Maandooriye la doonayay in Xabsiga Dhexe ee Muqdisho la geliyo oo la qabtay, lix haween ahna la xiray

|

Taliska Ciidanka Asluubta Soomaaliyeed ayaa shaaciyay inay gacanta ku dhigeen maandooriye tiro badan oo la doonayay in si qarsoodi ah loo geliyo Xabsiga Dhexe ee Muqdisho, kaddib hawlgal amni oo socday muddo laba bilood ah, kaas oo lagu daba socday shabakad lagu eedeeyay ka ganacsiga iyo gudbinta maandooriyaha.

Sida uu sheegay taliska, maandooriyaha la qabtay ayaa u badnaa kaniiniyo daroogo ah oo lagu dhex qariyay raashinka loo geeyo maxaabiista maalmaha booqashada ehellada. Qorshahan ayaa la sheegay in loo adeegsanayay hab qarsoodi ah oo lagu marin habaabinayay baaritaannada amniga ee ka socda gudaha xabsiga.

Taliska ayaa sheegay in shabakadda la tuhunsan yahay ay ka koobnayd maxaabiis ku xiran xabsiga, dad ehelladooda ah iyo shaqsiyaad kale oo si been abuur ah u sheeganayay inay qaraabo la yihiin maxaabiista, si ay fursad ugu helaan gelinta maandooriyaha.

Hawlgalka ayaa waxaa iska kaashaday Waaxda Dabagalka Dembiyada Ciidanka Asluubta, maamulka Xabsiga Dhexe iyo saraakiisha amniga, waxaana lagu soo qabtay lix haween ah oo looga shakisan yahay inay qayb ka ahaayeen qorshaha lagu gudbinayay maandooriyaha.

Saraakiisha ayaa sheegay in daba-galka muddo laba bilood ah socday uu suurageliyay in la ogaado qaabka ay shabakaddani u shaqeynaysay iyo dadka looga shakisan yahay inay ku lug lahaayeen isku dayga lagu gelinayay maandooriyaha xabsiga.

Taliska ayaa sheegay in isbeddel lagu sameeyay habraaca booqashada maxaabiista uu door weyn ka qaatay fashilinta shabakaddan. Habraaca cusub ayaa suurageliyay in si rasmi ah loo xaqiijiyo xogta dadka booqanaya maxaabiista, lana kala saaro ehellada dhabta ah iyo dadka adeegsanaya magacyo iyo xiriirro been abuur ah.

DHEERAAD:  Saddex buundo oo la burburiyey: Walaac laga muujiyey isu-socodka shacabka iyo xaaladda amni ee Shabeellaha Hoose+Sawirro

Wararka laga helayo Ciidanka Asluubta ayaa sidoo kale sheegaya in maandooriyaha la qabtay uu isugu jiray xashiish iyo kaniiniyo, kuwaas oo qaarkood lagu dhex qariyay caano baakadaysan iyo khudaar ay ka mid yihiin bataati iyo waxyaabo kale oo raashin ah.

Taliska Ciidanka Asluubta ayaa sheegay in lixda haween ah ee la qabtay iyo caddeymaha la xiriira kiiska lagu wareejiyay Taliska Booliska Soomaaliyeed, si baaritaan dheeraad ah loogu sameeyo, loona mariyo waddooyinka sharciga.

Maamulka ciidanka ayaa sidoo kale sheegay in baaritaanno kale ay socdaan, kuwaas oo lagu raadinayo shabakado kale oo looga shakisan yahay inay ku lug leeyihiin ka ganacsiga iyo gelinta maandooriyaha gudaha xabsiyada dalka.

Xabsiga Dhexe ee Muqdisho ayaa ka mid ah xarumaha ugu muhiimsan ee lagu hayo maxaabiista dambiyada kala duwan loo heysto. Sidaas darteed, isku day kasta oo maandooriye lagu gelinayo gudaha xabsiga wuxuu abuuri karaa caqabado amni iyo mid maamul.

Fashilinta shabakaddan ayaa muujinaysa muhiimadda ay leedahay in la adkeeyo baaritaanka raashinka, xaqiijinta dadka booqanaya maxaabiista iyo dabagalka dhaqdhaqaaqyada laga shakiyo.

Waxaa hadda la sugayaa natiijada baaritaanka Booliska iyo tallaabada sharci ee laga qaadi doono dadka lagu eedeeyay kiiskan, iyadoo aan weli jirin xukun maxkamadeed oo lagu caddeeyay dambiga lagu tuhunsan yahay.

La Xiriira

Live Now

Baraheenna Bulshada

Baaritaanada

English News