Tehran (KAAB TV) – Waxaa maanta oo Khamiis ah lagu wadaa in salaada Janaasada magaalada Tehran lagula dukado meydka Allaha u Naxariistee hoggaamiyihii ururka Xamaas Ismaaciil Haniya, oo habeen hore lagu dilay weerar qorsheysan oo ka dhacay gudaha magaalada Tehran ee caasimadda Iran.
Sidoo kale, hoggaamiyaha ugu sarreeya dalka Iran, Ayatollah Ali Khamenei, ayaa tujin doona salaad Janaasad oo maanta lagu dukan doono meydka Haniya , waxaana salaada Janaasada la filayaa in ay kasoo qeyb galaan madax katirsan dowladda Iran iyo dadweyne ka murugeysan dilka Haniya.
Dhanka kale, meydka hoggaamiyihii siyaasadda ururka Xamaas Ismaaciil Haniya, ayaa marka Janaasada lagu dukado kaddib lagu wadaa in loo qaado magaalada Doha ee caasimadda dalka Qatar , halkaas oo la filayo in lagu aaso meydka marxuumka.
Hoggaamiyaha Xamaas Ismaaciil Haniya ayaa inta aan la delin kahor deganaa muddo sannado ah dalka Qatar uu ka heestay magangelyo, waxaana hoggaamiyahan lagu dilay magaalada Tehran uu u tagay ka qeyb galka caleemo saarka Madaxweynaha cusub ee Iran.
Ugudambeyn, dilka hoggaamiyaha Xamaas ayaana abuuray cabsi laga qabo in dagaal ka qarxo Bariga Dhaxe, dowladda Iran ayaana ku hanjabtay in jawaab kulul ka bixin doonto weerarka Isra’iil ka fulisay gudaha dalkeeda kuna dishay hoggaamiyaha Xamaas.