Abshir Bukhaari oo ah Wasiiru Dowlaha Madaxtooyada ee Xukuumadda Xasan Sheekh Maxamuud ayaa ku safraayay baasaboorka diblomaasiga Soomaaliya, hase yeeshee ilo hay’adaha amaanka ayaa Kaab TV u sheegay inuu sidoo kale haysto baasaboorka dalka Kenya, oo la tuhunsan yahay inuu sifo sharci darro ah ku heley.

Ilaha oo aan dooneynin inaan magacyadooda u adeegsano warbixintan ayaa sheegay in Abshir Bukhaari oo la socday diyaarad ka timid Muqdisho, isagoo sidoo kale watay lacag caddaan ah oo boorso ku jirtay taasoo cadadkeeda aan la sheegin.

Su’aalo ay weydiiyeen qeybta socdaalka iyo saraakiil ka tirsan waaxda la dagaallanka argagixisada ayaa ka dib waxaa loo tarxiilay Magaalada Muqdisho.

Saraakiisha amaanka ayaa rumeysan in lacagahan, iyo raad hore oo ay ku daba jireen ay suuragal tahay in loo adeegsan karo maalgalin argagixiso iyo lacag dhaqid.

Kooxaha argagixisada ayay Kenya sheegtay inay lacago badan soo galiyaan Kenya, kuwaas oo qaarkood lagu maalgaliyo guryo iyo ganacsiyo aan sharci ahayn balse ujeedkoodu yahay in lagu raadtiro asalka lacagta ka timid argagixisada ama sifo sharci darro ah.

Waa mas’uulkii labaad ee ka tirsan xukuumadda Xasan Sheekh Maxamuud oo laga musaafuriyo Kenya.

Dhammaadkii bishii hore ayay ahayd markii ay waaxda socdaalka Kenya sheegtay inay dalkeeda ka musaafurisay Ra’isul Wasaare ku Xigeenka Soomaaliya, Jibriil Cabdirashiid Xaaji kaas oo dalka Kenya kugalay baasaboorka diblomaasiga Soomaaliya hase yeeshee lagu heley baasaboor kale oo Kenyaan ah oo la aaminsan yahay inuu ahaa “been abuur”.

Jibriil ayaa habeen ku xirnaa garoonka diyaaradaha ee Jomo Kenyatta ee magaalada Nairobi ka hor intii aan dib loogu celin Muqdisho Jimcihii 26 June 2026.

Dowladda Kenya ayaa dhowaanahan wadday ol’ole ka dhan ah dukumintiyada been abuurka gaar ahaan baasaboorka Kenya oo dowladdu sheegtay inay dad badani si sharci darro ah ku qaateen kuwaasoo Soomaali u badan.

Warbaahinta Kenya ayaa sidoo kale baahisay caddeymo dad la aaminsan yahay inaysan u dhalan Kenya balse ay si sharci darro ah ku heleen baasaboorka dalka Kenya.

Abshir Bukhaari kama jawaabin eedeymahan.

Sidoo kale, xukuumadda Soomaaliya ayaan weli ka hadlin musaafurinta Abshir Bukhaari iyo kiiska Ra’isul Wasaare ku Xigeenka Jibriil ee dalka Kenya laga soo musaafuriyay bishii hore.

Talaabooyinkan ayaa imaanaya xilli ay Soomaaliya gashay cakirnaab siyaasadeed ka dib markuu dhammaaday waqtiga hay’adaha Dowladda Federaalka oo ku ekaa 15 May 2026 iyadoo rabshado hubeysan oo ka qarxay caasimadda horraantii June ay sababeen dhimasho dhaawac, iyo barakac.

Ilaha amaanka Kenya waxay kaloo rumeysan yihiin in xubno siyaasiyiin ah oo ka yimaada Soomaaliya ay kug leeyihiin abaabulka maleeshiyooyin hubeysan iyo hurinta colaada laga abaabulayo deegaano xuduudda Kenya ah taasoo amni darro u keeni karta shacabka Kenya.

The post Sirdoonka Kenya oo xiray ka dibna musaafuriyay Abshir Bukhaari appeared first on Kaab TV.

Xarumaha isgaarsiinta ee Yaaqbariweyne, Leego, Goobaanle, Baladul-Amiin iyo Ceeldheere ayaa hadda dib loo hawlgeliyay, waxaana dadka deegaanka ay sheegeen in ay mar kale heli karaan adeegyada internet-ka, wicitaanka iyo lacagaha mobile-ka ee shirkadda Hormuud.

Dadka deegaanka ayaa Kaab TV u sheegay in shirkaddu dib u furtay khadadka internet-ka iyo adeegga EVC, kaas oo muhiim u ah nolol maalmeedka dadka, maadaama lacagta elektaroonigga ah ay noqotay habka ugu weyn ee wax lagu kala iibsado Soomaaliya, gaar ahaan deegaannada aan si buuxda uga shaqayn shilinka Soomaaliga.

Mid ka mid ah dadka ku sugan degmada Leego ayaa sheegay in markii ugu horreysay muddo dheer ay hadda awoodaan inay EVC wax ku iibsadaan, gaar ahaan suuqyada xoolaha iyo raashinka oo ay ku tiirsan yihiin bulshada xoolaleyda ah.

Adeegyada isgaarsiinta ayaa laga joojiyay deegaannadan bishii Febraayo 2021, kaddib markii Al-Shabaab ay amar ku bixisay in la hakiyo adeegyada shirkadaha isgaarsiinta ee deegaankan ka hawlgalayay.

Taasi waxay ka dhigan tahay in bulshada ku nool deegaannadan ay ku jireen go’doon isgaarsiineed iyo mid dhaqaale muddo ku dhow shan sano.

Intii uu socday xayiraaddaas, deegaannada Yaaqbariweyne, Leego iyo Goobaanle ayaa sidoo kale wajahday dhibaatooyin kale, oo ay ku jiraan gubidda hanti iyo tuulooyin ay dad shacab ah ku noolaayeen, iyo dhac loo geystay xoolaha nool sida ariga iyo geela, kaddib markii qaar ka mid ah dadka deegaanka ay taageereen maleeshiyaadka Macawiisleyda ee dagaalka kula jiray Al-Shabaab.

