Afgooye (KAAB TV) –Faahfaahino dheeraad ah ayaa laga helaya qarax miino oo ka dhacay degmada Afgooye ee gobolka Shabeellaha Hoose, kaasi oo sababay dhimasho iyo dhaawac.
Sarkaal lagu magacaabi jiray Dhame Maxamuud Saleebaan Salaad, oo ahaa abaanduulaha ururka 64-aad, ayaa la xaqiijiyey inuu ku dhintay qaraxaasi oo ka dhacay xerada guutada 7-aad ee ku dhex taalla degmada Afgooye.
Goobjoogayaal ayaa sheegay in laba askari oo ka tirsanaa ilaaladiisa ay sidoo kale dhaawacmeen.
Ciidamada ammaanka ayaa bilaabay baaritaanno, iyaga oo halkaasi ka wada howlgallo amniga lagu xaqiijinayo.
Qaraxa dhacay iyo khasaaraha ka dhashay kama aysan hadlin maamulka degmada Afgooye iyo taliska guud ee ciidamada xoogga dalka.
Hore sidaan oo kale qaraxyo miino ayaa uga dhacay gudaha magaalada Afgooye, kuwaasi oo lala beegsay ciidamada iyo shacabka.