Muqdisho (KAAB TV) – Guddoomiyaha Gobolka Banaadir ahna Duqa Muqdisho Mudane Yuusuf Xuseen Jimcaale (Madaale) ayaa xariga ka jaray waddo cusub oo laami ah, taasoo laga hirgeliyay degmada Yaaqshiid, taasoo isku xirta Waddada Jeneraal Daa’uud iyo Dahabshiil – Suuq Bacaad.
Duqa Muqdisho ayaa tilmaamay in dhismaha kaabayaasha waddooyinka ay qeyb weyn ka qaateen soo celinta bilicda, kobaca ganacsiga, dhaqaalaha iyo isu socodka bulshada, isagoo ugu baaqay qeybaha kala duwan ee bulshada inay dowladda ku taageeraan nadaafadda.
Duqa Muqdisho ayaa sheegay in wadadan cusub ay kor u qaadi doonto is dhexgalka iyo isku socodka degmada Yaaqshiid isla markaana ay noqon doonto mid isku xirta deegaanada kale, waxa uuna sheegay in maamulkiisa uu sii wadi doono howlaha bilicda iyo casriyeynta magaalooyinka si ay u noqoto mid la jaan qaada heerarka kale. meelaha.
Munaasabadda ayaa waxaa ka soo qeyb galay Guddoomiyaha Degmada Yaaqshiid Suleymaan Fargax, Agaasimayaasha Maamulka Gobolka Banaadir, Ganacsato, Odayaasha Degmada iyo qeybaha kala duwan ee Bulshada Degmada Yaaqshiid.