Ciidamada Uganda oo Ciidanka Xoogga Dalka ku wareejiyey shan saldhig oo muhiim ah oo ku yaalla Baraawe

|

Ciidamada Uganda ee qeybta ka ah Hawlgalka Midowga Afrika ee Taageerada iyo Xasillinta Soomaaliya (AUSSOM) ayaa Ciidanka Xoogga Dalka Soomaaliyeed ku wareejiyey shan saldhig oo ciidan oo ku yaalla deegaanka Baraawe ee gobolka Shabeellaha Hoose.

Wareejinta saldhigyadan ayaa qayb ka ah qorshaha kala-guurka amniga Soomaaliya, kaas oo ujeeddadiisu tahay in ciidamada Soomaaliyeed ay si tartiib tartiib ah ula wareegaan mas’uuliyadda amniga dalka, iyadoo ciidamada Midowga Afrika ay wareejinayaan saldhigyo iyo goobo ay horay uga howlgeli jireen.

Munaasabadda xil-wareejinta ayaa ka dhacday xarunta taliska Guutada 45-aad ee ciidamada Uganda, oo ku taalla deegaanka Embresso. Waxaa hoggaaminayay taliyaha guutadaas, Korneyl Dr. Justus Musenene, isaga oo wakiil ka ahaa taliyaha Qaybta Koowaad, Sarreeye Guuto Jackson Kayanja.

Saldhigyada ay ciidamada Uganda ku wareejiyeen Ciidanka Xoogga Dalka ayaa kala ah Baraawe Embresso, Baraawe Knoll, Kismaayo Road, Seaport iyo Runway.

Sida lagu sheegay warbixinta AUSSOM, dhammaan shanta saldhig waxay ahaayeen kuwo si buuxda u shaqeynayay xilligii xil-wareejinta.

Wareejintan ayaa muhiimad gaar ah u leh ciidamada Soomaaliya, maadaama saldhigyadani ay ku yaallaan goobo muhiim u ah dhaqdhaqaaqa ciidamada, isku socodka gaadiidka iyo sugidda amniga deegaanka Baraawe.

AUSSOM ayaa tallaabadan ku tilmaantay mid muujinaysa horumarka laga gaaray geeddi-socodka kala-guurka amniga iyo awoodda sii kordheysa ee Ciidanka Xoogga Dalka Soomaaliyeed.

Korneyl Dr. Justus Musenene ayaa munaasabadda ka sheegay in wareejinta saldhigyadu ay muujinayso diyaargarowga iyo koboca awoodda hawlgal ee ciidamada Soomaaliyeed.

Wuxuu uga mahadceliyey bulshada ku dhaqan Baraawe taageeradii ay ciidamada Uganda siiyeen muddadii ay halkaas ka howlgaleen, isaga oo ciidamada Soomaaliyeed ugu baaqay inay ilaaliyaan guulihii amni ee la gaaray sannadihii lasoo dhaafay.

DHEERAAD:  Madaxda ugu sareysa dowlada soomaaliya magaalooyin aysan tagikarin oo safiirada dowladahada mareykanka iyo Turkiga u jooga soomaaliya tagaan

Sidoo kale, wuxuu shacabka deegaanka ugu baaqay inay ka qeyb qaataan ilaalinta nabadda iyo xasilloonida, maadaama amniga deegaanka uusan ku xirneyn ciidamada oo keliya, balse uu u baahan yahay wada-shaqeyn dhex marta shacabka iyo hay’adaha amniga.

Dhankiisa, taliyaha Guutada 23-aad ee Ciidanka Xoogga Dalka Soomaaliyeed, Korneyl Maxamed Axmed Cabd, ayaa iskaashiga ciidamada Soomaaliya iyo Uganda ku tilmaamay mid taariikhi ah.

Wuxuu bogaadiyey kaalintii ciidamada Uganda ay ka qaateen sugidda amniga Baraawe, horumarinta deegaanka iyo mashaariicda taageerada bulshada.

