la ogeyn jihada ay qaadi karaan.

Saddexda dowlad gobolleed ee KGS, Jubaland iyo Puntland waxay u dhigmaan aqlabiyad. Inay weli ku dheggan yihiin Dastuurka Federaalka ee 2012, iyo inay qaadeen jidka doorasho dadban oo ay dowlad gobolleedyada leeyihiin sharciyadda maamulka waxay ka dhigan tahay in doorashooyinka Soomaaliya ee 2026 ay noqonayaan kuwo ku saleysan nidaamka xulista ergada ee odayaal dhaqameedka, iyo in Dastuurka rasmiga ee dalku yahay kii 2012.

Maadaama ay qabaa’ilka iyo gobollada Soomaalida wax ku qeybsadaan nidaamka loo yaqaano 4.5, welina aan la helin xal kale oo looga guuro, dad badan ayaa qaba in habka doorashada dadban ee qabaa’ilka ay tahay tan kaliya ee isku heyn karta qabaa’ilka Soomaalida. Nidaamkan isaga ah ayaa door muhiim ah siinaya odayaasha beelaha.

The post Tallaabada KGS oo jiho u bixisay doorashooyinka Soomaaliya 2026 appeared first on Kaab TV.

Illaa hadda goobaha la beegsaday waa ku dhowaad 30 goobood. Waxaa ka mid ah hoyga iyo xafiiska Aayatolah Khamenei. Lama oga halkuu aaday wadaadka.

Waxaa kaloo la beegsaday xarunta taliska sirdoonka, iyo xafiisyada hoggaanka Ilaalada Kacaanka Qudus oo ay Mareykanka u yaqaanaan argagixiso caalami ah.

Rag sare oo Ilaalada Kacaanka Iran ee IRGC ayaa la sheegayaa inay dhinteen ama dhaawacmeen. Waase adag tahay in xog sugan laga helo gudaha Iran.

BILAWGA DUULAANKA IYO SABTI?

Weerarka oo shalay diyaarsanaa waxaa dib loogu dhigay inuu billawdo Sabtida oo ah maalinta ay xafiisyada soo galaan madaxda sirdoonka iyo kuwa dowladda Khamenei si loo wiiqo awoodooda, loona beegsado hoggaanka sare.

Weerarka waxaa laga billaabay dhanka koonfureed magaalada ku taalla Chabahar. Sababta waa in gantaalaha difaaca hawada ay halkaas yaalleen. Waana la burburiyay.

Intaas ka dib ayaa la garaacay fariisimaha caasimadda Tehran iyo magaalooyin kale.

Iran waxay hadda wajahaysaa qalabkeeda difaaca oo qaarkiis la burburiyay, iyo rasaasta gantaalaha cirka oo aad ugu yar.

Mareykanka iyo Israel waxay ciyaarayaan qorshe ah: in duqeymaha hawada lagu diciifiyo dhamaanba awoodda militari ee Iran, kadibna laga fekero in hawlgalo kooban laga fuliyo gudaha kuwaas oo lagu beegsanayo madaxda sare ee rijiimka.

HAL AAN HOREY U DHICI JIRIN

Marka Iran la duqeeyo sida badan jawaabteeda way soo daahi jirtay oo maalmo ayay qaadan jirtay, balse saaka rijiimka Iran saacado gudahood ayuu gantaalo ugu qeybiyay wadamada Khaliijka Carabta iyo xitaa Israel taas oo muujineysa in hadda aysan jirin wax #Iran ay xeerineyso iyo cid ay u aabo-yeeleyso toona, gaar ahaan goobaha rayidka ee ay beegsanayaan gantaalaha #Tehran ka imaanaya.

UJEEDKA MUXUU YAHAY?

Duulaankan waa ka duwan yahay kuwii hore oo markasta waqti kooban inta la duqeeyo xarumaha nukliyerka iyo kuwa ciidamada laga soo bixi jiray. Walow uu Madaxweyne ku Xigeenka Mareykanka sheegay inaysan dooneyn “dagaal daba dheeraada” oo Mareykanku ku lug yeesho.

Donald Trump wuxuu saaka hadal siiyay Wargeyska Washington Post wuxuuna sheegay in hawlgalkaan uu yahay mid “xorriyad” iyo “amni” looga dhigaayo Iran.

Balse, Raisul Wasaaraha Israel, Benjamin Netanyahu, ayaa farriin uu soo duubay ku sheegay in duqeymaha ay socon karaan illaa intaa loo baahan yahay, ama ay muhiim yihiin.

Tani micneheedu waa inuu jiro qorshe fog oo la doonaayo in looga fuliyo Iran; in marka hore la naafeeyo Khamenei iyo xukunkiisa, ka dibna lagu qasbo inay is dhiibaan ama cararaan, markaa ka bacdina dowlad shacbi looga dhiso Iran.

Su’aashuse waxay tahay: yaa u diyaarsan inuu qabto hoggaanka Iran. Ma jiro mucaarad mideysan, dalkana kuma noola oo waa hore ayaa qaar la dilay, qaarna ay carareen.

