Garawe (Kaab TV) -Puntland ayaa ku dhawaaqay inay qaadi doonto tallaabooyin adag oo dhinaca sharciga ah oo ka dhan ah maxaabiiista kooxda Daacish, kuwaas oo lagu qabtay dagaalladii sanadkii hore iyo sanadkan ka dhacay Calmiskaad, iyadoo mas’uuliyiin sare ay ku baaqeen ciqaabo culus oo ay ku jirto dil toogasho.
Madaxweynaha Puntland Said Abdullahi Deni ayaa dhawaan faray garsoorka cusub ee Maxkamadda Ciidamada in ay tallaabo adag ka qaadaan shaqsiyaadka lala xiriirinayo kooxda ISIS ee lagaga adkaaday deegaanka Al-Miskaad.
Sida ay sheegeen saraakiil ka tirsan maamulka, Madaxweyne Deni ayaa amar ku bixiyay in qof kasta oo lagu helo inuu xubin ka yahay ISIS uu wajaho xukun dil ah oo lagu fulinayo nidaamka maxkamadaha ciidamada Puntland.
Hadalladan ayaa imaanaya iyadoo ay socdaan howlgallo amni oo lagu beegsanayo haraadiga Daacish ee weli ku sugan Calmiskaad, halkaas oo ciidamada Puntland ay bilihii la soo dhaafay ka wadeen gulufyo ka dhan ah kooxaha xagjirka ah.
Madaxweyne ku xigeenka Puntland Ilyas Osman Lugatoor ayaa sidoo kale adkeeyay mowqifka adag ee maamulka xilli uu furayay tababar loo qabanayay xubnaha garsoorka. Waxa uu sheegay in Puntland ay muddo dheer la dagaallamaysay kooxaha halista ku ah xasilloonida Puntland, isaga oo ugu baaqay maxkamadaha inay soo rogaan ciqaabo adag oo ka dhan ah dadka ku lugta leh falalka argagixisada.
“Puntland waxay diyaar u tahay inay maxkamadeyso dadka ku lugta leh argagixisada iyo dilalka, waxaana idinka fileynaa inaad tallaabo ka qaaddaan cid kasta oo dambiyo geysata,” ayuu yiri Lugatoor.
Maamulka Puntland ayaa sare u qaaday howlgallada ka dhanka ah Daacish ee gobolka Bari kadib dagaallo ay la galeen kooxdaan oo muddo 15 sano ku sugnaa buuraha Al-Miskaad, iyagoo ka sameystay fariisin ay ku xooggan yihiin.