BAARDHEERE (Kaab TV) – Dil argagax leh ayaa ka dhacay magaalada Beledxaawo ka dib markii sida la sheegay nin dhallinyaro ah uu mindi ku dilay haweeney isaga la dhalatay oo lagu magacaabi jiray Sacdiyo Aadan Dhicis.
Ninka dilka geystay oo ka baxsaday magaalada Beledxaawo habeenkii Jimcaha ayaa dib ugu soo laabtay magaalada. Booliska ayaana sheegay inay qabteen oo ay hadda gacanta ku hayaan.
Weli lama yaqaano sababta dilka.
Haweeney labaad ayaa dhaawac daran uu soo gaaray ka dib markii sida la sheegay biyo kulul ay ku shibtay gabar dumaashideed ah isla degmada Beledxaawo ee gobolka Gedo.
Ehelka gabadha la gubay ayaa sheegay inay dhaawaceeda oo aad u daran ay u qaadeen isbitaalka degmada Mandheera ee dalka Kenya.
KUFSI KA DHACAY BAARDHEERE
Dhanka kale, dadweynaha degmada Baardheere ayaa aad uga argagaxay kufsi la sheegay in loo geystay wiil 9-jir ah oo ku nool degmadaasi.
Booliska iyo maamulka degmada ayaan weli ka hadlin dhacdada Baardheere.