Wararka laga helayo Dowlad Deegaanka Soomaalida ayaa sheegaya in dowladda Itoobiya ay magaalada Addis Ababa u qaadday ku dhowaad 220 askari oo ka tirsan milatariga Soomaaliya, kuwaas oo muddo lagu hayay xerada Garab Case ee magaalada Jigjiga.
Askartan ayaa la sheegay in ciidamada Itoobiya ay shalay basas ugu qaadeen caasimadda dalkaas, kaddib markii ay muddo ku sugnaayeen xerada Garab Case. Ilaa hadda ma jiro war rasmi ah oo faahfaahinaya sababta rasmiga ah ee askartan loogu wareejiyay Addis Ababa iyo halka lagu sii hayn doono.
Ciidankan ayaa la sheegay inay ka mid ahaayeen cutubyo uu Xasan Sheekh Maxamuud bishii Agoosto tababar ugu soo xiray deegaanka Xananbuure, oo ka tirsan gobolka Galgaduud ee maamulka Galmudug.
Sida wararku tilmaamayaan, askarta ayaa fasax ku joogay deegaanno ka tirsan Dowlad Deegaanka Soomaalida markii ay Itoobiya qabatay. Si kastaba ha ahaatee, faahfaahin madax-bannaan oo ku saabsan xaaladihii ay ku qabsoomeen iyo duruufihii keenay xariggooda weli si rasmi ah looma shaacin.
Sida ay sheegeen saraakiil amni oo ka tirsan dowladda Itoobiya, xukuumadda Ra’iisul Wasaare Abiy Axmed ayaa aaminsan in ciidankan uu tababar siiyay dowladda Masar, isla markaana ay u socdeen deegaannada maamulka Jubaland.
Eedeymahan ayaa ku soo aadaya xilli ay jiraan khilaafaad siyaasadeed iyo kuwo diblomaasiyadeed oo u dhexeeya Soomaaliya iyo Itoobiya. Hase yeeshee, ma jiro faahfaahin rasmi ah oo la shaaciyay oo si madax-bannaan u xaqiijinaysa eedeymaha la xiriira tababarka Masar iyo ujeeddada safarka askarta.
Xiriirka Soomaaliya iyo Itoobiya ayaa muddooyinkii dambe wajahaya xiisado la xiriira arrimo siyaasadeed iyo amni oo gobolka ka jira.
Xukuumadda Abiy Axmed ayaa dhawaan muujisay tabashooyin ku saabsan mowqifka Xasan Sheekh Maxamuud ee xiriirka Soomaaliya la leedahay Masar iyo Eritrea. Dhanka kale, Soomaaliya waxay xiriir la leedahay dalalkaas, iyadoo arrimaha amniga iyo iskaashiga gobolka ay qayb ka yihiin ajandayaasha diblomaasiyadeed ee labada dhinac.
Dadka la socda arrimaha gobolka ayaa indhaha ku haya sida ay labada dowladood uga falcelin doonaan xaaladda askarta iyo haddii wada-hadallo diblomaasiyadeed laga yeelan doono.
Dowladda Federaalka Soomaaliya ayaan weli si rasmi ah uga hadlin wararka sheegaya in 220 askari oo ka tirsan ciidankeeda ay Itoobiya qabatay, muddo ku haysay Jigjiga, kaddibna u wareejisay Addis Ababa.