Al-Shabaab ayaa sidoo kale weeraro qaraxyo ku qaaday deegaanadan si ay cadaadis u saaraan dadka deegaanka oo ka hor yimid.

Sanadkii 2021, siyaasigii ugu horreeyay ee si cad uga hadlay arrintan wuxuu ahaa Cabdiraxmaan Cabdishakuur Warsame, kaas oo cambaareeyay tallaabada Al-Shabaab iyo dhibaatooyinka ay kooxda ka geysatay deegaannada Yaaqbariweyne, Leego iyo Goobaanle.

Sidoo kale, sanadkan 2026, isticmaalka shilinka Soomaaliga ayaa gebi ahaanba hakad galay deegaannadan, taas oo sii kordhisay culayska dhaqaale ee shacabka.

Dadka deegaanka ayaa sheegay in xaaladdan, oo ay weheliso xannibaadda adeegyada isgaarsiinta iyo lacagaha mobile-ka, ay sababtay dhibaatooyin nololeed oo aad u daran, oo ay ku jiraan dhimashooyin la xiriiray gaajo.

Dib u furista adeegyada isgaarsiinta ayaa kusoo beegmaysa xilli Al-Shabaab ay wajahaysay cabashooyin sii kordhaya oo ka imaanayay dadka ku nool deegaannada ay maamusho, gaar ahaan sababo la xiriira culayska dhaqaale iyo xaaladda bani’aadantinimo ee ka dhalatay abaarta iyo cunto yarida ka jirta Soomaaliya.

Inkasta oo Al-Shabaab ay oggolaatay dib u howlgelinta adeegyada, shirkadda Hormuud weli kama aysan hadlin heshiiska ama wada-hadallada ay la yeelatay kooxda si dib loogu furo xarumahaas.

Shirkadda, oo ah tan ugu weyn dhinaca isgaarsiinta Soomaaliya, sidoo kale inta badan kama hadasho xaaladaha adeegyada laga hakiyo deegaannada ay maamusho Al-Shabaab.

Dhanka kale, hay’adaha Dowladda Federaalka Soomaaliya ayaan weli si rasmi ah uga hadlin isbeddellada ka dhacay deegaannadan, kuwaas oo saameyn ku leh dhinacyada amniga, dhaqaalaha iyo adeegyada bulshada.

Arrintan ayaa mar kale muujinaysa saameynta weyn ee ay leedahay maqnaanshaha dowladnimada iyo adeegyada aasaasiga ah ee deegaannada ay kooxaha hubeysan maamulaan, halka shirkadaha gaarka loo leeyahay ay mararka qaar noqdaan kuwa si toos ah ugu lug leh helitaanka ama maqnaanshaha adeegyada muhiimka ah ee shacabka.

The post Al-Shabaab iyo Hormuud Telecom oo isgaarsiinta u fasaxay qeybo ka mid ah Shabeellaha Hoose appeared first on Kaab TV.

Ka dib toddobaadyo ay hakad ku jireen wada hadallada ayaa waxay furmeen Isniintii markaas oo labada dhinac isa soo hor fariisteen.

Wada hadalladan aya salka ku haayaykhilaafka iyo ismari-waaga illaa hadda taagan ee ka dhashay muddo kororsiga Xasan Sheekh Maxamuud oo waqtigiisu dhammaaday 15 June 2026, halka Golaha Baarlamaankuna uu waqtigiisu dhammaaday bartamihii Abrril 2026.

Magaalada Muqdisho ayaa ka dib martigalisay iska hor imaadyo hubeysan bishii June oo u dhexeeyay ciidamada taabacsan mucaaradka iyo xooggaga dowladda oo taabacsan madaxweynaha waqtigiisu dhammaaday ee Xasan Sheekh.

Dad ka badan 10 ayaana ku dhintay, iyadoo boqollaal kalana ay ku barakeceen iska hor imaadyada oo ka dhacay degmooyinka Hawl-wadaag, Cabdicasiis iyo Wardhiigley.

Xubnaha beesha caalamka ee wada hadallada dhex dhexaadinaya

Bilawgii wada hadalladan Turkida oo kaliya ayaa dhex dhexaadinayay.

Hase ahaatee ka dib markii mucaaradka ay dhaliileen doorka Turkida ee loo arkay inay la jirsadeen dhanka xukuumadda Xasan Sheekh, ayay mucaaradka dalbadeen in beesha caalamka lagu daro doorka dhex dhexaadinta.

Diblomaasiyiinta UK, Mareykanka, Midowga Yurub, Qaramada Midoobay iyo Xafiiska Midowga Afrika ayaa deedna lagu soo daray xubnaha ajnabiga ee dhex dhexaadinaya wada hadalladan oo ay tahay in xal loogu helo khilaafka doorashooyinka Soomaaliya hortaagan.

Illaa afar jeer oo ay wada hadalladaan dheceena, waxayna dhowr jeer la kulmeen caqabado ku saabsan qodobada laga dooday, oo dhinacyadu kala wataan aratiyo is diidan.

Maxaa la isku qabtay?

Kulanka Isniintii ka furmay hoteel ku yaalla garoonka Muqdisho, ayaa waxaa ka qeyb galay wakiillo ka socday Dowladda Federaalka iyo xubno matalayay Golaha Mustaqbalka iyo garabyada kale ee mucaaridka, iyadoo diiradda lagu saarayay sidii loo heli lahaa is-afgarad ku saabsan nooca doorashada ee Soomaaliya ay qaadanayso.

Doodda ugu weyn ee la isku mari-wayey ayaa noqotay hannaanka loo qabanaayo doorashada, guddiyada doorashada magacaabistooda iyo cidda awoodda u leh.