Dhanka kale, Xuutiyiinta Yemen ayaa ku dhawaaqay weerarro cusub oo ka dhan ah maraakiibta Badda Cas, taasoo ka dhigan in colaaddan ay si degdeg ah isu beddeshay mid gobol oo wejiyo badan leh.

(Muuqaalka waa saaka iyo Tehran oo toos ay gantaaladu ugu hoobanayaan).

The post FAALLO: DUQEYMAHA MAREYKANKA IYO ISRAEL EE IRAN appeared first on Kaab TV.

Kulankan kii ka horreeyay wuxuu ahaa kii ka dhacay Hotel Decale, ee xeyndaabka Garoonka Diyaaradaha Muqdisho, oo ujeedkiisu ahaa in xoogaa shakiga iyo kala aamin-baxa la isaga soo dhowaado, inkastoo kulankaas laf ahaantiisa aanu dhalin wax is aaminaad ah oo qolo kasta goonigeeda qado uga keensatay meelo kale.

Waxaa garab socday labo shir oo ay kala lahaayeen labada garab ee uu Baarlamaanka Federaalka u kala jabay, qarkana hadda u saaran in labo guddoomiye uu yeesho.

Xitaa iyada oo kulanka shalay uu ka dhacay Villa Soomaaliya ayaa fadqalo lagu sameeyay Madaxweynaha Jubaland oo qori BKM ah looga dhex xaday Villada, inkastoo naloo sheegay in qorigii lasoo heley.

KULANKA SHALAY

Daqiiqadihii shalay la fadhiyay Villa Soomaaliya lama gaarin isu soo dhowaansho labada arrin ee ugu weyn: waa beddelidda Dastuurka ku-meel-gaarka ah oo hal dhinac ah iyo qaabka loo qaban doono doorashada 2026.

Dhanka Golaha Mustaqbalka waxay ku adkeysanayaan go’aankoodii ay marar badan sheegeen ee ahaa in Dastuurku yahay kii 2012 oo isbeddel aan la isku raacsaneyn jiri karin, iyo in doorashadu noqoto hab la wada aqbalsan yahay oo aan cid gaar ah jeebka ku ridan karin.

Labadan arrimood Xasan waa ku dhib, mana uu rabo inuu fuliyo.

Marka la heshiin waayo, siyaasiyiinta Soomaalida waxay ku kala tagaan labo waxyaabood: in guddi la saaro iyo in dib la isugu soo laabto. Sidaas ayaana shalay kulankii ahaa lagu afmeeray.

Saaka oo Jimce ah dhanka Golaha Mustaqbalka waxay noo sheegeen inay dhankooda diyaariyeen xubnaha guddiga, ayna sugayaan dhanka Xasan Sheekh.

Ma rabo inaan ka hordhaco, laakiin waxaa iska muuqata in haddiiba arrimaha waaweyn aan tanaasul ka jirin, daacadnimo ay ka maqan tahay dhinacyada shiraya, inaysan natiijo kasoo bixi doonin.

MAXAA HADDABA LOO KULMAYAA HADDAAN LA HESHIIN KARIN?

Waa su’aasha ay qabaan dadka aan sida hoose ula socon shirarkan doorashada iyo khilaafka ka taagan Dastuurka iyo doorashada.

Xasanka Villada wuxuu leeyahay labo ujeeddo oo ah inuu helo fursad kasta oo lagu kala tagi karo, ka dibna eedda dusha u saaro dhanka Golaha Mustaqbalka.

Tan labaadna waa in waqtigu fogaado, oo marba dib loo dhaco intii ay u gaarto.

Dhanka Golaha Mustaqbalka oo ay ku jiraan Puntland iyo Jubaland waxay qabaan in si kasta oo Xasan irdaha marmarsiinyada looga soo xiri karo la sameeyo, oo waa taa ay Villada ugula kulmeen, iyo in la abuuro fursad doorashada tteendhada ku qabsoomi karto.

The post Rajo aad u yar oo laga qabo wada hadalka doorashada ee mucaaradka iyo Xasan Sheekh uga socda Muqdisho appeared first on Kaab TV.

Qormadaan gaaban waxaan uga hadli doonaa diyaaradaha, ujeedka wuxuu noqon karo iyo cawaaqibka ka dhalan kara.

1- Turkidu waxay isticmaalaan diyaaradda Mareykanku farsameeyo ee F16. Waa nooc diyaaradaha dagaalka oo Maryland, USA lagu farsameeyo, oo meel dhexe ah, badina waddamada Carabta way haystaan, oo Mareykanka ayaa ka iibiya.

Dhammaan waddamada laga iibiyay – oo Turkidu ku jiraan – waxay saxiixeen heshiis END-USER RESTRICTION AGREEMENT, oo reebaya:

(1) in waddan kale loo sii wareejiyo; (2) in ay isticmaalaan cid aan ahayn waddankii laga iibiyay ee u heysta shahaadada; (3) inaan lagu sameyn kari hawlgal ama dagaal aysan ogeyn dowladda Mareykanka.

