Baydhabo (KAAB TV) -Kooxo hubeysan ayaa xalay weerar bambaano ah ku qaaday guri ay dagan yihiin saraakiil ka tirsan ciidamada ammaanka Koonfur-galbeed ee ku sugan Baydhabo, iyadoo ay ku dhaawacmeen dhowr qof, sida ay sheegeen dadka deegaanka.
Inta uu socday weerarka ayaa waxaa ku sugnaa Saraakiisha Nabad Suggida ee la beegsaday, oo ka dhacay xaafado ka tirsan Magaalada. Inkastoo aan la soo sheegin khasaare dhimasho iyo dhaawacba leh, haddana xubno ka tirsan qoyska iyo ilaalada ayaa ka mid ah dadka ku dhaawacmay shilkaasi.
Al-shabaab ayaa sheegatay mas’uuliyadda weerarka, iyadoo Al-shabaab ay sheegtay inay la eegteen guryaha saraakiil sar-sare.
Iyadoo laga jawaabayo weerarka, ciidamada ammaanka ee Baydhabo ayaa saaka oo Arbaca ah howlgallo raaf ah ka sameeyay xaafaddaas. Hase yeeshee ma jirto cid lagu soo qabtay howlgalkaasi.
Magaalada Baydhabo oo ay marar badan khataro kala kulmaan Al-shabaab ayaa waxaa ku nool ku dhawaad 600,000 oo barakacayaal ah, kuwaasoo intooda badan ay ku qasbanaadeen inay ka barakacaan deegaannadii ay ku noolaayeen colaadaha iyo abaaraha jira, sida ay sheegtay Qaramada Midoobay.
Sanadkii la soo dhaafay Al-Shabaab ayaa go’doomin todobaad qaatay ku soo rogay magaalada Baydhabo, iyagoo ka jaray saadka u soo geli jiray magaalada Baydhabo, ka hor inta aan ugu dambeyntii laga qaadin go’doominta.