Kaab TV ayaa ogaatay in isbahaysiga mucaaradka – oo ku mideysan Golaha Mustaqbalka Soomaaliya – ay doonayaan in la abuuro guddi doorasho oo labo heer ah: heer federaal iyo heer dowlad gobolleed, si waafaqsan nidaamkii doorashada 2021/2022.

Mucaaradka, oo ay ku jiraan dowlad goboleedyada Puntland iyo Jubalanad, ayaa sidoo kale qaba in kuraasta baarlamaanka ee ku saleysan hannaanka qabiilka ee 4.5 sidooda loo daayo, hase yeeshee la kordhiyo tirada ergada wax dooraneysa, iyo goobaha lagu dooranaayo, si lo hubiyo in tartanku noqdo mid dadka oo dhan u furan.

Ilo wareed ku dhow mucaaradka ayaa Kaab TV u sheegay in wakiilada Xasan Sheekh ee shirka fadhiyay ay ku adkeysteen in guddiga doorashada ee lagu muransan yahay ee hadda jira uu sii ahaado midka qabanaya doorashada.

Guddiga doorashada ee hadda jira oo ka kooban 9 xubnood ayaa la sameeyay dhammaadkii sanadkii 2025, iyada oo dowlad goboleedyada qeybta ka ah federaalka ay diideen. Waxaana illaa haatan guddigaasi ay yihiin “kuwo lagu muransan yahay”.

Villa Soomaaliya waxay kaloo dooneysaa in aan la sameyn oo kaliya hal guddi uu wada qabto doorashada.

Golaha Mustaqbalka iyo garabyada kale ee mucaaridka ayaa sheegay inay iyaguna taageersan yihiin doorasho qof iyo cod ah, balse ay ku doodayaan in marxaladdan kala-guurka lagu saleeyo habka awood-qaybsiga ee 4.5 si loo xaqiijiyo kalsoonida dhinacyada siyaasadda iyo saamiga beelaha.

Deegaanada Al-Shabaab ay maamulaan

Lagama hadlin sida laga yeelaayo deegaanada ay ka taliyaan kooxda Al-Shabaab, oo ah inta badan deegaanada koonfurta iyo bartamaha Soomaaliya.

Waxaan sidoo kale caddeyn jiritaanka maamulka Waqooyi Bari oo xaruntiisu tahay Laascaanood, kaas oo sameysmay bishii August 2025, isla markaana Dowladda Federaalka ay aqoonsatay.

Mucaaridka ayaa sidoo kale si adag uga horyimid doorashooyinka ay Dowladda Federaalka ka waddo qaar ka mid ah dowlad-goboleedyada, iyagoo ku eedeeyay dowladda inay faragelin ku hayso geeddi-socodka doorashooyinka heer dowlad-goboleed.

Doorasho kooban oo Villa Soomaaliya ay taageertay ayaa hoggaan cusub loogu sameeyay Koonfur Galbeed bishii June. taasi waxay dhacday ka dib markii madaxweynihii maamulkaasi Cabdicasiis Laftagareen ay Baydhado ka saareen ciidanka Dowladda Federaalka iyo maleeshiyaad qabaa’il oo ay dowladdu xulufeysatay.

Dagaalo ka dhashay faragelinta Villa Soomaaliya ay ku sameysay maamulka Koonfur Galbeed, oo u dhexeeya ciidamada Laftagareen oo sheeganaya inuu yahay weli madaxweynaha rasmiga ee Koonfur Galbeed iyo kuwa hoggaamiyaha cusub Aadan Madoobe ayaa si joogto ah uga dhaca Baydhabo iyo duleedyadeeda.

Waxaa sidoo kale cadaadis ay dowladdu saartay hoggaanka Galmudug uu horseeday in Madaxweynihii maamulkaasi Axmed Cabdi Kaariye “Qoor Qoor” uu ku dhawaaqay inuu ka tanaasulay u tartanka xilka. Waxaana la rajeynayaa musharrax ay taageereyso Dowladda Federaalka uu noqdo hoggaamiyaha cusub ee Galmudug.

Hirshabeelle ayaa la filayaa in dhowaan ay ka bilaabato hannaan doorasho oo ay meelmarineyso Dowladda Federaalka.

Ilaha ayaa Kaab TV u sheegay in Dowladda Federaalka ayaa diidday in qodobka doorashooyinka dowlad gobolleedyada si rasmi ah looga doodo intii uu socday kulanka.

Ilo diblomaasiyadeed ayaa sheegay warbahinta in wakiillada Beesha Caalamka ay hadda ka shaqeynayaan soo jeedin cusub oo lagu doonayo in lagu soo afjaro ismari-waaga siyaasadeed.

Xalku muxuu noqon karaa?

Sida xogaha hordhaca ah ay tilmaamayaan, qorshaha la diyaarinayo ayaa noqon kara hannaan isku-dhafaya aragtiyaha Dowladda Federaalka iyo kuwa mucaaridka.

Qorshahaas ayaa la sheegay inuu ka koobnaan karo:

• In dalka laga qabto doorasho qof iyo cod ah muddo kooban gudaheed.
• In la dhiso hal guddi doorasho oo mideysan oo ay ku wada jiraan dowladda iyo mucaaridka.
• In la helo hannaan lagu xaqiijinayo kalsoonida dhinacyada iyadoo aan la dhaawaceyn geeddi-socodka dimuqraadiyeynta.

Inkastoo labada dhinac ay isku raacsan yihiin in Soomaaliya u gudubto doorasho qof iyo cod ah, haddana khilaafka ugu weyn ayaa weli ka taagan qaabka loo wajahayo doorashada.

Hase yeeshee cidda maamuleysa doorashada iyo helitaanka aaminaad ay dhammaan dhinacyada siyaasadda ku qabi karaan hannaanka doorashada ayaa weli ah qodob ay dood badani ka jirto, isla markaana sii kordhinaya cakirnaanta siyaasadeed iyo midda amni ee ka taagan Soomaaliya.

Kulankii shalay ayaa waxaa uu muujinaya in wali ay jirto kala aragti duwanaan weyn oo ku saabsan hannaanka doorashooyinka, inkastoo labada dhinac ay mabda’ ahaan isku raacsan yihiin in dalka loo jiheeyo doorasho qof iyo cod ah.

