MUQDISHO (KAAB TV) – Dowladda Turkiga ayaa ka hadashay weerarkii shalay dagaalyahano ka tirsan Al-Shabaab ay ku qaadeen saldhiga ciidamada xoogga dalka Soomaaliyeed ay ku leeyihiin magaalada Ceel-Dheer ee gobolka Galgaduud ee maamulka Galmudug.
“Waxaan si adag u cambaareyneynaa weerarkan argagaxiso ee bahalnimada ah, waxaana u rajaynaynaa naxariista Alle kuwa ku dhintay. Waxaan tacsi u direynaa qoysaskooda iyo shacabka saaxiibada iyo walaalaha ah iyo dowladda Soomaaliya, waxaana u rajeyneynaa caafimaad degdeg ah inta ku dhaawacantay,” ayay tiri dowladda Turkiga. “Turkiga waxa uu sii wadi doonaa garab istaagga Soomaaliya ee dagaalka ka dhanka ah argagixisada” ayaa lagu yiri war ka soo baxay wasaaradda arrimaha dibadda ee Turkiga.
Ciidamada dowladda Soomaaliya ayaa la sheegay in ay heleen xogo hor leh oo ku saabsan weerarkaas, islamarkaana ay iska caabiyeen dagaalyahano ka tirsan Al-Shabaab oo weerar ku soo qaaday degmada Ceel-dheer ee gobolka Galgaduud, waxaana ka dhashay khasaare lixaad leh. War kasoo baxay dowladda Soomaaliya ayaa lagu sheegay in 47-dagaalyahan oo ka tirsan Al-Shabaab looga dilay dagaalka, halka 5-askari oo ka tirsan ciidamada dowladdana ay ku dhinteen dagaalka.
Iska horimaadkan ayaa waxa uu hoosta ka xariiqayaa dagaalka u dhaxeeya ciidamada dowladda Soomaaliya oo garab ka helaya dagaalyahanada deegaanka iyo kooxda Al-Shabaab. Difaacida lagu guuleystay ee Ceel-Dheer waxa ay muujineysaa adkeysiga iyo isku xirka ciidamada Soomaaliya si ay uga hortagaan khataraha mintidiinta ee gobolka.
Dowladda Turkiga ayaa si kulul u cambaareysay weerarkii fuleynimada ahaa ee ay dagaalyahannada Al-Shabaab ku qaadeen degmada Ceeldheer. Waxaa xusid mudan in Turkiga uu yahay saaxiibka dhow ee Soomaaliya, waxaana sanadkan labada dal ay kala saxiixdeen heshiis iskaashi oo dhanka difaaca iyo dhaqaalaha ah.
Turkiga ayaa saaxiib dhow la ah dowladda Soomaaliya, wuxuuna dhistay iskuullo, isbitaallo iyo kaabayaasha dhaqaalaha, wuxuuna deeq waxbarasho u fidiyay Soomaalida Turkiga.