Dhammaan qodobadaan waxay ka mid yihiin heshiisyada difaaca ee laga saxiixo ka hor intaan waddan laga iibin diyaaradaha iyo agabka kale ee militari. Turkey dhammaan qodobadaan way aqbaleen.

Xusuusin: Diyaaradda F16 waa ka duwan tahay drones-ka ay Turkidu iyagu sameystaan.

UJEEDKA F16 LA GEEYAY MUQDISHO

2- Turkidu waxay marmarsiinyo ahaan u adeegsadaan dagaalka Shabaab. Waxaa jira cabsi laga qabo in Shabaabka Xamar qabsadaan, taasoo walaac weyn ku haysa Saldhigga TURKSOM ee Muqdisho.

Iyada oo taas laga fiirinaaya waxay Turkidu ka codsan karaan Mareykanka in diyaaradaha F16 ay muddo kooban ka soo hawlgalaan Soomaaliya.

Waxaa kaloo jirta in Turkidu ay doonayaan inay shidaal iyo macdan qodis ka fushadaan gobollada koonfurta iyo bartamaha Soomaaliya, oo ay ku jirto shidaal baaris dhanka badda ah. Waa mashruuc kale oo dood ka tagan tahay, waxaana Turkida u arkaan inay maalgelinta ay Soomaaliya ku sameeyeen darteed xaq u leeyihiin inay shidaal iyo macaadinba qotaan.

Haddiise ay noqoto si abadiyan ah ay uga hawlgalaan Soomaaliya, taas waxay ka horimaaneysaa heshiiska End-User Restriction Agreement. Waxaana ka dhalan kara in Mareykanka qaado tallaabooyin (hoos ayaan ku sheegi doonaa tallaabooyinkaas).

SOMALILAND IYO DANAHA ISRAEL

3- Turkidu uma adeegsan karaan diyaaradahan wax ka baxsan inta iyaga amnigooda ku saabsan, ama dagaalka Shabaab ah. Haddiise ay dhacdo inay Soomaaliya ka codsato in loo adeegsado arrimaha Somaliland, tusaale: muranka hawada ee Muqdisho iyo Hargeysa ama la isku dayo in lagu carqaladeeyo danaha Israel waxay iyana jabineysaa heshiiskii iibka ee ay Turkey kula gashay Mareykanka.

Sidaa darteed diyaaradaha waxba uma tari karaan arrimaha hawada ee Soomaaliya, oo dabcan loo arko muran u dhexeeya Soomaalida (Hargeysa iyo Muqdisho).

Israel waxay aqoonsatay Somaliland 26kii Disembar 2025, taasoo ka dhigan in labada dhinac ay u wada dhaqmayaan sidii labo dowladood oo is la eg, waxaana ku jirta heshiisyada labada dhinac in Israel caawimaad siin karto Somaliland haddii lasoo weeraro. Taas waxay keeni kartaa isku dhac dhexmara Israel iyo Turkey (umase badna inay dhacdo).

DIYAARADAHA F35 ISRAEL VS F16 TURKEY

4- Halka ay Turkey ka adeegsato F16 (4th generation), waxay Israel haysataa F35 oo 5th generation ah (fiiri labada sawir ee hoose). Diyaaradda F35 nooca ay Israel sii hormarisay ee Adir, waxaa lagu tilmaamaa diyaarad awood badan, oo ka dhuuman karta raadaarka ay waddamo badan haystaan.

Marka ay joogto Carabta iyo Afrika oo dhan, waxay F35 fulin kartaa hawlgal iyada oo aan xitaa laga ogaan waddanka uu hawlgalkaasi ka dhacaayo. Waxay F35 awoodda inay xitaa soo riddo F16 haddii ay dagaal noqoto.

CAWAAQIBKA

5- Haddii ay dhacdo inay #Turkey ku xadgudubto heshiiska looga iibiyay diyaaradaha ee ay Mareykanka kula jirto, waxay horseedi kartaa dhowr tallaabo oo waddanka ka iibiyay uu qaadi karto:

A) In heshiiska la buriyo, oo aan diyaarad dambe laga iibin, isla markaana loo diido qalabka dayactirka diyaaradaha ay hadda haystaan

B) In Mareykanka dalbado in qalabkii uu iibiyay loo soo celiyo maadaama heshiiskii lagu xadgudbay.

C) In cunaqabateyn lagu soo rogo Turkey taas oo sii adkeyn karta dhismaha ciidamadiisa.

W/Q: Abdalle Ahmed Mumin

The post Turkey oo F16 Geeyay Muqdisho; Danaha Somaliland iyo Israel iyo cawaaqibka ka dhalan kara appeared first on Kaab TV.

Warkaasi oo ku qornaa af-Ingiriis ayaa lagu xusay magacyada mas’uuliyiintan kala ah:
Wasiirka Maaliyadda Soomaaliya, Biixi Imaan Cige; Ku-xigeenka Ra’iisul Wasaaraha, Saalax Axmed Jaamac; Dr. Cabdullaahi Maxamed Odowa; iyo Wasiirka Arrimaha Dibadda Somaliland, Cabdiraxmaan Daahir Aadam, iyadoo lagu eedeeyay inay ahaayeen xubno ku lug lahaa arrintaas.

