Bangladesh (KAAB TV) -Qalalaasaha ka taagan Bangladesh ayaa ku qasbay dhammaan xarumaha dal-ku-galka Hindiya ee dalkaas in la xidho ilaa amar dambe. Dhanka kale, xaalada caadiga ah ayaa la filayaa inay ku soo noqoto Bangladesh iyadoo dawlada ku meel gaadhka ah ay dhaarin doonto fiidnimada Khamiista waxaana madax u ah Muhammad Yunus oo magaciisa ay soo jeediyeen hogaamiyayaasha ardayda kuwaas oo dalbanayay in la baabi’iyo kootada shaqooyinka rayidka ah.
Xarunta Codsiga Visa ee Hindiya (IVAC) Bangladesh boggeeda internetka waxay tiri: “Dhammaan IVAC-yadu way xirnaan doonaan illaa ogeysiis dheeri ah, sababtoo ah xaaladda aan degganeyn (Bangladesh).”
“Taariikhda soo socota ee codsiga waxaa lagu ogeysiin doonaa SMS waxaana la codsan doonaa in la qaato baasaboorka maalinta shaqada ee xigta,” IVAC ayaa sii raacisay.
Iska horimaadka iyo mudaaharaadyada ka dhacay Bangladesh ayaa 5-tii Agoosto isku bedelay rabshado ku qasbay Sheikh Hasina inay iska casisho ra’iisul wasaare oo ay ka cararto dalka.
Xiritaanka xarumaha fiisaha Hindiya ee Bangladesh ayaa timid maalin kadib markii New Delhi ay ka daadgureysay shaqaalaheeda aan muhiimka ahayn iyo qoysaskooda Guddigeeda Sare iyo Qunsuliyada Dhaka iyadoo ay jirto xaalad kacsan oo ka jirta waddanka deriska ah.
NDTV ayaa ka soo xigatay ilo ka tirsan dowladda in dublamaasiyiinta Hindiya, si kastaba ha ahaatee, ay ku sii sugnaan doonaan Bangladesh, howlgalladuna ay yihiin kuwo shaqeynaya.
Bangladesh, India waxay leedahay guddi sare oo ku yaal caasimadda Dhaka iyo qunsuliyadaha Chittagong, Rajshahi, Khulna iyo Sylhet.
Isagoo baarlamaanka uga warbixinaya xaaladda Bangladesh, Wasiirka Arrimaha Dibadda (EAM) S Jaishankar wuxuu ku wargeliyay in ku dhawaad 19,000 oo Hindi ah ay ku sugan yihiin waddanka deriska ah oo 9,000 ay yihiin arday.
Isagoo hadalkiisa sii wata ayaa sheegay in qaar badan oo ka mid ah ardaydaasi ay dib ugu laabteen dalka Hindiya, kadib markii ay mudaaharaadyadii ka dhaceen dalka Bangladesh.
Jaishankar wuxuu intaas ku daray in xukuumadda uu hoggaamiyo Ra’iisul Wasaare Narendra Modi ay xiriir dhow la leedahay bulshada Hindiya ee Bangladesh oo ay sidoo kale la socoto xaaladda la xiriirta dadka laga tirada badan yahay ee ku nool waddanka.