Hargeisa (KAAB TV) – Madaxweynaha Somaliland Muuse Biixi Cabdi ayaa maanta oo Khamiis ah warqadaha aqoonsiga danjiranimo ku guddoomay wakiilka cusub ee Itoobiya, Danjire Teshome Shunde Hamito, oo maanta ka dhacay qasriga madaxtooyada Hargeysa. Talaabadan ayaa noqonaysa tilaabo weyn oo qoto dheer oo dhanka milatariga iyo diblumaasiyadeed ee u dhaxaysa Somaliland iyo Itoobiya inkasta oo ay cirka isku sii shareerayso xiisada kala dhaxaysa Soomaaliya.
Xafladda aqoonsiga safiirnimo ee ka dhacday magaalada Hargeysa ayaa ku soo beegmaysa wax yar uun ka dib markii la sheegay in Itoobiya ay casriyeyn ku samaysay xafiiska qunsuliyadda ee Somaliland si loo dhamaystiro aqoonsiga safaaradda, tallaabadaas oo ay Somaliland xaqiijisay balse aanay si rasmi ah u caddayn Itoobiya.
Labada mas’uul ayaa intii uu kulankooda socday waxay ka wadahadleen arrimo xasaasi ah oo khuseeya nabad-gelyada mandaqadda Geeska Afrika, kor u qaadista xidhiidhka labada dal iyo iskaashiga mustaqbalka ee Somaliland iyo Itoobiya.
Isbeddelka dublamaasiyadeed ayaa imanaya ku dhawaad sagaal bilood ka dib markii Somaliland iyo Itoobiya ay kala saxeexdeen heshiis is afgarad (MoU) oo muran badan dhaliyay kaasoo kor u qaaday dhaqdhaqaaqa gobolka. Heshiiskan ayaa waxa ku jira iskaashi ciidan iyo in 20 kilomitir oo xeebta Somaliland ah laga kireeyo Itoobiya oo muran badan ka taagan yahay.
Horumarkan ayaa waxaa mucaaradad xooggan kala kulmay Soomaaliya oo u aragta Somaliland qayb ka mid ah dhulkeeda. Iyadoo taas ka jawaabeysa, Soomaaliya waxay eriday safiirkii Itoobiya, waxayna amar ku bixisay in la xiro qunsuliyadaha Itoobiya ee Hargeysa iyo Garoowe, inkastoo Itoobiya ay iska dhego tirtay awaamiirtan.
Xiisadda ayaa gaartay dhinaca ciidamada, iyadoo Soomaaliya laga saaray ciidamada Itoobiya ee ku sugan Soomaaliya, haddii aysan Itoobiya ka bixin heshiiskaas. Dadaallo caalami ah oo lagu doonayo in lagu dhexdhexaadiyo khilaafka oo ay ka mid yihiin wadahadal uu Turkigu martigeliyay, ayaan illaa hadda lagu guuleysan in lagu xalliyo khilaafka.