MUQDISHO (Kaab TV) –Garsooraha Soomaaliyeed Cumar Cabdulqaadir Aadan ayaa seegi doona tartanka Koobka Adduunka ee xagaagan ka dhacaya Mareykanka, kaddib markii loo diiday inuu dalkaas galo, sida ay Isniintii xaqiijisay FIFA.
Sida ay sheegtay Hay’adda Kastamka iyo Ilaalinta Xuduudaha Mareykanka (CBP), Cumar ayaa baaritaan dheeraad ah lagu sameeyay markii uu kasoo degay magaalada Miami, isagoo ka yimid Istanbul ee Turkiga.
Afhayeen u hadlay CBP ayaa sheegay in baaritaankaasi uu qayb ka yahay habraacyada caadiga ah ee lagu xaqiijiyo xogta socdaalayaasha iyo u-qalmitaankooda gelitaanka dalka. Waxa uu intaa ku daray in ugu dambeyn lagu go’aamiyay inuusan u qalmin gelitaanka Mareykanka sababo la xiriira baaritaanno amni, sidaas darteedna loo diiday inuu dalka galo.
Mas’uuliyiinta Mareykanka ma aysan shaacin faahfaahin dheeraad ah oo ku saabsan sababta gaarka ah ee loo diiday garsooraha Soomaaliyeed, hase yeeshee Soomaaliya waxay kamid tahay dalalka uu saameeyay xayiraadda socdaalka ee maamulka Madaxweyne Donald Trump, taas oo keentay in muwaadiniinta dalalkaasi lagu sameeyo baaritaanno adag.
Cumar Cabdulqaadir Aadan ayaa sanadkii 2025 loo aqoonsaday garsooraha ragga ugu wanaagsan Afrika, waxaana Xiriirka Kubadda Cagta Afrika (CAF) u xushay inuu ka mid noqdo garsoorayaasha ka hawlgeli lahaa Koobka Adduunka ee sanadkan.
FIFA ayaa sheegtay inaysan wax door ah ku lahayn habraacyada socdaalka iyo bixinta fiisayaasha ee waddanka martigelinaya tartanka. Afhayeen u hadlay hay’adda ayaa sheegay in dowladda martigelinaysa ay leedahay go’aanka kama dambaysta ah ee ku saabsan cidda la siinayo fiisaha iyo cidda loo oggolaanayo inay dalka gasho.
Dhacdadan ayaa kusoo beegmaysa iyadoo dalal kale, oo ay ku jirto Iiraan, ay sidoo kale la kulmeen caqabado la xiriira gelitaanka Mareykanka, xilli maamulka Trump uu adkeeyay siyaasadaha socdaalka iyo amniga xuduudaha.