MUQDISHO (KAAB TV) – Saacadihii hore ee subaxnimadii saaka oo Sabti ah, kooxo lagu tuhmayo Al-Shabaab ayaa weerar qaraxyo ku qaaday Suuqa Tabeelaha oo ku yaalla jidka isku xira Afgoye iyo Muqdisho.
Dadka deegaanka ayaa sheegaya in kooxdu ay ku rakibeen walxaha qarxa suuqa, taas oo sababtay dab xooggan oo baabi’iyay dukaamo iyo meherado badan.
Goobjoogayaal ayaa sheegat in boqolaal dukaan la burburiyay, taas oo u muuqata weerar si gaar ah loogu beegsaday ganacsiyada dhawaan ku rakibtay goobahooda kamaradaha amniga (CCTV).
Dabka ayaa si dhakhso leh ugu faafay suuqa oo ahaa mid ciriiri ah, taas oo sababtay burbur baahsan iyo khasaare dhaqaale oo weyn.
Weerarkan ayaa yimid toddobaad uun ka dib markii Al-Shabaab ay bartilmaameedsadeen Suuqa Ceelasha Biyaha oo ku yaalla duleedka Muqdisho, taas oo keentay khasaare malaayiin dollar ah.
Al-Shabaab waxay sidoo kale weerartay Suuqa Bakaaraha, oo ka mid ah suuqyada ugu waaweyn ee ganacsiga ee caasimadda, taas oo sii kordhisay culeyska dhaqaale ee ka jira magaalada.
Ilaa iyo hadda, ma jiro wax war ah oo ka soo baxay mas’uuliyiinta dowladda Soomaaliya oo ku saabsan dhacdadan.
Weeraradan isdaba joogga ah ayaa muujinaya khatarta joogtada ah ee Al-Shabaab ay ku hayaan ganacsiyada iyo kaabayaasha bulshada ee gobolka, taas oo walaac xooggan ka dhalisay xaaladda amni ee Muqdisho iyo nawaaxigeeda.