Dhusamareb (KAAB TV) – Labo wiil oo walaalo ah oo ka soo jeeda degmada Cadaado Cabdikariim Axmed Carab ayaa ku dhintay qoyskoodana waa lagu dhaawacay weerar maleeshiyo beeleed xalay ku qaadeen deegaanka Oodan ee gobolka Galgaduud.
Kooxihii weerarka geystay oo la rumeysan yahay inay ka soo jeedaan Degmada Xarardheere ee Gobolka Mudug ayaa markiiba goobta ka baxsaday.
Ciidamo ka tirsan kuwa deegaanka ayaa gaaray goobta uu dilku ka dhacay waxaana ay halkaasi ka wadaan baaritaano ay ku baadi goobayaan kooxihii dilka geystay.
Ma jirto cid sheegatay mas’uuliyadda weerarka.
Dilka laba-geesoodka ah ayaa qeyb ka ah dagaal beeleedyada ka dhacay Galgaduud, kaasoo ay ka dhasheen muranno ka dhashay dhul aan la dagin. Xukuumadda Galmudug oo uu ugu horeeyo Wasiirka Amniga Maxamed Cabdi Aadan Gaboobe ayaa wacad ku maray in lala xisaabtami doono cidii ka dambeysay falkaasi. Inkastoo qaar ka mid ah tirooyinka ka dambeeya rabshadaha la aqoonsaday lana ballan qaaday in tallaabo sharci ah laga qaadi doono, rabshaduhu waa ay sii socdaan.
Weerarkan ayaa daba socda dagaallo khasaare geystay oo ka dhacay deegaanka Landhere, halkaasoo ay ku dhinteen in ka badan 50 qof dhawaan Iyadoo taas laga jawaabayo, waxaa la qaaday tallaabooyin amni oo la adkeeyay, oo ay ku jiraan ciidamo dheeraad ah isbaarooyin iyo bandow lagu soo rogay Landhere iyo deegaannada kale ee ay dhibaatadu ka dhacday.
Colaadda socota waxaa ku lug leh beelaha Mareexaan iyo Dir. Shaqaaqo dhawaan ka dhacday gobolka Mudug oo u dhaxaysa beelaha Sacad iyo Lelakase ayaa sababay dhimashada 20 qof iyo dhaawaca 50 kale Labada mas’uul ee Galmudug iyo Puntland ayaa ku baaqay xabbad joojin iyo faragelin ciidan si looga hortago dagaal kale Hoggaamiyaha dowlad goboleedka Galmudug Axmed Cabdi Kaariye Qoorqoor ayaa horay ugu eedeeyay siyaasiyiin aan la magacaabin in ay wadaan hurinta beelaha