Ciro oo Tel Aviv ka furay Madasha Ganacsiga Somaliland & Israel {Sawirro}

Madashan ganacsi ayaa waxaa si wadajir ah u soo qabanqaabiyey Machadka Wax Dhoofinta (Institute of Export) iyo Waaxda Dhaqaalaha ee Wasaaradda Arrimaha Dibedda ee Israa’iil, waxaana ka qayb galay in ka badan 200 oo isugu jiray hoggaamiyeyaal ganacsi, maalgashadayaal iyo wakiillo ka socday shirkadaha waaweyn ee Israa’iil.

Kulankan ayaa lagu tilmaamay tallaabo cusub oo lagu xoojinayo xiriirka dhaqaale ee u dhexeeya Somaliland iyo Israa’iil, iyadoo labada dhinac ay diiradda saareen sidii loo ballaarin lahaa ganacsiga, loo dhiirrigelin lahaa maalgashiga tooska ah, isla markaana loo abuuri lahaa iskaashi dhaqaale oo waara.

Intii ay socotay madasha, waxaa si qoto dheer looga dooday fursadaha ganacsi iyo maalgashi ee ka jira Somaliland, gaar ahaan dhinacyada kaabeyaasha dhaqaalaha, tamarta, biyaha, beeraha, caafimaadka, isgaarsiinta iyo adeegyada casriga ah.

Ka qaybgalayaashu waxay isku raaceen in Somaliland ay leedahay fursado dhaqaale oo muhiim ah, kuwaas oo soo jiidan kara maalgelin caalami ah haddii la helo iskaashi joogto ah iyo jawi ganacsi oo la isku halayn karo.

Sidoo kale, waxaa la falanqeeyey sidii loo fududeyn lahaa isu-socodka ganacsiga, loona dhisi lahaa hannaan dhiirrigeliya ganacsatada iyo shirkadaha labada dhinac inay yeeshaan iskaashi toos ah.

DHEERAAD: Hay’adda UNICEF oo ka hadashay qarax ay ku dhinteen 22 Carruur ah

Mid ka mid ah qodobadii ugu muhiimsanaa ee madasha laga hadlay ayaa ahaa gudbinta aqoonta iyo tiknoolajiyadda casriga ah. Ka qaybgalayaashu waxay muujiyeen in iskaashiga dhinacyada farsamada iyo hal-abuurka uu door weyn ka qaadan karo horumarinta adeegyada iyo kobcinta xirfadaha shaqaalaha Somaliland.

Waxaa la tilmaamay in khibradda Israa’iil ee dhinacyada beeraha, biyaha, tiknoolajiyadda iyo hal-abuurka ganacsiga ay fursad u noqon karto Somaliland haddii labada dhinac ay yeeshaan iskaashi rasmi ah oo waqti dheer soconaya.

Madaxweyne Cabdiraxmaan Cirro ayaa madasha ka jeediyey khudbad uu ku muujiyey sida ay Somaliland uga go’an tahay soo dhoweynta maalgashiga shisheeye iyo kobcinta xiriirrada dhaqaale ee caalamiga ah.

Madaxweynaha ayaa sheegay in Somaliland aysan kaliya u furnayn ganacsatada iyo maalgashadayaasha Israa’iil dhinaca fursadaha ganacsi, balse sidoo kale ay diyaar u tahay dhisidda xiriir dhaqaale oo ku dhisan iskaashi iyo is-faham labada dhinac faa’iido u leh.

Waxa uu xusay in Somaliland ay ku taallo meel istiraatiiji ah oo muhiim u ah ganacsiga caalamiga ah, gaar ahaan marin-biyoodka Badda Cas iyo Gacanka Cadmeed, taas oo ka dhigaysa meel soo jiidasho leh oo ay xiiseyn karaan maalgashadayaasha caalamiga ah.