Garawe (Kaab TV)- Maamulka Puntland ayaa sheegay in ciidamada ammaanka ay gacanta ku dhigeen kooxo looga shakisan yahay burcad-badeednimo, kadib howlgallo amni oo laga sameeyay gobolka Bari.
Saraakiisha ammaanka Puntland ayaa sheegay in howlgaladan ay qeyb ka yihiin dadaallo lagu xoojinayo la dagaallanka kooxaha burcad-badeedda ah ee ka howlgala xeebaha Puntland, gaar ahaan kadib dhacdooyin la xiriira afduub iyo weerarro lagu qaaday maraakiib ganacsi oo marayay biyaha Soomaaliya iyo Badda Cas.
Mas’uuliyiintu waxay sheegeen in dadka la qabtay lagu tuhunsan yahay inay xiriir la leeyihiin shabakado burcad-badeed ah oo ku lug leh weerarro iyo afduubyo ka dhan ah maraakiibta ganacsiga.
Taliyeyaasha booliska gobolka Karkaar ayaa uga digay shacabka in cid kasta oo taageerta ama la shaqeysa kooxaha burcad-badeedda ay wajihi doonto tallaabo sharci ah, iyagoo sidoo kale sheegay in baaritaanno lagu sameyn doono dadka ehellada ama xiriirka la leh kooxahaasi haddii lagu tuhmo taageero.
“Waxaan tallaabo adag ka qaadi doonnaa cid kasta oo ku lug leh taageeridda falalka burcad-badeednimada,” ayay sheegeen saraakiisha booliska, kuwaas oo xusay in eedeysanayaasha la horgeyn doono maxkamad.
Maamulka Puntland ayaa sidoo kale muujiyay walaac ku saabsan in weerarrada soo noqnoqday ee burcad-badeeddu ay saameyn ku yeelan karaan isu socodka maraakiibta ganacsiga iyo dhaq-dhaqaaqa dekedaha Puntland, taasoo dhaawici karta ganacsiga iyo dhaqaalaha gobolka.
Mas’uuliyiinta Puntland waxay sheegeen in howlgallada ka dhanka ah burcad-badeedda ay sii socon doonaan, iyagoo xusay in tallaabooyin laga fulin doono berriga iyo baddaba si loo xakameeyo kooxaha lagu eedeeyay dib u soo nooleynta falalka burcad-badeednimo ee ka dhacay Badda Cas iyo biyaha ku dhow Soomaaliya.
Burcad-badeednimada xeebaha Soomaaliya ayaa si weyn hoos ugu dhacday tobankii sano ee la soo dhaafay, kadib howlgallo caalami ah oo dhinaca badda ah iyo dadaallo amni oo heer gobol ah, hase yeeshee dhacdooyinkii ugu dambeeyay ayaa dib u soo nooleeyay walaaca laga qabo soo laabashada falalkaasi.