Muqdisho (KAAB TV) – Madaxweynaha dowladda federaalka Soomaaliya iyo taliyaha ciidamada xoogga dalka Xasan Sheekh Maxamuud ayaa shalay xarunta wasaaradda gaashaandhigga Soomaaliya kulan amniga looga hadlayay kula qaatay saraakiisha ciidamada xoogga dalka.
Intii uu socday kulanka ayaa saraakiisha amniga waxa ay madaxweynaha dowladda federaalka Soomaaliya Xasan Sheekh Maxamuud uga warbixiyeen howlgallada adag ee ka dhanka ah Al-Shabaab ee ka socda dalka iyo guud ahaan qorshaha amniga.
Maxamuud ayaa kala hadlay saraakiisha ugu sareysa ciidanka xoogga dalka in la dardargeliyo howlgallada dalka lagu xoreynayo, isagoo carabka ku adkeeyay xoreynta deegaanada harsan iyo xaqiijinta ammaanka goobaha la xoreeyay.
Isagoo hadalkiisa sii wata ayaa bogaadiyay naf-hurnimada ciidamada Soomaaliya iyo sida ay ugu dhabar adeygeen ka xoreynta deegaannada badan ee kooxda Al-Shabaab oo ay ku jiraan deegaannada ay kooxdaasi ka talinaysay muddo tobanaan sano ah. Madaxweynaha ayaa ku wargeliyay mas’uuliyiinta in ay sii laba jibaaraan howlahooda shaqo, isla markaana ay sii wadaan howlgallada hagar la’aanta ah inta laga gaarayo guusha.
Wuxuu ku celceliyay sida ay dowladda uga go’an tahay dadaallada ka dhanka ah argagixisada maadaama ay dowladdiisu mudnaanta siisay amniga isagoo muujiyay doorka muhiimka ah ee wada shaqeyn dhow oo ay la leeyihiin shacabka iyo in lagala shaqeeyo dadaallada dib u xoreynta dalka.
Soomaaliya ayaa dhawaan heshiis dhanka amniga ah la saxiixatay Masar si loo xoojiyo iskaashiga dhanka amniga ah.
Heshiiskan ayaa la saxiixay kadib wadahadallo laba geesood ah oo dhexmaray Madaxweynaha Masar Abdel Fattah El-Sisi iyo dhiggiisa Soomaaliya, Xasan Sheekh Maxamuud.
Soomaaliya ayaa sheegtay in heshiis muhiim ah oo dhanka difaaca ah ay la saxiixatay dowladda Masar, kaasi oo looga gol leeyahay in lagu xoojiyo iskaashiga dhanka ammaanka ee ka dhaxeeya labada dal ee walaalaha ah.