HARGEYSA (KAAB TV) -Maamulka Somaliland ayaa digniin culus soo saaray, isagoo caddeeyay inay ka go’an tahay inay gobolka Sanaag ka difaacaan cid kasta oo khatar ku ah xasilloonida iyo ammaankiisa. Baaqan ayaa daba socda go’aan ka soo baxay Golaha Wasiirada oo shir deg deg ah yeeshay.
Go’aankan ayaa lagu sheegay in dadka reer Sanaag ay ku naaloonayeen nabad iyo xasillooni dheer. Si kastaba ha ahaatee, Golaha Wasiirradu waxay walaac ka muujiyeen “soo ifbaxa kooxo abaabulan” oo loo arko inay khatar ku yihiin nabaddan, gaar ahaan Somaliland oo isu diyaarinaysa doorashooyinkeeda soo socda. Qaraarka ayaa hoosta ka xariiqay go’aanka dowladda ee ah in doorashadu ay ku qabsoonto waqtigeeda oo aan carqaladeyn.
“Xukuumadda Somaliland waxay wacad ku martay inay ilaalinayso nabadda iyo nabadgelyada gobolka Sanaag, iyadoo kaashanaysa shacabkeeda,” ayaa lagu yidhi Qaraarka. Somaliland ayaa sidoo kale ku boorisay bulshada ku dhaqan gobolka Sanaag inay ka feejignaadaan dadka doonaya inay wax u dhimaan midnimadooda iyo nabadooda. Qaraarka ayaa ku dhiirigeliyay dadka deegaanka in ay ka hortagaan isku day kasta oo lagu hurinayo colaad ama xasilooni darro gobolka.
Marka laga soo tago ka hadalka tabashooyinka gudaha, Somaliland waxay sidoo kale ka dhawaajisay cabsida ay ka qabto ciidamada Masar ee dhowaan yimid Soomaaliya, iyagoo ku tilmaamay “khatar amni oo suurtagal ah”.