Qaar ka mid ah dadka deegaanka oo ka hadlay munaasabadda ayaa iyaguna uga mahadceliyey ciidamada Uganda doorkii ay ku lahaayeen sugidda amniga, iyaga oo ballanqaaday inay ka shaqeyn doonaan ilaalinta nabadda iyo xasilloonida.

Baraawe waa magaalo xeebeed muhiim ah oo ku taalla gobolka Shabeellaha Hoose, waxayna leedahay deked iyo garoon diyaaradeed, kuwaas oo muhiim u ah dhaqaalaha, isu socodka dadka iyo howlaha amniga.

Sidaas darteed, wareejinta saldhigyada ku yaalla agagaarka dekedda, garoonka diyaaradaha iyo waddada Kismaayo waxay ciidamada Soomaaliyeed u leedahay muhiimad dhinaca amniga iyo maamulka goobaha istaraatiijiga ah.

Hase yeeshee, wareejinta saldhig ciidan keliya ma xaqiijineyso in amniga deegaanka si buuxda loo sugay. Waxaa muhiim ah in ciidamada la wareegay ay helaan askar ku filan, hub, gaadiid, shidaal, sahay iyo taageero joogto ah oo ay ku sii wadaan howlgallada.

Waxaa sidoo kale loo baahan yahay in la xaqiijiyo in saldhigyada la wareejiyey ay sii ahaadaan kuwo shaqeynaya, isla markaana aanay ka dhalan firaaq amni oo ay Al-Shabaab ka faa’iideysan karto.

Tallaabadan ayaa ku soo beegmaysa xilli Soomaaliya ay ku jirto marxalad dib loogu habeynayo joogitaanka ciidamada Midowga Afrika, iyadoo AUSSOM ay taageereyso qorshaha dowladda Soomaaliya ee dhismaha iyo tayeynta hay’adaha amniga.

DHEERAAD:  Booliska Waqooyi Bari oo Soo Afjaray Shabakad si sharci dara ah dadka ku Tahriibisa

Ciidamada Uganda ayaa muddo dheer ka mid ahaa kuwa ugu muhiimsan ee ka howlgala Soomaaliya, iyaga oo qeyb ka ahaa dagaalka lagula jiro Al-Shabaab iyo sugidda goobaha muhiimka ah.

Dhaqdhaqaaqyada kala-guurka amniga ayaa keenaya in ciidamada Soomaaliyeed ay si tartiib tartiib ah ula wareegaan saldhigyo iyo waajibaadyo ay horay u hayeen ciidamada Midowga Afrika.

Hase yeeshee, waxaa jira su’aalo la xiriira awoodda ciidamada Soomaaliya ee ay ku maamuli karaan dhammaan goobaha laga wareejinayo ciidamada shisheeye, gaar ahaan marka la eego baahida loo qabo dhaqaale joogto ah, tababar iyo qalab ciidan.

Caqabadda ugu weyn ee hadda hortaalla Ciidanka Xoogga Dalka Soomaaliyeed waa inay awoodaan inay ilaaliyaan saldhigyada cusub, isla markaana ay ka hortagaan isku day kasta oo Al-Shabaab ku dooneyso inay dib ugu soo laabato deegaannadaas.

Haddii ciidamada Soomaaliyeed ay helaan taageero ku filan oo dhinaca saadka, sirdoonka iyo hoggaanka hawlgallada ah, wareejinta saldhigyadani waxay qeyb ka noqon kartaa dhismaha awood ciidan oo qaran.

Dhanka kale, haddii aan la helin qorshe joogto ah oo lagu maareeyo saldhigyada, waxaa dhici karta in wareejinta mas’uuliyadda ay noqoto mid aan si buuxda u dhalin natiijadii laga filayay.

 

La Xiriira

Live Now

Baraheenna Bulshada

Baaritaanada

English News