AFGOOYE (KAAB TV) -Xiisad u dhexeysa ciidamada dowladda Soomaaliya iyo Al-shabaab ayaa tan iyo shalay ka taagneyd deegaanka Sabiid oo ku dhow degmada Afgooye ee gobolka Shabeellada Hoose.
Dadka deegaanka ayaa cabsi soo wajahday, iyadoo dadka qaar ay u carareen dhanka Afgooye si ay uga badbaadaan dagaal ka qarxa, maadaama dagaal u dhaxeeya labada dhinac uu u muuqdo mid ku soo wajahan deegaanka Sabiid oo ay hadda gacanta ku hayaan Al-Shabaab. Kooxda ayaa deegaanka la wareegtay todobaad ka hor.
Dagaallo culus ayaa dhowr jeer gobolka ka dhacay, kuwaasoo ku qasbay ciidamada dowladda Soomaaliya inay isaga baxaan, kaddib markii ay cadaadis xooggan kala kulmeen weerarro joogto ah oo Al-shabaab.
Sidoo kale, deegaanka Awdheegle oo ku dhow Sabiid ayaa waxaa ka dhacay barakac xooggan oo ay sameynayaan dadka deegaanka, kadib markii ay soo baxeen xiisado colaadeed. Arrintan ayaa ka dambeysay markii ciidamada dowladda Soomaaliya ay isku dayeen in ay dib ula wareegaan deegaankaasi oo weli gacanta ugu jira Al-Shabaab.
Inta lagu guda jiro bisha Ramadaan, Al-Shabaab ayaa kordhisay howlgallada ay ka fulinayaan labada gobol ee Shabeellaha Hoose iyo Shabeellaha Dhexe, iyagoo ku guuleystay inay dib u soo ceshadaan deegaano dhowr ah, taasoo dhabar jab weyn ku ah maamulka dowladda Soomaaliya ee gobolladaasi.