Khilaafku wuxuu inta badan ku saabsan yahay qaabka loo hirgelinayo nidaamkaas iyo dammaanadaha siyaasadeed ee lagu xaqiijinayo kalsooni dhex marta dhinacyada.

Dadka falanqeeya arrimaha siyaasadda Soomaaliya ayaa waxay ku doodayaan in is-mari-waaga haddii uu sii socdo uu horseedi karo muran ku saabsan sharciyadda hoggaanka iyo xasillooni-darro ka hor doorashooyinka, taasoo sababi karta in dib loogu laabto iska horimaadyo hubeysan maadaamaa dhammaan dhinacyada siyaasadda isku haya ay hubeysan yihiin.

The post Maxaa fashiliyay wada-hadalladii doorashada Soomaaliya? appeared first on Kaab TV.

Ciidamada ammaanka Puntland ayaa sheegay inay gacanta ku dhigeen inta badan askartii ka tirsanaa ciidanka gaarka ah ee PSF oo aroornimadii hore ee Isniinta isku dayay inay ka dhaqaaqaan Boosaaso iyaga oo ku jeeday dhanka degmada Xaafuun ee xeebta gobolka Bari.

Puntland waxay sheegtay inay la wareegtay 8 baabuur dagaal oo ay lahaayeen ciidamada PSF.

Dhacdadan ayaa dib u soo cusbooneysiisay khilaaf muddo dheer soo jiitamayay oo u dhexeeyay dowladda Puntland iyo PSF, kaas oo ku salaysan arrimo la xiriira cidda maamusha ciidamada gaarka ah, awoodda amniga, iyo loollanka siyaasadeed ee u dhexeeya Puntland iyo dowladda federaalka Soomaaliya.

Maxay yihiin PSF?

Puntland Security Force (PSF) waa ciidan gaar ah oo si heer sare ah loo tababaray, kaas oo la aas aasay sannadkii 2002.

PSF-tu waxaa markii hore taageero ka siin jiray hay’adda sirdoonka Mareykanka ee CIA, oo siin jirtay tababar, qalab iyo dhaqaale, waxaana loo adeegsan jiray hawlgallada ka dhanka ah kooxaha looga shakisan yahay argagixisada ee ka howlgala buuraha iyo deegaanada Puntland.

Waxay caan ku ahaayeen qab-qabashada shakhsiyaadka looga shakiyo inay xiriir la leeyihiin kooxaha xagjirka.

Xarunta PSF waxay ku taallaa magaalada Boosaaso, wuxuuna ciidankoodu inta badan ka koobnaa xubno ka soo jeeda beesha Cismaan Maxamuud (Majeerteen).

Sannadkii 2010, PSF ayaa u kala jabtay laba garab. Mid ka mid ah wuxuu noqday ciidan loo yaqaan PIA, halka garabkii kale uu sii watay magaca PSF.

Inkasta oo PSF markii hore ka shaqeynaysay amniga Puntland, haddana muddo kadib waxay noqotay ciidan aan si buuxda uga amar qaadan dowladda Puntland, iyadoo hoostagaysay sarkaal la dhashay General Asad Cismaan Cabdullaahi (Asad Diyaano), oo hadda ah taliyaha booliska dowladda federaalka Soomaaliya.

Diyaano ayaa markii hore ahaa taliyaha PSF kahor inta uusan ku wareejin walaalkiis Maxamuud Cismaan Diyaano.

Khilaafkii hore ee Puntland iyo PSF

Khilaafka ugu weyn wuxuu qarxay sannadkii 2019, kaddib markii Asad Diyaano uu ku guuldareystay doorashadii madaxtinimada Puntland, taas oo uu ku guuleystay Siciid Cabdullaahi Deni.

Kadib doorashada, Madaxweyne Deni wuxuu xilka ka qaaday taliyihii PSF Maxamuud Cismaan Diyaano.

Generaal Diyaano ayaa diiday inuu xilka ka dego. Arrintaas waxay sababtay dagaallo culus oo magaalada Boosaaso ku dhex maray bishii December 2021 garabka PIA ee hoostagayay dowladda Puntland iyo PSF-ta General Diyaano.

Dowladda Puntland ayaa markii dambe ku dhawaaqday in la kala diray PSF, waxayna sameysay ciidan cusub oo loo bixiyay PISA, kaas oo hoos yimaada maamulka Puntland.

Doorka dowladda federaalka iyo xiisadda cusub

Markii uu sii xoogaystay khilaafka siyaasadeed ee u dhexeeya Puntland iyo dowladda federaalka, General Asad Diyaano ayaa u baqoolay Muqdisho, waxaana loo magacaabay taliyaha booliska Soomaaliya, isagoo xiriir siyaasadeed la yeeshay Madaxweyne Xasan Sheekh Maxamuud.

Bishii Oktoobar 2024, dowladda federaalka Soomaaliya ayaa sheegtay inay PSF ku dartay ciidamada dowladda federaalka, iyadoo loo aqoonsaday ururka 17-aad ee ciidamada federaalka, isla markaana la sheegay in askartaasi ay heli doonaan mushahar iyo taageero dowladeed.

Dowladda federaalka ayaa sidoo kale sheegtay inay dhiseyso talis ciidan oo ay ka qortay gudaha Puntland, taas oo dhalisay walaac iyo xiisado ka dhacay magaalooyinka Garowe, Boosaaso, Galdogob iyo Gaalkacyo.

Arrintan waxay sidoo kale ka mid ahayd sababihii sababay iska horimaadyo hubeysan Garowe bartamihii 2023, xilligaas oo Puntland ay ku dhawaaqday doorashooyinka goleyaasha deegaanka, taas oo dowladda federaalka si weyn uga soo horjeesatay.

Xiisaddii Garowe iyo General Takar

Toddobaadyadii lasoo dhaafay waxaa sidoo kale xiisad ka jirtay magaalada Garowe iyo iska horimaad kooban, kaddib markii uu halkaas yimid General Jimcaale Jaamac Takar, oo ka soo jeeda beesha Ciise Maxamuud (Majeerteen).

