Kulanka ayaa diiradda lagu saaray xoojinta iskaashiga dhinaca amniga ee u dhexeeya Ciidanka Difaaca Kenya (KDF), oo qeyb ka ah howlgalka AUSSOM, iyo maamulka Jubbaland, iyadoo sidoo kale laga hadlay xaaladda amni iyo dadaallada lagu xasilinayo deegaannada maamulkaas.
Kulanka labada dhinac ayaa looga hadlay sidii loo xoojin lahaa xiriirka iyo wada-shaqeynta hoggaanka ciidamada AUSSOM iyo maamulka Jubbaland, si wax looga qabto caqabadaha amni ee ka jira gobollada uu maamulkaasi ka taliyo.
Kornayl Daanyeel Musau ayaa adkeeyay muhiimadda ay leedahay in xiriirka lala yeesho madaxda deegaanka la joogteeyo, si loo gaaro yoolalka amni ee loo igmaday Qaybta Labaad ee howlgalka AUSSOM.
Sida lagu sheegay war ka soo baxay Wasaaradda Gaashaandhigga Kenya, kulanka ayaa sidoo kale lagu muujiyay muhiimadda iskaashiga ciidamada iyo maamulka deegaanka ee taageeridda nabadda iyo xasilloonida Soomaaliya.
Kenya ayaa ka mid ah dalalka ciidamada ku biiriyay howlgalka AUSSOM, waxaana cutubyadeeda milatari ay qeyb weyn ka yihiin howlgalka Qaybta Labaad oo xarunteedu tahay magaalada Kismaayo.
Qaybtan ayaa ka howlgasha deegaanno ka tirsan Jubbooyinka, Gedo iyo qaybo ka mid ah Shabeellaha Hoose. Ciidamada Kenya ayaa sidoo kale taageera dadaallada lagu xoojinayo awoodda ciidamada amniga ee Jubbaland.
Bishii Juun 2026, waxaa Kismaayo lagu soo gabagabeeyay tababar ay qaateen 100 askari oo ka tirsan ciidamada amniga Jubbaland. Tababarka ayaa diiradda lagu saaray adeegsiga hubka, ka hortagga walxaha qarxa, xeeladaha dagaalka iyo gargaarka degdegga ah ee dhaawacyada goobta dagaalka.
Jubbaland waxay leedahay muhiimad amni oo gaar ah, maadaama ay xuduud dheer la wadaagto Kenya, isla markaana ay ku yaallaan deegaanno istaraatiiji ah oo ay Al-Shabaab ka sameyso dhaqdhaqaaqyo ciidan.
Iskaashiga u dhexeeya ciidamada Kenya iyo maamulka Jubbaland wuxuu saameyn ku yeelan karaa sugidda amniga xuduudaha, la socodka dhaqdhaqaaqyada Al-Shabaab iyo taageeridda ciidamada deegaanka.
Dhanka kale, Kismaayo waa xarun siyaasadeed, ganacsi iyo ciidan oo muhiim u ah koonfurta Soomaaliya, waxaana amnigeedu saameyn ku leeyahay deegaanno badan oo ka tirsan Jubbaland.
Howlgalka AUSSOM wuxuu Soomaaliya ka bilaabmay Janaayo 2025, isagoo beddelay howlgalka ATMIS. Ujeeddooyinka howlgalka waxaa ka mid ah taageeridda ciidamada Soomaaliya ee dagaalka ka dhanka ah Al-Shabaab, ilaalinta dadka rayidka ah, xoojinta hay’adaha amniga iyo taageeridda qorshaha si tartiib ah mas’uuliyadda amniga loogu wareejinayo ciidamada Soomaaliyeed.
Kulanka Kismaayo ayaa qeyb ka ah dadaallada hoggaanka AUSSOM ee lagu xoojinayo xiriirka madaxda Jubbaland iyo hay’adaha amniga, xilli Soomaaliya ay ku jirto marxalad muhiim ah oo dib-u-habeyn lagu sameynayo qaabka amniga dalka.