Muqdisho (KAAB TV) – Wasiirkii hore ee arrimaha dibadda Soomaaliya Fowsiya Yuusuf Aadam ayaa ka tanaasushay musharaxnimada guddoomiyaha guddiga Midowga Afrika iyadoo ay soo gudbiyeen afar dowladood oo kale oo xilkaasi u tartamaya.
Ilo wareedyo ayaa xaqiijiyay in Xildhibaan Aadan aanu ka mid ahayn afarta musharax ee isu diiwaangeliyay Doorashada Guddoomiyaha Midowga Afrika. 6-da Agoosto ayay ahayd maalinta kama dambaysta ah ee ay musharraxiintu ku soo gudbinayaan codsiyadooda.
Bishii June Wasiirkii hore ee arrimaha dibadda Soomaaliya ayaa shaaca ka qaaday in madaxda dowladda federaalka iyo hoggaamiyeyaasha afar dowladood oo federaal ah ay ku cadaadiyeen inay ka noqoto musharaxnimadeeda kadib codsi ka yimid madaxweynaha Jabuuti, Ismaaciil Cumar Geelle.
Mar ay shir jaraa’id ku qabatay magaalada Muqdisho ayay tiri “Dowladda iyo afar ka mid ah madaxda dowladda federaalka ah waxay ii sheegeen inaan ka tanaasulo musharaxnimadayda, waxaan isku dayay inaan ku qanciyo muhiimadda uu leeyahay kursiga, balse waa ii suurtageli weyday, waxay isla garteen inaan u tanaasulo. Kursiga u dhiibo Jabuuti oo isna musharax ah”.
Wasiirkii hore ee arrimaha dibadda Soomaaliya waxa uu intaa ku daray in Madaxweyne Xasan Sheekh Maxamuud uu ka reebay tartanka Kursiga Midowga Afrika ee 2016-ka inta uu xilka hayo, sababtoo ah Kenya ayaa iyaduna u tartamaysay jagadaas. “Laba jeer ayaa la ii diiday guddoomiyenimada Midowga Afrika, ma garanayo inay tahay qof dumar ah ama sababo kale oo qarsoon,” ayay tiri.
Madaxda qaranka Soomaaliyeed ayaa taageeray Adam kadib markii ay ku dhawaaqday in ay musharax tahay February 2024 si ay u kordhiso saameynta Soomaaliya ay ku leedahay Midowga Afrika. Bishii Maarso, dawladdu waxay bilawday dadaallo olole waxayna samaysay guddi gaar ah oo taageera ololaheeda, iyada oo hoosta ka xariiqday muhiimadda ay leedahay xaqiijinta jagadan saamaynta leh.
Ra’iisul Wasaarihii hore ee Kenya Raila Odinga ayaa hadda helay dardar kale oo ku aadan tartanka loogu jiro Guddiga Midowga Afrika, maadaama Soomaaliya iyo Seychelles ay ka tanaasuleen musharrixiintooda. Sida ay sheegayaan wararka afarta musharax ee isu diiwaan galiyay doorashada ayaa waxaa ka mid ah Raila Odinga oo u dhashay dalka Kenya, Wasiirka arrimaha dibadda Jabuuti Maxamuud Cali Yuusuf oo ah musharax ka soo jeeda Mauritius iyo musharax ka socda Madagascar.
Doorashada ayaa dhici doonta bisha February ee sanadka soo socda.