Asarbayjaan (Kaab TV) -Soomaaliya ayaa lagu wadaa in ay ka qeybgasho shirweynaha 29-aad ee Qaramada Midoobay ee is bedelka cimilada, kaasi oo maanta ka furmay magaalada Baku ee dalka Asarbayjaan. Shir madaxeedka (COP29) , oo socon doona ilaa Noofambar 22, ayaa isu keenaya in ka badan 50,000 oo kaqeybgalayaal ah oo ka kala yimid adduunka oo dhan, oo ay ku jiraan 200 oo hoggaamiyeyaal caalami ah, kuwaas oo wadaagi doona fikrado iyo xeelado wax looga qabanayo isbeddelka cimilada.
Mawduuca shirka sanadkan, “COP of Finance,” wuxuu hoosta ka xariiqay baahida degdegga ah ee maalgelinta cimilada iyo hirgelinta qodobka 6 ee heshiiska Paris, kaas oo ujeedadiisu tahay in lagu xakameeyo suuqyada kaarboonka ee caalamiga ah. Mukhtaar Babayev, Wasiirka Deegaanka iyo Khayraadka Dabiiciga ah ee Asarbayjan, ayaa hogaamin doona shirka, isaga oo dejinaya gogol xaadhista doodaha ku saabsan ballanqaadyada maaliyadeed iyo siyaasadaha dhaqaajin kara ficilada cimilada ee caalamiga ah.
Wafdiga Soomaaliya oo uu hogaaminayo Wasiirka Deegaanka iyo Isbadalka Cimilada ayaa keeni doona qorshe balaaran oo lagu yareynayo saameynta isbadalka cimilada ee dalka. Iyadoo Soomaaliya ay sii kordheyso saameynta ay ku yeesheen xaaladaha cimilada aadka u daran, sida abaaraha iyo fatahaadaha, dowladdu waxay hiigsaneysaa inay iftiimiso baahida degdegga ah ee wax-ka-qabashada cimilada. Qorshaha Soomaaliya waxaa lagu soo bandhigi doonaa meelaha fursadaha jira iyo sidoo kale caqabadaha adag ee horyaalla qaranka, kuwaas oo intooda badan u baahan iskaashi caalami ah iyo taageero maaliyadeed si wax looga qabto.
Isbadalka cimiladu waxa uu saameyn ku yeeshay dhaqaalaha Soomaaliya, haqab-beelka cuntada, iyo kheyraadka biyaha, taas oo uga sii dartay baylahda bulshooyinka dalka oo dhan. Ka-qaybgalka heer caalami, Soomaaliya waxay rajaynaysaa inay soo jiidato maal-gashi iyo taageero hindise loogu talagalay dhisidda adkeysiga iyo la qabsiga dhibaatooyinka cimilada.
Shirkan ayaa loo arkaa inuu fursad muhiim ah u yahay dalalka sida Soomaaliya oo kale ah oo si aan loo qiyaasi karin looga dareemo saameynta isbeddelka cimilada. Ka-qaybgalka Soomaaliya wuxuu xoogga saari doonaa muhiimadda wadajirka caalamiga ah iyo mas’uuliyadda la wadaago ee wax ka qabashada arrimaha deegaanka ee ka gudbaya xuduudaha qaranka.