Dhammaan mas’uuliyiintan ayaa dhalasho ahaan kasoo jeeda Somaliland.

Wax yar kaddib markii qoraalkaasi ka soo muuqday internetka, xubno ka tirsan wasiirrada Dowladda Federaalka ee fadhigoodu yahay Muqdisho ayaa bilaabay inay ku faafiyaan WhatsApp qoraal af-Soomaali ah oo ah tarjumaad kooban. Qoraalkaasi wuxuu sheegayay in: “Warbixintani ay shaqsiyaadkan ku tilmaantay dadkii muhiimka ahaa ee ka shaqeeyay in Somaliland la aqoonsado, isla markaana si dhow ula socday dhammaan wada-xaajoodyadii u dhexeeyay Hargeysa iyo Tel Aviv.”

Faafinta qoraalkan — oo aan annaguba si toos ah u aragnay — waxaa lagu bixinayay lacag si loo baahiyo. Waxaa si qeybinaayey labo wasiir oo ka tirsan Xukuumadda Soomaaliya iyo qof ka tirsan Xafiiska madaxtooyada Soomaaliya ee Villa Soomaaliya.

Markii aan aragnay baahinta qoraalkan, waxaan bilownay baaritaan madax-bannaan si aan u hubinno: Ma jiraa wargeys la yiraahdo Israel Mirror? Yaase iska leh? Ma yahay warbaahin la iaamini karo?

Waxaan qormadan kuugu soo gudbinayaa macluumaadkii aan ku ogaannay baaritaan ku saleysan ilaha furan ee saxaafadeed (Open-Source Journalism).

MAXAY TAHAY ISRAELMIRROR.COM?

• Dalka Israa’iil kama jiro wargeys la yiraahdo Israel Mirror. Marka internetka laga baaro, lagama helo diiwaan rasmi ah oo warbaahin ah, sida cinwaan la yaqaan, xafiis, ama lambar boosto (postal address) oo ku tusin kara jiritaanka warbaahin macageedu yahay Israel Mirror.
• Website-kani israelmirror.com ma isticmaalayo domain-ka Israa’iil (.il) sida lagu yaqaano warbaahinta fadhigewedu yahay Israa’iil, inkasta oo uu sheeganayo inuu yahay warbaahin Israa’iili ah.
• Mareegtu ma laha qayb xiriir (Contact) oo qeybta xiriirka waa maran tahay oo waxba kuma qorna. Haddii aad horey u gasho websitekan, waxaa uu kuu leexinayaa website kale oo ay leeyihiin shirkad Hindi ah kyrionmedia.com
• Kyrion Media waxaa ugu qoran website-kooda inay iyagu leeyihiin in ka badan 150 website, oo uu ku jiro israelmirror.com. Waxay kaloo sheegaan inay yihiin shirkad xayeysiin oo qormooyin PR (Public relation) faafiyaan, kuna qaadata lacag u dhexeysa $300 ilaa $750 — taasoo si cad u muujineysa in qormada la faafiyay ay ahayd qormo lacag lagu bixiyay, ee aan ahayn war saxaafadeed oo ku saleysan xaqiiqo.
• Goor dambe oo shalay [Sabti 4 Jannaayo) oo ah 24 saac ka dib markii ay qormada faafiyeen ayay isla qormadii Israelmirror.com ku jirtay ku soo dareen “afeef” sheegaysa in qoraalkan uu yahay mid lacag lagu siiyay “oo aysan caddeyn karin sheegashooyinka ku jira qormadooda”

• Website-ka Israel Mirror ma laha magacyo qorayaal ama saxafiyiin, taasoo ka hor imaaneysa hab-dhaqanka warbaahinta saxda ah, halkaas oo maqaal walba uu leeyahay qoraa la aqoonsan karo.

• Inta badan qormooyinka website-kan ku jira waa kuwa meel kale laga soo min-guuriyay (copy-paste).

GOORMA AYAA LA SAMEEYAY WEBSITE-KA?

• Waxaan baaray diiwaanka domain-ka www.israelmirror.com, waxaana ogaanay in domain-ku markii ugu horreysay hawada soo galay 2018, sida ku cad diiwaanka shirkadda GoDaddy ee bixisa adeegga martigalinta mareegaha internet-ka.

• Inkasta oo website-ku sheeganayo inuu yahay Israa’iili, haddana IP-ga internetka wuxuu ku yaallaa California, Mareykanka.

• Qaybta “xiriirka” ama “About Us”, website-ku wuxuu sheeganayaa inuu ka hawlgalo America, Europe, Asia, and Australia, balse marna ma xuso Israa’iil — taasoo mar kale caddeyneysa in sheegashada ah “warbaahin Israa’iil laga leeyahay” ay tahay been abuur cad.

BAARITAANKA QORMADA LA FAAFIYAY

• Kadib waxaan baaritaan ku sameynay qormada lafteeda, waxaana si 100% ah u xaqiijinay in qormada ay diyaarisay mashiin AI ah, sida ay muujisay baaritaanka lagu sameeyay madal furan oo lagu magacaabo Justdone.com.