General Takar waxaa dowladda federaalka u magacawday taliyaha guutada 54-aad ee ciidanka federaalka ee la sheegay inay ku sugan yihiin Puntland. Wuxuu Muqdisho kasoo duulay, isagoo kasoo degay Laascaanood, kadibna dhulka ku yimid Garowe.

Puntland ayaa tan iyo dhammaadkii bishii May 2026 ciidamo badan geysay duleedka Garowe, taasoo sare u qaaday walaaca laga qabo iska horimaad kale.

Xiisadda Garowe ayaa yara degtay kadib markii odayaal dhaqameed ay dhex galeen, waxaana la sheegay inuu dhacay is-afgarad hordhac ah, sida uu baahiyay Kaab TV.

Dhaqdhaqaaqyada PSF iyo dagaalka Boosaaso

Ka hor xiisadda cusub ee Boosaaso, ciidamada PSF ayaa dhaqdhaqaaqyo ka waday deegaanada Boosaaso iyo Xaafuun ee xeebaha gobolka Bari, taasoo dowladda Puntland si weyn uga digtay.

Isniintii 20-ka July, ciidamada Puntland ee laga keenay buuraha Calmiskaad ayaa la geeyay waddada isku xirta Boosaaso iyo Garowe.

Dadka deegaanka ayaa sheegay in ciidamadan loo diray halkaas kaddib markii Puntland ay ogaatay in cutubyo ka tirsan PSF ay kasoo baxeen Boosaaso una dhaqaaqeen dhanka Xaafuun.

Puntland waxay sheegtay inay fulineyso amar uu bixiyay Madaxweyne Deni oo mamnuucaya in hub culus lagu dhex wato magaalooyinka iyo deegaanada maamulka.

Puntland oo ku eedeysay dowladda federaalka

War kasoo baxay barta howlgalka la dagaallanka argagixisada ee Puntland ayaa lagu sheegay in ciidamada Puntland ay la dagaallameen “ciidan uu maalgelinayo Madaxweyne Xasan Sheekh Maxamuud” oo lagu eedeeyay inuu qalqal amni ka waday gobolka Bari.

Madaxweyne Siciid Cabdullaahi Deni ayaa toddobaad ka hor sheegay in aan la aqbali karin cid hub iyo xoog ku dhex joogta deegaanada Puntland, isagoo digniin u diray cid kasta oo isku dayda inay awood ciidan ku isticmaasho gudaha maamulka.

Ilaa hadda General Asad Diyaano kama uusan hadlin xiisadda cusub ee Boosaaso iyo dagaalka u dhexeeya Puntland iyo ciidamada PSF.

Sidoo kale dowladda federaalka Soomaaliya, inkasta oo ay horey u sheegtay in ciidamo ka tirsan dowladda ay ku sugan yihiin Boosaaso iyo deegaano kale oo Puntland ah, ayaan weli si rasmi ah uga hadlin iska horimaadkan.

Villa Soomaaliya ayaan sidoo kale wax war ah kasoo saarin dhacdooyinka cusub ee Boosaaso.

Xiisadda hadda ka taagan Boosaaso waxay u muuqataa inay tahay isku dhaf ka kooban khilaaf amni, loollan siyaasadeed oo u dhexeeya Puntland iyo dowladda federaalka, iyo muran ku saabsan cidda xaqa u leh inay maamusho ciidamada hubeysan ee ka howlgala deegaanada Puntland.

The post Puntland vs PSF: Maxay salka ku haysaa xiisadda Boosaaso? appeared first on Kaab TV.

Burnham, oo hore u ahaa Duqa Magaalada Greater Manchester isla markaana ka tirsan Xisbiga Labour, ayaa sheegay in mudnaanta koowaad ee xukuumaddiisu ay noqon doonto wax ka qabashada sicir-bararka, dib-u-habaynta adeegyada dadweynaha, kobcinta dhaqaalaha, iyo xasillinta siyaasadda dalka.

Markii uu khudbaddiisii ugu horreysay ka jeediyay afaafka xafiiska Number 10 Downing Street, Burnham wuxuu ballan qaaday inuu hirgelin doono qorshe muddo 10 sano ah oo uu ku sheegay inuu dib u habayn ku samayn doono siyaasadda iyo dhaqaalaha Britain.

Maxaa sababay iscasilaadda Keir Starmer?

Keir Starmer ayaa iska casilay xilka Ra’iisul Wasaaraha UK iyo hoggaanka Xisbiga Labour Party kadib cadaadis siyaasadeed oo xooggan oo uga yimid gudaha xisbiga iyo shacabka.

Starmer ayaa xilka hayey labo sano oo kaliya.

Starmer ayaa Labour ku hoggaamiyay guul weyn doorashadii guud ee 2024, isagoo helay aqlabiyad baarlamaan, balse taageeradiisa ayaa hoos u dhacday sababo ay ka mid yihiin dhibaatooyinka dhaqaale sida qiimaha nolosha oo sare u kacay iyo cadaadiska saaran qoysaska, niyad-jabka shacabka oo ku saabsan in ballanqaadyadii isbeddelka aan si degdeg ah loo arkin, khilaafaad gudaha Xisbiga Labour ah oo ku saabsan jihada dowladda iyo hoos u dhac taageero oo ka muuqday doorashooyinka maxalliga ah iyo codbixinta shacabka.

Xisbiga Labour ayaa xubnihiisu waxay muddo ku cadaadinayeen Raisul Wasaare Starmer inuu iscasilo.

Starmer ayaa iscasilaaddiisa u gudbiyay Boqor Charles III, kaas oo aqbalay, taasoo furtay waddada hoggaamiye cusub oo Labour ah.

Durb ra’isul wasaaraha cusub ayaa billaabay dhismaha xukuumaddiisa.

