Muqdisho (KAAB TV) – Dowladda Soomaaliya ayaa si kulul u cambaareysay dilka Ismaaciil Haniyeh oo ahaa Madaxii Xafiiska Siyaasadda Ururka Xamaas kadib weerar gacan ka hadal ah oo ka dhacay magaalada Tehran. Qoraal kooban oo ay soo saartay Wasaaradda Arrimaha Dibadda ayaa ku tilmaantay dilkaas mid aad u fool xun oo si cad u baalmarsan sharciga caalamiga ah iyo mabaadi’da bini’aadantinimo.
Dowladda Soomaaliya ayaa tacsi tiiraanyo leh u dirtay shacabka reer falastiin waxayna caddeysay in ay garab taagan tahay xilligan adag. War-saxaafadeedka ayaa lagu sheegay in weerarku uu wax u dhimayo xeerarka caalamiga ah iyo qiyamka bini’aadantinimo waxaana lagu baaqay in loo hoggaansamo mabaadi’daas si loo xalliyo khilaafaadka iyo wax ka qabashada cabashooyinka.
Dilkan ayaa dhaliyay walaac caalami ah, waxaana jawaabta dowladda Soomaaliya ay ku biirtay baaqyada caalamiga ah ee ku aaddan in ay ka go’an tahay in la ilaaliyo halbeegyada sharciga caalamiga ah iyo taageeridda qadiyadda Falastiin.