• Qormada oo loo ekaysiiyay sheeko war ah waxay ka buuxdaa khaladaad naxwe, eray-isticmaal, iyo xog sugnaan la’aan, taasoo astaan u ah qoraallo badan oo ay soo saarto AI.

• Tusaale ahaan, hordhaca qormada ayaa sidan u qornaa:  “HARGEISA, SOMALILAND — Waddooyinka Hargeysa ayaa noqday bad buluug, caddaan, iyo cagaar ah, iyadoo kumanaan qof oo reer Somaliland ah isugu soo baxay si ay u dabaaldegaan xilli saddex sanood la sugayay. Ka dib markii Israa’iil ay go’aan taariikhi ah ka gaartay inay si rasmi ah u aqoonsato Somaliland sidii dal madax-bannaan, jawiga caasimadda waxaa ka muuqda farxad iyo guul la dareemi karo.” 

Halkan jumladda waxay u hadlaysaa sida in Hargeysa tahay magaalo xeebeed bad leh. Mana aha oo Hargeysa, caasimadda Somaliland waa magaalo waddanka gudihiisa jirta oo aan bad lahayn. Sidaa awgeed ku halqabsiga “bad buluug ah” waa jabnaan iyo naxli ka iman kara mashinka AI-da.

• Khalad kale oo weyn ayaa ahaa in Ra’iisul Wasaare Ku-xigeenka Soomaaliya, Saalax Axmed Jaamac, lagu tilmaamay ra’iisul wasaare ku-xigeen hore, inkasta oo uu xilka hayo waqtigan — taasoo ah qalad inta badan ka yimaada qoraallada ay diyaariyaan AI-da.

• Guud ahaan, qormadu ma lahayn wax tixraac (references) ah, mana jirin caddeyn lagu xoojinayo eedeymaha culus ee lagu sheegay in mas’uuliyiin Soomaaliyeed ay fududeeyeen aqoonsiga Somaliland. Lama sheegin cidda bixisay xogta, halka ay ka timid, ama sida loo xaqiijiyay.

Qormada la faafiyay waa mid been-abuur ah, lacag lagu bixiyay, AI-na diyaarisay, laguna faafiyay si ula kac ah, iyadoo loo adeegsanayo shakhsiyaad xilal sare haya, taasoo halis ku ah xaqiiqada, wacyiga bulshada, iyo kalsoonida warbaahinta.

The post Sida qormo AI ah oo lacag lagu bixiyay loogu adeegsaday marin-habaabinta aqoonsiga Somaliland ee Israel appeared first on Kaab TV.

1) Waa Maxay Aqoonsi?

Aqoonsi (Recognition) marka laga hadlayo xiriirka caalamiga ah, waa marka dal uu si rasmi ah u qirto in hay’ad ama dhul kale uu buuxiyay shuruudaha dalnimo ama uu leeyahay dowlad sharci ah, isla markaana uu diyaar u yahay inuu ula macaamilo sida dal ama dowlad rasmi ah.

Aqoonsigu waa marka dal uu si rasmi ah u aqbalo dal kale inuu yahay dal madax-bannaan. Aqoonsiga ka bacdi waxaa xiga tallaabooyin sida in safiiro la is dhaafsado, iyo safaarado labada dhan ah.

2) Aqoonsigu ma Go’aan Siyaasi ah baa Mise Waa Wax Kale?

Aqoonsigu waa GO’AAN SIYAASI ah, oo ay dowlad gaarto. Waxaa fuliya ama meelmariya waaxda siyaasadda ama xukuumadda ee dalka wax aqoonsanaya.
KIISKA SOMALILAND: Xukuumadda Israa’iil ee uu hoggaamiyo RW Netanyahu ayaa ka mas’uul ah go’aanka siyaasiga, iyada ayaana ku dhawaaqday.

3) Qaramada Midoobay ma Diidi Kartaa Haddii Dal uu Aqoonsado Dal Kale?

Maya. Qaramada Midoobay kuma jirto waajibabyadeeda shaqo inay diido, ogolaato go’aan siyaassadeed oo dal kale gaaray.

Tusaale: UK, France, Canada, iyo illaa 130 waddan ayaa aqoonsaday Falastiin, laakiin USA iyo Israaiil ayaa diiday, haddana lama joojin, oo sidaas ayay ku meelmartay.

4) Maxaa Tallaabo ah oo QM Qaadi Kartaa Haddii Dal la Aqoonsado, Laakiin dowladaha kale ay Diidaan?

Waxba. Kaliya waxaa furan in kulan la qabto, oo la cambaareeyo sidii dhacday labo habeen ka hor oo 14 waddan ay cambaareeyeen kiiska aqoonsiga Somaliland. Laakiin lama cunaqabateyn karo, mana jirto ganaax ama ciqaabo kale oo ka dhalanaya in dal QM ku jira, sida Israa’iil, uu aqoonsado dal kale, sida Somaliland — xitaa haddii Soomaaliya oo ku jirta QM ay diiddo.

