MUQDISHO (Kaab TV) -1-Jabinta Xeerka Lr. 28 (Liiska Codbixiyeyaasha):
Guddigu wuxuu baal-maray waajibka sharciga ah ee ah in xisbiyada la siiyo liiska kama dambaysta ah ee heer maamul goboleed, heer degmo, iyo heer goob 30 maalmood ka hor. In liiska la bixiyo 9-kii May (24 saac ka hor) waxay curyaamisay hufnaantii iyo baaritaankii (Audit) lagu ogaan lahaa dadka been abuurka ah.
2- Is-diidmada Xisaabta iyo Culayska Goobaha:
Shaacintii 9-kii May waxay muujisay in 276 barood oo kaliya loo qoondeeyey 376,212 qof. Tani waxay ka dhigan tahay in goob kasta ay u adeegaysay celcelis ahaan 1,363 qof waa saddex laab ka badan xadkii doorashooyinkii guuleystay ee Puntland & Somaliland oo aheyd 400 ilaa 500 qof goobtii, taas oo meesha ka saareysa kantaroolka goobta.
3-Qiyaanada Farsamada (Verification Bypass):
Xisaabta waqtiga ee 10-kii May waxay muujisay in qofkiiba loo qorsheeyey inuu ku codeeyo 31.7 ilbiriqsi. Maaddaama nidaamka biometric-ga (faraha iyo wejiga) uu u baahan yahay ugu yaraan 120-180 ilbiriqsi, xawaarahaas wuxuu caddayn u yahay in nidaamka biometric-ga la damiyey si loogu shubto codad aan dhab ahayn (Ballot Padding).
4-Jabinta Sharciga Natiijada (Poll-site Results): Waxaa la jabiyey habraaca faraya in natiijada hordhaca ah lagaga dhawaaqo isla goobta inta aan loo soo qaadin Xarunta, laguna dhajiyo derbiga goobta. Maqnaanshaha tallaabadan waxay dhalisay “Black Box Effect”, taas oo fursad u siisay in natiijada lagu soo beddelo inta u dhexaysa goobta iyo xarunta dhexe (Tabulation Fraud).
5- Maqnaanshaha Musharaxiinta (Blind Voting):
Codbixiyeyaasha looma soo bandhigin magacyada musharaxiinta ee xisbi kasta u tartamaya, taas oo doorashadii ka dhigtay mid “Indho-la’aan ah”. Tani waxay awoodda metelaadda ka qaadday shacabka kuna wareejisay madaxda xisbiyada oo markii dambe “magacaabanaya” qof kasta oo ay rabaan.
6- Musuqmaasuqa Maaliyadda & Miisaaniyad Dahsoon:
Doorashadu kuma jirin miisaaniyadda rasmiga ah ee qaranka ee 2026, taas oo meesha ka saartay madax-bannaanida guddiga. Dhaqaalaha dahsoon ee ku baxay wuxuu muujinayaa in guddigu fulinayay rabitaanka ciddii biilka bixisay halkii uu u shaqayn lahaa dadweynaha.
Doorashada Koofur Galbeed ma ahayn tartan dimoqraadi ah, balse waxay ahayd Habraac la Maamulay (Managed Process) oo loo qaabeeyey in lagu sharciyeeyo natiijo horay loo sii qorsheeyey iyadoo la adeegsanayo daldaloolo farsamo iyo jabinta badheedhka ah ee Sharciga Doorashooyinka Qaranka.