QAAHIRA (KAAB TV) – Wasiirka arrimaha dibadda Soomaaliya Axmed Macalin Fiqi ayaa soo dhaweeyay heshiiska milateri ee Masar iyo Soomaaliya ay kala saxiixdeen isagoo sheegay in “uu ku soo beegmay waqti munaasib ah”.
“Waxay diyaar u tahay in ay si weyn u xoojiso dadaallada lagula dagaalamayo argagixisanimada, iyadoo sidoo kale kor loo qaadayo awoodda ciidamadeena qalabka sida. Tani waxay awood u siinaysaa inay difaacaan qarankeena oo ay si hufan u ilaashadaan qaranimadeena,” ayuu Fiqi ku yiri X, oo horey loo oran jiray Twitter-ka.
Heshiiskan ayaa Arbacadii la soo dhaafay uu Madaxweynaha Soomaaliya Xasan Sheekh Maxamuud ku tagay magaalada Qaahira, halkaasoo uu kula kulmay Madaxweynaha Masar C/fataax Al-Sisi.
Fiqi ayaa Khamiistii magaalada Qaahira kula kulmay dhiggiisa Masar Badar Abdelatty. Kulankan oo ah kii labaad ee Fiqi uu qabto tan iyo markii uu xilka qabtay April 2024, waxaa xigay wadahadal uu la yeeshay wufuud ka kala socotay labada dal.
Abdelatty wuxuu ku celceliyay taageerada Masar ay u fidisay midnimada iyo madax-banaanida Soomaaliya, isagoo si adag u diiday faragelin kasta oo lagu sameeyo arrimaheeda gudaha. Waxa uu sidoo kale bogaadiyay jawiga wanaagsan ee shirkii ugu dambeeyay ee madaxweynayaasha labada dal iyo dardargelinta muhiimka ah ee xiriirka labada dal.
“Masar waxa ay diyaar u tahay in ay ka qaybgasho howlgalka nabad ilaalinta Soomaaliya marka ay codsato dadka Soomaaliyeed,” ayuu yiri Abdelatty.
Abdelatty ayaa sidoo kale ku dhawaaqay furitaanka dhismaha cusub ee safaaradda Masar ee Muqdisho. Waxa uu sheegay in safaaraddu ay ka qeyb qaadan doonto xoojinta xiriirka taariikhiga ah iyo kobcinta iskaashiga dhinacyada la wadaago.
Wadahadallada ayaa sidoo kale diiradda lagu saaray horumarinta xiriirka iyo barnaamijyada iskaashiga ee labada dal. Abdelatty wuxuu muujiyay rabitaanka Masar ee ah inay ka taageerto awoodaha Soomaaliya ee dhinacyo kala duwan, gaar ahaan dhisidda awoodda diblomaasiyadeed. Wuxuu ku nuux-nuuxsaday dardaarankiisa ku aaddan xoojinta isku-dubbaridka barnaamijyada tababarrada ee Machadka Daraasaadka Diblomaasiyadda, oo lagu saleeyay baahiyaha iyo mudnaanta saaxiibada Soomaaliyeed.
Labada dhinacba waxay carrabka ku adkeeyeen muhiimadda ay leedahay in kor loo qaado ganacsiga iyo sidii loo dhisi lahaa duulimaad toos ah oo ay EgyptAir ku imanayso Muqdisho bishii Luulyo.
Fiqi ayaa muujiyay sida uu ugu faraxsan yahay booqashada iyo sida uu dalkiisu uga mahadcelinayo taageerada Masar. Wuxuu muujiyay rabitaanka Soomaaliya ee ah xoojinta iskaashiga dhanka waxbarashada, gaar ahaan kordhinta deeqaha waxbarasho ee ay Al-Azhar siiso ardayda Soomaaliyeed.
Wuxuu sidoo kale soo jeediyay in la sahmiyo in la kordhiyo duulimaadyada EgyptAir ee Muqdisho si loo sii xoojiyo xiriirka ka dhexeeya labada dal.