Sidoo kale, wuxuu ku dhawaaqay inuu doonayo in awood dheeraad ah loo wareejiyo gobollada UK, isagoo ku saleynaya khibraddiisa hoggaamineed ee Greater Manchester.

Sidee Andy Burnham ku noqday Ra’iisul Wasaaraha UK?

Andy Burnham kuma uusan imaan doorasho ka dhacday UK.

Inkastoo mucaaradka ay ku baaqeen in la qabto doorasho guud, haddana taasi ma ay dhicin.

Nidaamka siyaasadeed ee UK wuxuu oggol yahay in xisbiga talada haya uu beddelo hoggaamiyihiisa, markaa qofka cusub ee noqda hoggaamiyaha xisbiga talada haya wuxuu rasmi ahaan noqonayaa Ra’iisul Wasaare haddii uu haysto taageerada aqlabiyadda baarlamaanka.

Andy Burnham oo 56 jir ah ayaa heley aqbaliyadda baarlamaanka oo aan diidin inuu dalka hoggaamiyo.

Dabcan Burnham ma ahan nin ku cusub siyaasadda.

Wuxuu soo noqday Duqa Greater Manchester isla markaana hore u soo noqday wasiir ka tirsan dowladdii Labour iyo xildhibaan hore.

Waa nin codkaar ah oo dhanka waqooyi ee dalka kasoo jeeda, aadna uga hadla xaaladaha nololeed ee dadka iyo maamul daadejinta.

Maxaa horyaalla Andy Burnham?

Ra’iisul Wasaaraha cusub wuxuu wajahayaa caqabado waaweyn. Waxaana laga sugayaa inuu wax ka qabto arrimaha ay ka midka yihiin inuu hoos u dhigo qiimaha nolosha oo aad qaali u noqday sanadahan dambe.

Waxaa kaloo laga filayaa inuu soo celiyo dhaqaalaha liita ee UK oo tan iyo 2019 hoos u socday ka dib ka bixitaankii Yurub.

Sidoo kale, waxay tahay inuu dib u habeeyo adeegyada caafimaadka iyo guryaha oo dadku ay dhib badan ku qabaan, iyo wax ka qabashada dhibaatada hoy la’aanta.

Mid kale oo caqabadaha ka mid ah ayaa ah inuu mideeyo Xisbiga Labour kadib kala qaybsanaantii hoggaanka, iyo inuu abuuro kalsooni shacabka ka hor doorashada guud ee xigta.

UK waxay xiriir dhow la leedahay Yurub iyo Mareykanka, hase ahaatee ma ahan caqabad la’aan, waxaana Andy Burnham u yaalla siduu isugu wadi lahaa danaha Ingiriiska, Mareykanka iyo Yurub, iyo sidoo kale taageerada UK ay siiso Ukraine oo ku jirta dagaal ay kula jirto Ruushka.

The post Andy Burnham oo noqday Ra’iisul Wasaaraha cusub ee UK appeared first on Kaab TV.

Shirka oo ay isugu imaanayaan dowladda federaalka iyo mucaaradka ayaa lagu wadaa inuu ka bilowdo Muqdisho, iyadoo labada dhinac ay ka wada hadli doonaan arrimaha siyaasadda iyo mustaqbalka doorashooyinka dalka.

Hase yeeshee, madasha mucaaradka ee Golaha Mustaqbalka Soomaaliyeed, oo uusan ku jirin Farmaajo, ayaa si gaar ah uga qeyb geli doonta shirka, halka Villa Soomaaliya ay matali doonto dowladda uu hoggaamiyo Madaxweyne Xasan Sheekh Maxamuud.

Maxamed Cabdullaahi Farmaajo ayaa hadda hoggaamiya xisbiga Nabad iyo Nolol, waxaana uu sheegay inuu ka qeyb qaadanayo siyaasadda dalka.

Cabdiraxmaan Cabdishakuur Warsame, oo ka mid ah siyaasiyiinta ku jira Golaha Mustaqbalka Soomaaliyeed, ayaa sheegay in ku biirista Farmaajo ee madasha mucaaradka ay wiiqi karto mowqifka iyo dooda ay mucaaradku ka leeyihiin arrimaha siyaasadda.

The post Maxay mucaaradka Soomaaliya ku diidan yihiin Farmaajo? appeared first on Kaab TV.

The post Wariye ruugcaddaa Maxamuud Cabdi Ducaale oo ku geeriyooday London appeared first on Kaab TV.

Saleebaan Maxamuud Aadan ayaa xilkan guddoomiyaha Guurtida hayay tan iyo 18 kii August 2004, markaas oo uu geeriyoday guddoomiyihii Guurtida ee waqtigaas Sheikh Ibraahim Sheikh Yuusuf Sheikh Madar. Waana 22 sano ku dhowaad.

Saleebaan wuxuu Guurtida ka tirsanaa ku dhowaad 34 sano, sida uu sheegay Axaddii markii uu saxiixay warqaddii is-casilaaddiisa.

“Waxaan idinka codsanayaa inaad iga aqbashaan is casilaadda oo aad i fasaxdaan,” ayuu yiri Saleebaan.

Suleymaan, oo si weyn loogu yaqaano “Saleebaan Gaal” wuxuu haatan maraya 92 jir, waxaana loo arkaa inuu yahay mid ka mid ah siyaasiyiinta ugu da’da weyn Somaliland.

Dad badan ayaa u arkay tallaabada Saleebaan uu qaaday mid sax ah maadaama shaqada Guurtida u taalla ay tahay mid culus, una baahan qof saacado dheeraad ah shaqeyn kara.

Saleebaan ayaa sheegtay in duruufaha da’da iyo caafimaadkiisa darteed aanu sii wadi karin shaqada adag ee u taalla Guurtida Somaliland oo ah aqalka sare ee Golaha Baarlamaanka Somaliland.

Doorashada Guddoonka Guurtida

Isla maalinkii uu is-casilay guddoomiyihii Guurtida, waxaa codsiga musharraxnimada soo gudbiyay saddex musharrax.

Waa maxay shaqada Golaha Guurtida?

Maxaa horyaalla Guurtida?

