Muqdisho (KAAB TV) – Wasiirka arrimaha dibadda ee Soomaaliya Axmed Macallin Fiqi ayaa ku eedeeyay dowladda Itoobiya in ay “si firfircoon uga shaqeyneyso sidii ay u dhimi lahayd taageerada gobolka” ee Soomaaliya iyadoo abuureysa fikrado xunxun iyo faragelin ay ku heyso arrimaheeda gudaha.
Wasiir Fiqi oo kulan la qaatay guddiga arrimaha dibadda ee baarlamaanka Soomaaliya ayaa dhaliilay dadaallada ay Itoobiya ku dooneyso inay ku wiiqdo xiriirka Soomaaliya iyo saaxiibada.
Wasiir Fiqi waxa uu sheegay in Itoobiya ay la xidhiidho dalalka saaxiibka dhow la ah Soomaaliya, isla markaana ay isku dayday inay ka dhaadhiciso in Soomaaliya ay ka biyo diidsan tahay wada-hadallada muranka dhaliyey ee heshiiska badda ee ay Somaliland ku lug leedahay. “Itoobiya waxay doonaysaa in Soomaaliya loo arko mid gardaran oo aan wada shaqayn lahayn,” ayuu yidhi Fiqi. Waxa uu soo jeediyay in istaraatiijiyadan looga gol leeyahay in Soomaaliya la go’doomiyo, isla markaana la dhimo taageeradeeda caalamiga ah, iyadoo laga digtoonaado dalalka kale inay la saftaan.
Sidoo kale Fiqi ayaa ku eedeeyay Itoobiya inay faragelin xooggan ku hayso arrimaha gudaha ee Soomaaliya oo ay ka mid yihiin inay ciidamo ku tababarto xuduudaha Soomaaliya iyo inay saameyn ku leedahay dowlad goboleedyada. Wuxuu ku nuux-nuux saday in ficillada Itoobiya ay horseedeen in Soomaaliya ay si xaq darro ah u sawirto, taasoo saameyn ku yeelatay xiriirkeeda diblomaasiyadeed.