Mandheera (KAAB TV) – Maleeshiyo looga shakisan yahay inay ka tirsan yihiin Al-Shabaab ayaa ka afduubtay magaalada Mandheera ee dalka Kenya shan ka mid ah horjoogayaasha deegaanka, xilli ay ku sii jeedeen dhanka Ceelwaaq, sida uu sheegay guddoomiyaha gobolka Waqooyi Bari Kenya John Otieno.
Dhacdadan ayaa lagu soo waramayaa inay ka dhacday inta u dhaxaysa Bamba Owla iyo Ires Suki, oo ah meelaha ay inta badan beegsadaan kooxda xagjirka ah.
Koox amni oo wadajir ah ayaa la geeyay si ay u baacsadaan afduubayaasha, ayna u xaqiijiyaan in maamulayaasha deegaanka ay si nabad ah ku soo laabteen, sida ay masuuliyiintu xaqiijiyeen.
Odoyaasha la afduubay ayaa lagu soo waramayaa in ay ku sii jeedeen kulan ay ugu diyaar garoobayeen booqashada madaxweyne William Ruto uu ku tagayo gobolka todobaadkan. Ruto ayaa lagu wadaa in uu booqasho todobaad qaadan doono uu ku marayo gobolka Waqooyi Bari, inta uu ku guda jiro waxa uu la kulmi doonaa madaxda deegaanka iyo qiimeynta mashaariicda horumarineed ee socda.
Ruto, oo uu wehliyo madaxweyne ku xigeenka Kithure Kindiki, ayaa la filayaa in uu booqdo ismaamulada Mandera, Garissa, iyo Wajeer, taas oo qayb ka ah dadaalka ay dawladda Kenya ugu jirto sidii ay wax uga qaban lahayd mudnaanta horumarinta gobolka iyo isdhexgalka bulshada.