Muqdisho (KAAB TV) – Dowladda Federaalka ah ee Soomaaliya ayaa billowday qorshe ballaaran oo lagu xoojinayo ciidamada ammaanka ee dowlad goboleedyada Galmudug, Hir-Shabeelle, Koonfur Galbeed iyo Jubbaland, iyadoo ujeeddadu tahay sidii loo xoojin lahaa guulihii ugu dambeeyay ee laga gaaray deegaannada iyo qaadista howlgallada ka dhanka ah Al-Shabaab.
Sida ay sheegayaan ilo wareedyo lagu kalsoon yahay, istaraatiijiyadda dowladda ayaa diiradda saareysa sidii loo xoojin lahaa awoodda ciidamada gobolka ee ku sugan deegaannada laga saaray Al-Shabaab. Qorshahan ayaa ujeedadiisu tahay “in la sugo amniga gobolladan si wax ku ool ah, looguna diyaariyo ciidamada hawlgallada mustaqbalka ee lagu soo celinayo dhulka harsan ee weli gacanta ugu jira kooxda xagjirka ah.” Ilo wareedyo ayaa u sheegay Mustaqbal.
Dhaqan gelinta qorshahan ayaa waxaa si weyn uga qeyb qaatay Saraakiil ka tirsan Ciidanka Xoogga dalka Soomaaliyeed iyo Wasaaradda Gaashaandhigga. Maalmihii la soo dhaafay ayaa saraakiil sar sare oo ka tirsan dowladda waxa ay booqasho ku tageen xeryo ciidan oo kala duwan iyo cutubyo ka tirsan afarta dowlad goboleed, si ay u qiimeeyaan diyaar garowga ciidamada iyo in la ogaado in loo qalabeeyay howlgallada cusub.
Hadafka koowaad ee hindisahan ayaa ah in la xaqiijiyo in ciidamada gobolka si ku filan loo xoojiyo si ay gacanta ugu dhigaan goobaha la xoreeyay iyo in la fidiyo guulahaas iyadoo la beegsanayo meelaha ay kaga harsan yihiin Al-Shabaab. Qorshaha Dowladda Federaalka ayaa loo arkaa mid muhiim u ah dadaallada socda ee lagu xasilinayo Soomaaliya, laguna ciribtirayo khatarta kooxaha argagixisada ah.
“Diiradda ma ahan oo kaliya in la sii hayo dhulkii dib loo soo celiyay, balse waa in la sii amba-qaado ilaa gees kasta oo dalka ka mid ah laga xoreeyo Al-Shabaab,” ayuu yiri sarkaal ka tirsan ciidamada oo ku howlan qorshahan.
Talaabadan ayaa daba socota guulo ay dhawaan gaareen ciidamada xoogga dalka Soomaaliyeed oo kaashanaya ciidamada gobolka iyo saaxiibada caalamiga ah oo ku guuleystay in Al-Shabaab laga xoreeyo deegaano muhiim ah. Iyadoo la xoojinayo ciidamada dowlad goboleedyada, dowladda Federaalka waxay xaqiijineysaa in goobahaas ay noqdaan kuwo ammaan ah iyo in la joogteeyo dardargelinta dagaalka ka dhanka ah argagixisada.
Qorshahan ayaa sida xogtu sheegeyso sidoo kale ka tarjumeysa sida ay dowladda Federaalka uga go’an tahay inay si dhow ula shaqeyso maamul goboleedyada si kor loogu qaado amniga iyo dowladnimada meelaha ugu nugul Soomaaliya.
Iyadoo Dowladda Federaalka ay sii wado fulinta istaraatiijiyaddeeda, ayaa waxaa la qorsheynayaa in ciidamada maamul goboleedyada Galmudug, Hirshabelle, Koonfur Galbeed iyo Jubbaland ay kaalin weyn ka qaataan dagaalka ka dhanka ah Al-Shabaab ee Soomaaliya.
Madaxweyne Xasan Sheekh Maxamuud ayaa ku baaqay in la dardargeliyo ololaha ka dhanka ah Al-Shabaab, xilli uu booqasho ku tagey Xarunta Wasaaradda Gaashaandhigga ee Muqdisho. Madaxweynaha ayaa ku nuux-nuux saday in si degdeg ah loo dhameystiro dadaallada dib u xoreynta ee socda si loo soo celiyo xasillooni buuxda oo dalka oo dhan ah.