MUQDISHO (KAAB TV) – Tallaabo kale oo la yaab leh ayay ku dhaqaaqday dowladda Madaxweyne Xasan Sheekh Maxamuud iyadoo fasaxday 33 nin oo ahaa kalluumeysato si sharci darro ah uga kalluumeysanay xeebaha Soomaaliya.
Tallaabadan lagu siidaayey 33 kalluumeysatada Iiraan ayaa lagu micneeyay in dowladda Shiicada ee Iiraan ay ku xujeysay maamulka Xasan Sheekh inuu marka hore siidaayo ragga kalluumeysatada ee u xiran ka hor inta aan dib loo soo celin xiriirka Soomaaliya iyo Iiraan.
Dhammaan kooxda 33 Iiraan ayaa laga siidaayey Xabsiga Dhexe ee Muqdisho.
Raggan ayaa xukunno kala duwan lagu riday bishii July 2023, iyagoo lagu eedeeyay inay dhacayeen kalluunka xeebaha Soomaaliya, iyo inay sababeen khasaare soo gaaray ciidamada Soomaaliya ee soo qabtay.
Maxkamadda Gobolka Banaadir iyo tan Racfaanka ayaana xukunno kala duwan ku riday oo ay ka mid ahaayeen xarig, in lala wareego doonyahooda iyo inay bixiyaan lacag dhan USD 11,000 midkiiba.
Il wareed ka tirsan Wasaaradda Arrimaha Dibadda Soomaaliya ayaa Kaab TV u sheegay in shuruudda fasaxidda 33 nin loo fuliyay Iiraan ka dib markuu sidaasi soo amray Xasan Sheekh Maxamuud.
Wakaaladda Wararka Iiraan ayaa shaacisay in Wasiiru Dowlaha Arrimaha Dibadda Cali Balcad uu ku wargaliyay Danjiraha Iiraan u jooga Nairobi Cali Gholampour siideynta ragga 33 ah ee ku xirnaa Muqdisho.
SHIICEYNTA
Bishii Jannaayo 2016 ayaa la xiray Safaaradda Iiraan ee Muqdisho, iyadoo dhammaan diblomaasiyiintooda iyo shaqaalaha oo ay wehliyaan qaar u shaqeynayey hay’ado Iiraan leedahay lagu amray inay Muqdisho uga baxaan 72 saac.
Waxaa lagu eedeeyay inay madhabka Shiicada faafinayeen.
Waxaa arrinkaasi mardambe caddeeyay madaxweyne Xasan Sheekh laftiisa oo sheegay in markuu warkaasi soo gaaray uu qaatay go’aan ah in dalka laga saaro dhammaan Iiiraaniyiinta.
Ilo diblomaasiyadeed ayaase hadda Kaab TV u sheegay in soo celinta xiriirka Iiraan uu imaanayo xilli ay soo awoodsatay kooxda Xuutiyiinta ee Yemen oo ah koox Shiico ah oo taageero ka hesha Iiraan. Kooxdan ayaa weeraro ka geysata biyaha Badda Cas, waxaana jira xiriir u dhexeeya kooxda Xuutiyiinta iyo Al-Shabaab.
Waxaa sidoo kale soo baxaya warar sheegaya in Xuutiyiinta ay hub iyo rasaas ka iibiyaan kooxaha maleeshiyaadka iyo burcad badeeda Soomaalida ee dhowaan dib usoo laba kacleeyay.