Muqdisho (KAAB TV) – Waxaa saakay xaafadaha magaalada Muqdisho qaarkood lagamaqlay madaafiic kusoo dhaceysa qaar kamid ah degmooyinka caasimadda, waxa ayna madaafiicdan cabsi badan ku beereen dadka shacabka.
Sidoo kale, madaafiicda ayaa xoogooda laga maqlayay degmooyinka Kaxda, Dharkeenley iyo Wadajir, waxa ayna ku dhaceen madaafiicdaasi xaafado katirsan degmooyinkaasi, iyadoona meelaha qaar la sheegayo in ay jiraan khasaaro.
Sida wararka qaar sheegayan madaafiicda qaar ayaa lagu tuurayay xerada ciidamada Turkisom iyo sidoo kale goobo kale, waxa ayna inta badan madaafiicda ku dhaceen xaafado shacab iyo dhul bannaan.
Dhanka kale, Wali si rasmi ah looma oga khasaaraha ka dhashay madaafiicdan saakay kusoo dhacay xaafado katirsan magaalada Muqdisho, laamaha ammaankaa ayaan sidoo kale ka hadlin madaafiicdan iyo khasaaraha ka dhashay.
Al Shabaab ayaa inta badan sheegata masuuliyada weerarada madaafiicda loo adeegsado ee ka dhaca magaalada Muqdisho, waxa ayna madaafiicdan inta badan waxyeelo u geesataa dadka shacabka ah.