KISMAYO (KAAB TV) -Wasiirka Gaashaandhigga Soomaaliya, Cabdulqaadir Maxamed Nuur oo ay wehliyaan Taliyeyaasha Ciidamada Milateriga iyo Booliska ayaa maanta oo Talaado ah booqday saldhigyada howlgallada ee Buulo-Xaaji iyo Xarboole ee gobolka Jubbada Hoose.
Booqashadan ayaa ku soo beegantay kadib markii ay ciidamada xoogga dalka iyo kuwa Jubbaland ay ku guuleysteen soo afjaridda 100 ka tirsan maleeshiyada Al-Shabaab oo isku dayay in ay cagta mariyaan saldhigyadaas istiraatiijiga ah.
Ra’iisul Wasaare Xamza Cabdi Barre oo uu wehliyo Madaxweynaha Jubbaland Axmed Maxamed Islaam ayaa sidoo kale booqday deegaanka si ay ugu kuur galaan xaalada deegaanka, waxa uuna bogaadiyay dadaalada ay wadaan ciidamada xoogga dalka iyo kuwa Daraawiishta Jubbaland. Howlgalka ayaa guul-darro weyn kasoo gaaray maleeshiyada Al-Shabaab iyadoo si hufan looga fal-celiyay ciidamada.
Intii uu booqashada ku guda jiray Ra’iisul Wasaare Barre ayaa bogaadiyay geesinimada iyo naf-hurnimada ciidamada Soomaaliyeed. Isagoo aqoonsan dadaalkooda, wuxuu ku dhawaaqay abaal-marin lacageed oo la siinayo cutubyada ciidamada, isagoo qiray doorka muhiimka ah ee ay ku leeyihiin ka-hortagga weerarka iyo sugidda saldhigyada.
Booqashada mas’uuliyiinta ugu sareysa dowladda ayaa lagu sheegay in ay hoosta ka xariiqeyso sida ay dowladda uga go’an tahay taageeridda iyo qirashada ka qeyb qaadashada ciidamada qalabka sida ee dagaalka ka dhanka ah argagixisada.
Waxa ay sidoo kale ka tarjumaysaa dadaallada socda ee lagu xoojinayo amniga iyo xasilloonida gobolka iyada oo ay sii socdaan caqabadaha kooxda.