Shaqada hortaalla Guurtida iyo guddoonkooda cusub waxay tahay inay ilaaliyaan doorkii dhaqameed ee goluhu lahaan jiray, isla markaana ay la jaanqaaddo baahida dowladnimada casriga ah ee Somaliland.

Guurtida oo in badan lagu eedeeyo inay horseedaan muddo kordhinta golayaasha dowladda oo sababtay in dhowr doorashooyinka golayaasha deegaanka dib loo dhigo, ayay tahay inay sidoo kale iska meyraan fadeexaddaasi, oo ay si dhab ah u muujiyaan adkeynta dimuqraadiyad ku saleysan ee doorashooyinka ay waqtigooda ku dhacaan.

Isbeddelka Golaha Guurtidu wuxuu noqon karaa fursad lagu xoojinayo kalsoonida shacabka, lagu kobcinayo nidaamka sharci dejinta, laguna ilaalinayo doorka odayaasha dhaqanka iyadoo aan laga tegin qiyamka bulshada Somaliland.

Dhanka kale, waxay isbeddelada Guurtida imaanayaan xilli Somaliland ay wajahayso marxalad siyaasadeed oo cusub kadib markii ay heshay aqoonsi caalami ah oo ay ka heshey Israel, tallaabadaas oo Somaliland ku tilmaantay guul taariikhi ah, balse sidoo kale dhalisay dood iyo walaac gobolka iyo caalamka ah.

Aqoonsigaas wuxuu Somaliland u keenayaa fursado cusub oo diblomaasiyadeed iyo dhaqaale, laakiin wuxuu sidoo kale kordhinayaa masuuliyadda saaran hay’adaha dowladda inay muujiyaan xasillooni, hufnaan iyo nidaam dowladeed oo shaqaynaya, iyo dhowridda ku dhaqanka dastuurka, oo ay ku jirto doorashooyin aan muddo dhaaf ahayn.

Sidaas darteed, mustaqbalka Golaha Guurtida Somaliland wuxuu ku xirnaan doonaa sida ay uga jawaabto laba baahi oo is barbar socda: ilaalinta doorkeedii taariikhiga ahaa ee nabadda iyo xasilloonida, iyo u gudubka hannaan dowladeed oo casri ah oo ku habboon Somaliland, oo raadinaysa aqoonsi iyo xiriir caalami ah.

The post Isbeddelka Golaha Guurtida wuxuu muujinayaa casriyeynta dowladnimada Somaliland appeared first on Kaab TV.

Ahmadinejad, oo xilligii uu xilka hayay si adag uga soo horjeeday Mareykanka iyo Israel, ayaa sannadihii dambe beddelay mowqifkiisa siyaasadeed, isla markaana la doonayay in loo adeegsado hoggaamiye beddeli kara nidaamka hadda ka jira Iran, kaasoo Israel iyo Mareykanka ay rabeen inay xukunka ka tuuraan.

Mahmoud Ahmadinejad, oo ahaa madaxweynaha Iran intii u dhaxeysay 2005 ilaa 2013, waxaa lagu xasuustaa hadallo adag oo uu ku weerari jiray siyaasadaha Mareykanka iyo Israel.

Xilligii uu talada hayay wuxuu noqday mid ka mid ah hoggaamiyeyaashii ugu muranka badnaa Bariga Dhexe, gaar ahaan sababo la xiriira hadalladiisa ku saabsan Israel, barnaamijka nukliyeerka Iran iyo xiriirka uu la lahaa reer Galbeedka.

Sanadihii ka dambeeyay markii uu ka degay xilka madaxtinimada, Ahmadinejad wuxuu muujiyay mowqifyo ka duwan kuwii hore, isagoo marar badan dhaliilay qaar ka mid ah hoggaanka diimeed ee Iran iyo habka maamulka dalka.

Wuxuu bilaabay adeegsiga luuqadda Ingiriiska, inuu beddelay qaabka uu bulshada ugu muuqdo, iyo inuu baraha bulshada ku baahiyay fariimo uu ku dhaliilayo nidaamka ay hoggaamiyaan wadaaddada Shiicada ah ee ka taliyaha dalka Iran.

Khilaafka kala dhexeeyay nidaamka Iran

Kadib markii uu ka baxay madaxtooyada, xiriirka Ahmadinejad iyo hoggaanka sare ee Iran ayaa xumaaday. Wuxuu si gaar ah u dhaliilay qaar ka mid ah siyaasadaha Aayatullaah Ali Khamenei iyo hay’adaha awoodda badan ee dalka kuwaas oo uu ku eedeeyay caburin dadweynaha iyo xadgudubyo ka dhan ah bani’aadannimada.

Waxaa sidoo kale la sheegay in dhaqdhaqaaqiisa siyaasadeed la xaddiday, inkastoo warbixinno kala duwan ay ku kala duwan yihiin heerka cadaadiska lagu saaray.

Ahmadinejad wuxuu isku dayay inuu mar kale u tartamo madaxtinimada Iran sannadihii dambe, balse waxaa laga hor istaagay inuu ka qeyb galo doorashooyinka.

Mareykanka iyo Israel ayaa u arkay Ahmadinejad qof suurtagal u noqon kara inuu hoggaamiyo Iran haddii nidaamka hadda jira uu dumo.

Wargeyska New York Times ayaa qoray in labada dal ay doonayeen inuu noqdo wejiga cusub ee Iran, maadaama uu hore uga soo dhex shaqeeyay nidaamka isla markaana uu lahaa taageero gudaha ah.

Waxaa sidoo kale sirdoonada CIA-da Mareykanka iyo Mossad ay diyaariyeen qorshe ciidan oo lagu weerarayo goob uu ku xirnaa ama lagu ilaalinayay Ahmadinejad, kadibna loo galbiyo meel ammaan ah si loogu diyaariyo hoggaan cusub.

Waxaa la sheegay in tan iyo 2024 ay qorshahan diyaarinayeen CIA iyo Mossad.

