MUQDISHO, Soomaaliya, 4 Oktoobar, 2024 – Ururka Suxufiyiinta Soomaaliyeed (SJS) waxa uu soo dhaweynayaa sii deynta wariye Luqmaan Sheekh Cabdullaahi Keeroow, fiidnimadii Jimcaha 4-ta Oktoobar. In ka badan 24 saacadood ayuu ku xirnaa xabsiga NISA ee magaalada Luuq ee gobolka Gedo, Soomaaliya.
Abaare 4:00 galabnimo ee xilliga Soomaaliya Khamiis, Oktoobar 3, 2024, Wariyaha Idaacadda Arlaadi Luqmaan Sheekh Cabdullaahi Keerow ayaa lagu xiray xabsiga NISA ee magaalada Luuq. Xarigga weriyaha ayaa daba socday qoraal uu soo dhigay bartiisa Facebook-ga oo uu ku shaaciyay “in dhawaan loo magacaabi doono taliyaha cusub ee nabadsugida magaalada Luuq” sida uu SJS u sheegay agaasimaha shabakadda warbaahinta Arlaadi Cabdiraxmaan Jeylaani.
Sida ay sheegayaan wariyaha iyo ilo kale oo gobolka ku sugan, Luqmaan ayaa waxaa u yeeray taliyaha NISA ee magaalada Luuq, C/raxmaan Saxane, waxaana lagu amray inuu yimaado xafiiska NISA maanta oo Khamiis ah. Markii uu yimid, ayaa waxaa wax laga weydiiyay halka uu ka yimid xilkiisa, ee ku aadan magacaabista Taliyaha cusub ee Nabad Suggida. Kadib waxaa lagu xiray xabsiga NISA ee magaalada Luuq, halkaasoo uu xalay ku hoyday.
Waxa la sii daayey fiidnimadii maanta oo Jimce ahayd saacadu markay ahayd 8:00 fiidnimo ka dib markii lagu qasbay inuu tirtiro qoraalkii Facebook-ga oo uu ku daabacay raaligelin, taas oo weli ku jirta boggiisa Facebook.
“Ma jirin wax lacag ah, laakiin teleefankayga waa la iga qaaday. Markii waalidkay ii yimaaddeen, waa loo diiday inay arkaan,” ayuu Luqman u sheegay SJS wax yar ka dib markii la sii daayay.
Magaalada Luuq ayaa mudooyinkii dambe waxaa ka dhacayay rabshado baahsan oo sababay barakaca bulshada deegaanka kadib markii maleeshiyo beeleed oo gacan ka helaya kuwa deegaanka ay ku dagaalameen gacan ku heynta magaalada. Saxafiyiinta ayaa u sheegay SJS in inkastoo dadaalo lagu heshiisiinayo dhinacyadii dagaalamay ay wali taagan tahay xiisada, taasoo adkeyneysa in saxafiyiinta gudaha ay howlgalaan.
Saxafiyiinta kaliya ma saameeyaan iskahorimaadka balse sidoo kale waxaa saameeya dhibaatooyinka bini’aadantinimo ee saameeyay bulshadooda. Dhaqdhaqaaqyadii ugu dambeeyay ee tababarada SJS, Luqmaan iyo wariyaasha kale ee gobolka ayaa lagu tababaray ka warbixinta saameynta isbedelka cimilada ee deegaanadooda, iyadoo gobolka Gedo uu wali saameyn ba’an ku hayo xaaladaha cimilada ee sii xumaanaya. Bishii April ee sanadkan, ku dhawaad 100,000 oo qof ayaa waxaa saameeyay roobab mahiigaan ah iyo daadad xooggan oo ku dhuftay degmada Baardheere ee gobolka Gedo oo keliya oo ay horay abaaro ugu dhufteen.
“Waxaan si adag u cambaareyneynaa xariga xaqdarada ah ee lagu hayo wariye Luqmaan Sheekh C/llaahi Keerow iyo dhibaatooyinka joogtada ah ee lagu hayo suxufiyiinta ka howlgala gobolka Gedo. Anagoo soo dhawaynayna sii daynta Luqmaan,” ayuu yidhi Xoghayaha Guud ee SJS, Cabdalle Muumin.
“Maamulka gobolka Gedo waxaan ugu baaqeynaa in ay joojiyaan caga-juglaynta iyo cago-juglaynta ay ku hayaan saxafiyiinta sida fudud shaqadooda u gudanaya ee u tebiya wararka danta guud. Saxafiyiinta waa in loo ogolaadaa in ay si xor ah u shaqeeyaan oo aan ka cabsanayn in la ciqaabo,” ayuu ku daray Mudane Muumin.