5) In Dal la Aqoonsado iyo inuu Xubin ka Noqdo QM Maxay ku Kala Duwan Yihiin?

Waa labo arrimood oo aan shaqo isku lahayn. Marka dal cusub la aqoonsado, sidiisa ayuu dal ku yahay, laakiin inuu ku biiro QM waxay u baahan tahay: (1) inuu soo codsado xubinnimo (application); (2) in xubnaha Golaha Amniga oo 15 xubnood ah ay u codeeyaan oo ugu yaraan 9 waddan ay aqbalaan; (3) in golaha guud ee QM la geeyo, oo 2/3 xubnaha guud oo ah 193 waddan ay u codeeyaan, taasoo ka dhigan in 129 cod ay tahay inay “HAA” ugu codeyso.

Haddiise xubnaha 5ta waddan ee haysata Diidmada Qayaxan (Veto) ee Golaha Amniga uu mid ka mid ah “VETO” ku diido ka doodista codsiga xubinnimada waddanka cusub, sidaas ayuu codsiga ku burburayaa. Loomana gudbinaayo codsiga xubinnimada Golaha Guud.

6) Waddan Xor ah oo Dowlad Haystaa oo aan ku Jirin QM ma Jiraa?

Haa. Falastiin waa dowlad la aqoonsan yahay oo safaarado ku leh caalamka, mana haysato xubin buuxda oo QM ah. Kaliya waxay Falastiin ku fadhidaa QM sida “korjoogto” ama “observer” ahaan.

Sidoo kale, Taiwan, Kosovo, iyo Western Sahara ayaan ku jirin QM laakiin waa waddamo ay dowlado aqoonsadeen, adduunkana ku leh matalaad.

Gunaanad, aqoonsiga Israa’iil ee Somaliland waa rasmi marka lagu fiiriyo curfiga diblomaasiyadda caalamiga, waana “VALID”. Meel looga noqdo ma jirto illaa ay Israa’iil iyada ka noqoto ama Somaliland laf ahaanteeda ay ka tanaasusho ka gooni noqoshada Soomaaliya.

W/Q: Abdalle Ahmed Mumin

The post AQOONSI YAA BIXIN KARA? – QORMO GAABAN appeared first on Kaab TV.

Aqoonsiga Jamhruuriyadda Somaliland ma aha oo kaliya go’aan siyaasadeed; ee waa qirasho akhlaakhi ah oo taariikheed, naf huritaan, iyo xuquuqda guud ee ay dadka u leeyihiin inay ku noolaadaan nabad iyo karaamo.

Marka bulshooyinka loo oggolaado inay go’aamiyaan mustaqbalkooda siyaasadeed iyagoo adeegsanaya habab nabad iyo dimuqraadi ah, natiijadu waxay inta badan noqotaa xasillooni guud oo weyn, colaadaha oo yaraada, iyo iskaashi xooggan oo dhexmara derisyada.

Marka aan sidaas leeyahay uma hadlaayo sidii qof bannaanka ka yimid ee waxaan ahay qof ku dhashay gudaha Soomaaliya oo ku soo koray xilligiiyadii ugu naxdinta badnaa ee 1990-meeyadii. Waxaan si toos ah u arkay rabshadihii, burburkii dawladda, iyo dhibaatadii loo geystay dadka rayidka ah. Waa xilligaas markii ay Somaliland ka baxday midowgeedii ay la gashay Soomaaliya, ka dib xasuuqii naxariis darrada ahaa ee ay u geysteen ciidamadii Soomaaliya.

Waaya-aragnimadaasi waxay i bartay shakhsiyan macnaha dhabta ah ee cadaalad darrada. Waxay sidoo kale qaabeeyeen aaminsanaantayda aan aaminsanahay in aan bulsho lagu qasbin inay ku sii jirto nidaam siyaasadeed oo u horseeday rabshado joogto ah iyo xuquuqdooda oo loo diido.

Gobolkeenna, Geeska Afrika, wuxuu u baahan yahay xasillooni. Maanta kooxaha argagixisada, kooxaha dambiilayaasha ee abaabulan, masiibooyinka cimilada, iyo amniga cuntada oo sii xumaanaya ayaa khatar weyn ku haya nolosha dadkeenna.

Soomaaliya waa inay qirtaa oo ay aqbashaa qaranimada Somaliland. Dhammaanteen waan ogayn in tani ay imanayso – in maalin uun Somaliland ay xor noqon doonto ugu dambayntiina tii ayaa timid.

Muqdisho waa inay soo dhaweysaa oo ay ugu hambalyeysaa Somaliland tallaabadan muhiimka ah ee aqoonsiga. Dadka reer Somaliland waa walaalaheenna, ma aha cadowgeenna. Waxaan wada qabsan karnaa waxyaabo badan oo wanaagsan iyada oo loo marayo is-ixtiraam iyo wadahadal dhexmara Muqdisho iyo Hargeysa. Labada dhinacba waa inay furaan albaabka wada-shaqeynta wax dhisaysa, iskaashiga gobolka, iyo mustaqbal lagu dhisay wada-noolaansho halkii la is inkiri lahaa.