Safarkii Budapest iyo fasiraadaha ku xeeran

Sanadkii 2024, Ahmadinejad wuxuu ka qeyb galay shir ka dhacay Budapest, Hungary, oo looga hadlayay arrimaha isbeddelka cimilada.

Safarkaas ayaa lagu tilmaamay fursad lagu dhisayay xiriirro cusub oo caalami ah, halka kuwo kalena ay ku sheegeen inuu ahaa isku day lagu soo jiidanayay hoggaamiye hore oo Iran ah.

Shirka isbeddelka cimillada oo ay qabatay jaamacad ku taalla Budapest, caasimadda Hungary, ayaa waxaa hoosta qabanqaabiyay dowladda Hungary oo ay gadaal ka taagnaayeen sirdoonada CIA iyo Mossad, waxaana toos loogu sheegay inay casumaan madaxweynaha hore ee Iran.

Inkasta oo Ahmadinejad uu weli yahay qof saameyn ku leh siyaasadda Iran, gaar ahaan taageerayaasha doonaya isbeddel gudaha nidaamka, haddana awooddiisa siyaasadeed ayaa aad uga xaddidan sidii uu ahaa xilligii madaxtinimada.

Nidaamka siyaasadeed ee Iran waxaa weli gacanta ku haya hoggaanka diimeed, gaar ahaan xafiiska Aayatullaah Khamenei iyo hay’adaha amniga ee awoodda badan.

Wararka sheegaya in Ahmadinejad loo diyaarinayay inuu mar kale xukunka qabto waxay qayb ka yihiin doodaha ku saabsan mustaqbalka Iran iyo loollanka u dhexeeya kooxaha gudaha iyo quwadaha dibadda, balse ilaa hadda ma jiraan caddeymo la xaqiijiyay oo taageeraya sheegashada ah inuu jiray qorshe sirdoon oo lagu soo celinayo madaxtinimada.

Duqeymo socday tan iyo dhammaadkii Febraayo 2026 illaa bishii June horraanteedii ayay Mareykanka iyo Israel ku qaadeen Iran, kuwaas oo ay dileen qaar badan oo ka mid ah xubnaha hoggaanka wadaadada ka taliya Iran, oo uu ku jieray hoggaamiyiihi sare Cali Khamenei, saraakiil amni iyo wasiiro.

Hadda Iran waxaa xukunka haaya wiilkii Cali Khamenei, Qorshihii CIA iyo Mossad ayaa fashilmay, waxaana tan iyo markaasi wixii ka dambeeyay la waayey meel uu ku dambeeyay madaxweynihii hore.

The post Sirdoonada Israel iyo Mareykanka oo diyaarinayay Ahmadinejad inuu qabsado xukunka Iran appeared first on Kaab TV.

Warqad kasoo baxday Xafiiska Xeer Ilaaliyaha Guud, kuna socotay Taliyaha Booliiska Garoonka Diyaaradaha Aadan Cadde, ayaa lagu sheegay in Ascad Maxamuud Yuusuf loo haysto gal-dacwadeed lambarkiisu yahay G-1244/2026, kaas oo la xiriira dambiyada tahriibinta iyo ka ganacsiga dadka. Warqaddu waxay xustay in tallaabadaasi ku saleysan tahay qodobbada khuseeya Xeerka Ciqaabta Soomaaliyeed iyo shuruucda kale ee dalka.

Sida ku cad warqadda, baaritaanka waxaa qayb ka ah dacwooyin ay gudbiyeen saddex haween ah oo kala ah Ayaan Cabdullaahi Cali, Khadiijo Daahir Rooble iyo Falis Muumin Maxamed, kuwaas oo sheegay in laga qaaday baasaboorradoodii, isla markaana lagu marin habaabiyay ballanqaadyo la xiriiray safarro dibadda ah oo ay ku tilmaameen tahriib.

“Wareysiyo laga qaaday dhibbanayaasha ayay ku sheegeen in lacago laga qaaday, ka dibna loo tahriibiyay dal saddexaad taasoo halis galisay naftooda, ” ayuu yiri sarkaal ka tirsan Xeer Ilaalinta oo la hadlay Kaab TV.

Xeer Ilaaliyaha Guud ayaa sidoo kale xusay in 17-kii Juun 2026 Ascad Maxamuud Yuusuf loo diray warqad soo-wareejin ah oo lagu amray inuu xafiiska horgeeyo baasaboorrada dadka ay dacwaduhu quseeyaan, balse uusan fulin amarkaasi.

Sidoo kale, waxaa lagu sheegay in mar kale loogu yeeray xafiiska si uu uga jawaabo eedeymaha loo jeediyay, hase yeeshee uu ka baaqsaday inuu soo xaadiro.

Warqaddu waxay faraysaa Taliyaha Booliiska Garoonka Diyaaradaha Aadan Cadde inuu si degdeg ah u fuliyo amarka lagu soo xirayo Ascad Maxamuud Yuusuf, isla markaana loo horkeeno Xafiiska Xeer Ilaaliyaha Guud, Waxaa sidoo kale lagu sheegay inuu wajahayo eedeymo kale oo ku saleysan qodobbada 264, 285 iyo 505 ee Xeerka Ciqaabta Soomaaliyeed.

Dacwad ku oogista sarkaalka waaxda socdaalka Soomaaliya ayaa imaaneysa iyadoo ay jiraan eedeymo ku saabsan in baasaboorka diblomaasiga Soomaaliya loo adeegsado tahriibinta iyo kala gudbinta dadka sharci darrada ah ee ka imaanaya Soomaaliya, kuwaas oo ay jiraan dembilayaal.

Shalay oo Khamiis ahayd, waxay Midowga Yurub ku dhowaaqeen inay joojiyeen si ku meel gaar ah bixinta visooyinka baasaboorka Soomaaliya, iyadoo tallaabooyin dheer ah lagu soo rogay baasaboorka diblomaasiga ah.

The post Xeer ilaalinta Soomaaliya oo eedeyn ku oogtay sarkaal laanta socdaalka Muqdisho oo dad tahriibiyay appeared first on Kaab TV.