Aqoonsiga Somaliland ma tirtiraayo taariikhda ay wadaagaan DADKEENNA – taariikhda ku salaysan ehelnimo iyo walaalnimo; Tani waxay u oggolaan doontaa labada shacab inay hore u socdaan iyagoo sharfan oo hadaf cad leh.

Mar labaad, anigoo ah qof ka soo jeeda bulsho la kulantay dulmi, waxaan si adag u aaminsanahay inay tahay xuquuqda dad kasta, qaran kasta, iyo waddan kasta inuu yeesho go’aan-qaadasho.

Nasiib wacan iyo hambalyo Dadka #Somaliland!

The post ARAGTI: Sababta Aqoonsiga Somaliland uu Muhiim ugu yahay Nabadda, Amniga, iyo Caddaaladda Geeska Afrika appeared first on Kaab TV.

Haddaba dadkaasi ma usoo bexeen doorashada? Sideese loo codeeyay?

Warbixintaan waxaan ku soo koobayaa xog ururin, wareysiyo iyo indha-dheyn aan ku sameynay goobaha codeynta qaarkood, wariyaasha goobta tagay, qaar loo diiday, xubno ku dhow guddiga lagu muransan yahay, shaqaale dowladda iyo mas’uuliyiin ku sugan Muqdisho.

Guud ahaan maanta magaalada Muqdisho waxay ku jirtay Bandow. Waxaa la xayiray isku socodka dadka, gaadiidka shacabka. Waxaa xirnaa dhammaan ganacsiyada iyo suuqyada. Waxaa kaloo la xiray Garoonka Diyaaradaha Aadan Cadde oo joojiyay dhammaanba duullimaadyada gudaha iyo dibadda.

Waxaa cakirnaa nolosha dadka, oo waxaa xitaa dadku ay awoodi waayeen inay suuqyada kasoo helaan cuntada daruuriga ah. Xayiraaddan oo saameyday nolosha dadka masaakiinta waxay kaloo ciriiri gelisay qulqulka dhaqaalaha iyo ganacsiga oo maanta kaliya khasaare malaayiin ah uu soo gaaray.

Isu socodka oo xirnaa darteed waxay celisay dad badan oo laga yaabo inay doorashada tagi lahaayeen, iyo warbaahinta xorta ee dooneysa inay si madax-bannaan u tabiso codeynta.

Xayiraadda Warbaahinta

Saxaafadda xorta ayaa ugu horreynba laga hor istaagay in si iskeed ah ay uga soo warranto goobaha codbixinta loo asteeyay. Wariyaasha aan la hadalnay waxay noo sheegeen in markii la aqoonsaday inay si naqdi ah wax uga qoraan xukuumadda Xasan Sheekh Maxamuud loo diiday inay helaan kaarka warbaahinta ee doorashada. Taas bedelkeeda waxaa baraha bulshada lagu arkay dhallinyaro baraha bulshada caan ka ah oo sita kaarar ay ku qoran tahay “saxaafadda” oo baraha Tiktok, Facebook iyo YouTube ku buunbuuninaya doorashada.

Falka noocan ah wuxuu dilayaa kaalinta suxufiyiinta xorta ah iyo warbaahinta ee korjoogteynta codbixin – haddiiba ay tahay mid dadku u dhan yihiin – iyo in la helo aragtiyo kala duwan.

Saameynta daran ee ay kooxaha baraha bulshada ka ol’oleeya (influencers) ku yeesheen doorkii warbaahinta ee isla xisaabtanka iyo soo bandhigidda khaladaadka dowladda ayaa hadda la dareemayaa, waxaana adag in bulshada hesho il wareed sugan maadaama la xayiray warbaahinta xorta ah taa bedelkeedana ay dowladdu lacag ku bixineyso dhallinyarada baraha bulshada ka amaana mas’uuliyiinta.

Waa laga wada og yahay in doorashadan tahay mid lagu muransan yahay. Isbahaysiga mucaaradka iyo dowlad gobolleedyada Puntland iyo Jubaland ayaa bayaan kasoo saareen Kismaayo 20 Disembar ku sheegay in doorasho aan loo dhameyn natiijadeeda aan la aqbali doonin. Waxay isbahaysiga Golaha Mustaqbalka Soomaaliyeed sheegeen in 20 Jannaayo 2026 ay billaabi doonaan diyaarinta doorasho kale oo lagu soo xuli doono xubnaha Baarlamaanka 2026 taasoo dabcan ka horimaaneysa doorashada maanta Muqdisho uu ka sameeyay Xasan Sheekh Maxamuud.

Sidee Maanta Codeynta u Dhacday?

Wuxuu qorshuhu ahaa 16 degmo ay ka dhacdo doorashada. Marka laga reebo xarumaha degmooyinka, waxaa suuragali waayey oo dad ay iman waayeen badi goobihii loo asteeyay codeynta. Degmooyinka Shangaani, Shibis, Kaaraan, Wadajir, Hawlwadaag, Wardhiigley, Dharkeenley iyo Dayniile ayaa goobo tiro yar laga soo baxay.

Xukuumadda Xasan Sheekh oo si weyn u riixeysay doorashadan ayaa shaqaalaha dowladda ku qasabtay inay safafka galaan. Waxaana ugu horreeyay shaqaalaha Maamulka Gobolka Banaadir, iyo askarta taliska nabadsugidda iyo booliska oo safafka galay iyaga oo iska dhigaya cod-bixiyaal shacab ah.

• Degmada Shangaani waxaa codka ka dhiibatay 120 ruux, waxaana la xiray xarunta degmada oo ahayd goobta codbixinta abaare 2:00pm waqtiga Muqdisho
• Degmada Dayniile waxaa dadku iman waayeen xarunta Gurmadac. Halka xarunta Iskuulka Al-Amal, Ilays, Barwaaqo, Al-Marwaas, Daaru Salaam, Daaru Xikma ay wadar ahaayeen ka codeeyeen 24 qof.
• Degmada Wadajir: illaa 100 qof ayaa ka codeysay
• Degmada Shibis guud ahaan 54 ruux ayaa ka codeysay oo ay ku jiraan 12 ruux oo Jaaliyadda Yemen ah, iyo 42 xarunta Degmada Shibis oo ay ku jiraan shaqaalaha Maamulka Degmada Shibis.
• Xarunta Golaha Murtida iyo Madaalada: Waa goobta ugu badan ee ay tageen shaqaalaha dowladda, saraakiisha ciidanka nabadsugidda iyo sirdoonka, booliska maadaama ay ku taallo aagga madaxtooyada. Waana halka ay tirada ugu badan ka codeysay, ooay dowladdu sawirro badan kasoo qaaday u adeegsatay ka badbadinta tirada cod bixiyaasha.

Waxaa Iyana jira is diidooyin kale.

Ra’isul Wasaare Xamse Cabdi Barre ayaa maanta sheegay inuusan codeyn doonin maadaama uu kasoojeedo Kismaayo, sidaasi darteedna aysan Muqdisho ahayn deegaan doorashadiisa. Hase ahaatee waxaa maanta la arkay Raisul Wasaare ku Xigeenka Saalax Jaamac oo kasoo jeeda Hargeysa iyo Wasiirka Arrimaha Gudaha, Cali Yuusuf Xoosh oo kasoo jeeda Garoowe oo labaduba ka codeynaya Muqdisho.

Haddii Raisul Wasaaruhu diiday inuu Muqdisho ka codeeyo, side ayuu xeerka doorashada ugu ogolaanayaa wasiiradiisa?

Xeerka doorashada ayaa sidoo kale sheegaya in doorashada dowladaha hoose diyaarinteeda la bilaabo saddex bilood ka hor taasoo hadda khilaafsan sida lagu qabtay doorashadan oo muddo labo toddobaad ah lagu sameeyay.

Ma jirin ol’ole doorasho iyo tartan furan oo musharrixiin kala duwan ay ka qeybgaleen waayo mucaaradka way diideen. Guddiga lagu muransan yahay ayaa sheegay in 20 urur siyaasadeed ka qeybgaleen doorashada. Balse dadka falanqeeya arrimaha siyaasadda ayaa sheegaya in badi ururrada ay yihiin isku xisbiga madaxweyne Xasan Sheekh oo magacyo kala duwan la baxay.

Dadka aan wareysannay – oo ay ku jiraan kuwa codeeyay – ma aaminsana in doorasho sax ah ay dhacday, mana filayaan in doorasho xalaal ah ay waligeed ka dhici karto Soomaaliya. Waxayna u sababeynayaan ku tumashada sharciga iyo awood sheegasha muddada dheer ka jirta dalka.

Warbaahinta, kuwooda tirada yar ee bannaanka awooday inay ka tabiso dhacdada doorashada, waxay soo bandhigeen cabashada waayeello lasoo afduubay oo si qasab ah lagu keenay goobaha codbixinta, waxaana ka mid ahaa nin oday ah oo Xamar Weyne ku sugnaa.

Waxaa kaloo jirtay muuqaal si hoose lagu heley oo muujinaya koox dadka barakacayaasha Muqdisho ah oo baabus bus ah lagu soo guray oo loogu goodinaayo inay yeelaan wixii loo tilmaamo, waxaana qofka baabuurka waday uu lahaa “baabuurkaan dowladda soo kireysay” taasoo loo qaadan karay inuu ula jeedo xisbiga dowladda ee Caddaaladda iyo Wadajirka ee JSP.

Dhacdada maanta kaliya ma abuureyso sii kala fogaansho qeybaha siyaasadda, ee waxay horseedeysaa in dadweynuhu ka aamin baxo doorashada, loona qaato in doorashadu fal khiyaano ah, maadaama ay maanta dadku arkeen in iyadoo ol’ole jirin, heshiis jirin, magaalada Bandow tahay, haddana hal koox kaligeed ay sameysatay doorasho kaligeed ay sii ogtahay natiijada.

The post Doorashada Muqdisho: Bandow, xayiraad iyo cod-bixiyaal lagu muransan yahay tiradooda appeared first on Kaab TV.